ရခိုင်ပြည်နယ်မြောက်ပိုင်း၊ ဘူးသီးတောင်မြို့နယ်ရှိ ဟွိုင်ယာဆီရီ (Hoyyar Siri) သို့မဟုတ် ထန်းရှောက်ခန်ကျေးရွာတွင် ရိုဟင်ဂျာမွတ်စလင်ကျေးရွာတွင် ပြီးခဲ့သည့် ၂၀၂၄ ခုနှစ်၊ မေလ ၂ ရက်နေ့က အာရက္ခတပ်တော် (AA) က ကလေးသူငယ် ၉၀ ဦးအပါအဝင် အနည်းဆုံး ရိုဟင်ဂျာအရပ်သား ၁၇၀ ဦးထက်မနည်းကို အစု လိုက်အပြုံလိုက် ပစ်ခတ်သတ်ဖြတ်ခဲ့ပြီး စစ်ရာဇဝတ်မှုများ ကျူးလွန်ခဲ့ကြောင်း လူ့အခွင့်အရေးစောင့်ကြည့်ရေးအဖွဲ့ (Human Rights Watch – HRW) က ယနေ့တွင် အသေးစိတ်အစီရင်ခံစာ ထုတ်ပြန်လိုက်သည်။

အဆိုပါ အစုလိုက်အပြုံလိုက် သတ်ဖြတ်မှုဖြစ်စဉ်သည် ဖြစ်ပွားခဲ့ပြီး နှစ်နှစ်နီးပါးအကြာ သေဘေးမှ လွတ် မြောက်လာသူများ ဘင်္ဂလားဒေ့ရှ်နိုင်ငံ ဒုက္ခသည်စခန်းများသို့ ရောက်ရှိလာချိန်မှသာ သက်သေအထောက်အထားများနှင့်တကွ ကမ္ဘာက သိရှိအောင် ထုတ်ဖော်နိုင်ခဲ့ခြင်း ဖြစ်သည်။

တိုက်ပွဲများအကြား ရိုဟင်ဂျာအရပ်သားများ ပိတ်မိခဲ့သည့် ဖြစ်စဉ်နှင့် ပတ်သက်၍ HRW ၏ ထုတ်ပြန်ချက်တွင် ၂၀၂၄ ခုနှစ် ၊ ဧပြီလအတွင်း ဘူးသီးတောင်မြို့နယ်၌ မြန်မာစစ်ကောင်စီတပ်နှင့် အာရက္ခတပ်တော် (AA) တို့အ ကြား တိုက်ပွဲများ အကြီး အကျယ် ပြင်းထန်ခဲ့သည်။ ဟွိုင်ယာဆီရီကျေးရွာသည် စစ်ကောင်စီ၏ စစ်ဆင်ရေးကွပ် ကဲမှုဌာနချုပ် (စကခ-၁၅) နှင့် ခမရ-၅၅၁ တပ်ရင်းတို့အကြား တည်ရှိသဖြင့် အခြားဒေသမှ စစ်ဘေးရှောင်ရိုဟင်ဂျာ ရာပေါင်းများစွာမှာ ဘေးလွတ်ရာဟု ယူဆကာ လာရောက်ခိုလှုံခဲ့ကြသည်။

တိုက်ပွဲမတိုင်မီ စစ်ကောင်စီက ရိုဟင်ဂျာလူငယ်များကို အဓမ္မစစ်သားစုဆောင်းခဲ့ပြီး ရွာသားများကို မထွက်ခွာရန် အမိန့်ပေးခဲ့သလို၊ AA ဘက်ကလည်း ရွာသားများကို အရေးပေါ်ရွှေ့ပြောင်းရန် သတိပေးခဲ့သဖြင့် ပြည်သူများမှာ မည်သည့်ဘက်သို့ သွားရမည်ကို မသိဘဲ ပိတ်မိနေခဲ့ကြသည်။

၂၀၂၄ ခုနှစ် မေလ ၂ ရက်နေ့ အရုဏ်တက်ချိန် အကြမ်းဖက်စစ်တပ်၏ စကခ-၁၅ စခန်းကျဆုံးပြီးနောက် စစ်ကောင်စီစစ်သားများ ရွာထဲသို့ ဆုတ်ခွာဝင်ရောက်လာသဖြင့် ရွာသားများမှာ တိုက်ပွဲကြားညှပ်မည်ကို စိုးရိမ်ကာ နံနက် ၇ နာရီခန့်တွင် အဖြူရောင်အလံများ ကိုင်ဆောင်၍ ဘူးသီးတောင်မြို့ဘက်သို့ အုပ်စုလိုက် ထွက်ပြေးခဲ့ကြသည်။

သို့သော် “တိုင်နာမူရာ” (Toinna Mura) ကုန်းအနီးသို့ ရောက်ရှိစဉ် အာရက္ခတပ်တော် (AA) တပ်ဖွဲ့ဝင်များ ပေါ် လာပြီး လက်နက်မဲ့အရပ်သားများကို ဘာသတိပေးချက်မှမရှိဘဲ လမ်းဘေးနှင့် စပါးခင်းများထဲအထိ လိုက်လံကာ သေနတ်၊ ဓားမောက်များဖြင့် အနီးကပ် ဝိုင်းဝန်းပစ်ခတ်သတ်ဖြတ်ခဲ့သည်။ HRW အနေဖြင့် သေဆုံး/ပျောက် ဆုံးသူ ၁၇၀ ကျော်၏ အမည်စာရင်းကို အတည်ပြုနိုင်ခဲ့ပြီး ရိုဟင်ဂျာတက်ကြွလှုပ်ရှားသူများကမူ သေဆုံးသူ ၅၀၀ ခန့်အထိ ရှိနိုင်သည်ဟု ဆိုသည်။

အရပ်သားများကို သတ်ဖြတ်ပြီးနောက် AA တပ်ဖွဲ့ဝင်များသည် ဟွိုင်ယာဆီရီကျေးရွာရှိ နေအိမ်များကို လုယက်ကာ မီးရှို့ဖျက်ဆီးခဲ့ကြောင်း မျက်မြင်သက်သေများနှင့် ဂြိုဟ်တုဓာတ်ပုံမှတ်တမ်းများအရ သိရသည်။

အကြမ်းဖက်စစ်တပ်၏ ရိုဟင်ဂျာမွတ်စလင်နှင့် ရခိုင်ဗုဒ္ဓဘာသာဝင်များအကြား လူမျိုးရေးပဋိပက္ခဖြစ်အောင် သွေးထိုးလှုံ့ဆော်မှုများ ရှိခဲ့သော်လည်း လက်တွေ့တွင် AA ဘက်ကလည်း အရပ်သားနှင့် စစ်သား မခွဲခြားဘဲ အစုလိုက်အပြုံလိုက် သတ်ဖြတ်မှုများကို ကျူးလွန်ခဲ့ကြောင်း HRW ၏ စုံစမ်းစစ်ဆေးမှုများက ထောက်ပြနေသည်။

ယူအယ်လ်အေ (ULA/AA) ဘက်ကမူ အရပ်သားများကို သတ်ဖြတ်ခြင်းမရှိကြောင်း အစဥ်အဆက် ငြင်းဆိုထားပြီး သေဆုံးသူများသည် စစ်ကောင်စီတပ်သားများနှင့် ရိုဟင်ဂျာစစ်သားစုဆောင်းခံရသူများသာဖြစ်သည်ဟု ဆိုသည်။

သို့သော် HRW ၏ ဒစ်ဂျစ်တယ်စုံစမ်းစစ်ဆေးမှုအရ စပါးခင်းများအတွင်း အရပ်သားအဝတ်အစားများနှင့်အတူ ဦးခေါင်းခွံများ၊ အရိုးစုများစွာ ကျန်ရစ်ခဲ့သည့် ဗီဒီယိုနှင့် ဓာတ်ပုံမှတ်တမ်းများကို ဖော်ထုတ်နိုင်ခဲ့သည်။ ထို့ပြင် AA သည် ကျန်ရစ်သည့် ရွာသားများကို သတ်ဖြတ်မှုမရှိကြောင်း မီဒီယာများရှေ့တွင် ရုပ်သံဖြင့် လိမ်လည်ထွက်ဆိုရန် ခြိမ်းခြောက်အကျပ်ကိုင်ခဲ့သည်ဟု သေဘေးမှ လွတ်မြောက်လာသူများက ထွက်ဆိုထားသည်။

မီးလောင်ပျက်စီးသွားသည့် ဟွိုင်ယာဆီရီကျေးရွာသို့ မည်သူမျှ ပြန်လည်မနေထိုင်နိုင်တော့ဘဲ လက်ရှိတွင် သားကောင်ဖြစ်ခဲ့ရသည့် ရိုဟင်ဂျာအများစုကို AA က “နတ်စော်ပါး” (Nassawr Para) ခေါ် ယာယီစခန်းတစ်ခုသို့ အဓမ္မပြောင်းရွှေ့စေကာ အကျဉ်းသားများသဖွယ် အမြဲတမ်းစောင့်ကြည့်ထိန်းချုပ်ထားပြီး၊ အတင်းအဓမ္မ လုပ် အားပေးခိုင်းစေမှုများ ပြုလုပ်နေသည်။ အချို့မှာမူ ဘင်္ဂလားဒေ့ရှ်နိုင်ငံ ဒုက္ခသည်စခန်းများသို့ စွန့်စားထွက်ပြေး လွတ်မြောက်လာခဲ့ကြသည်။

လူ့အခွင့်အရေးစောင့်ကြည့်ရေးအဖွဲ့ (HRW) က အာရက္ခတပ်တော် (AA) အနေဖြင့် အရပ်သားများအပေါ် တိုက်ခိုက်မှု၊ ဖမ်းဆီးမှုနှင့် အဓမ္မလုပ်အားပေးခိုင်းစေမှုများကို ချက်ချင်းရပ်တန့်ရန်နှင့် နိုင်ငံတကာစုံစမ်းစစ်ဆေးရေးအဖွဲ့ (IIMM) ကို အမှုအား ဝင်ရောက်စစ်ဆေးခွင့်ပေးရန် တောင်းဆိုထားသည်။

ထို့ပြင် ကုလသမဂ္ဂအပါအဝင် နိုင်ငံတကာအစိုးရများအနေဖြင့် မြန်မာစစ်ကောင်စီနှင့် AA တပ်ဖွဲ့တို့၏ စစ်ရာဇဝတ်မှုများကို ထိရောက်စွာ အရေးယူနိုင်ရေးအတွက် လက်နက်ပိတ်ဆို့မှုများနှင့် ပစ်မှတ်ထားအရေးယူမှုများ အမြန်ဆုံးပြုလုပ်ရန် တိုက်တွန်းထားသည်။

The post ရခိုင်ပြည်နယ်၊ ဘူးသီးတောင်တွင် AA က ကလေးသူငယ် ၉၀ ဦး အပါအဝင် ရိုဟင်ဂျာ ၁၇၀ ဦးထက်မနည်းကို သတ်ဖြတ်ခဲ့ဟု HRW က အစီရင်ခံစာ ထုတ်ပြန် appeared first on Khit Thit Media.

ဧရာဝတီတိုင်း၊ ရေကြည်မြို့နယ်အခြေစိုက် စစ်ကောင်စီ၏ အမတ ၃၄၄ ကာကင်းစခန်းအားလုံးကို အာရက္ခတပ်တော် – AA နှင့်ပူးပေါင်းတပ်ဖွဲ့များက သိမ်းပိုက်ရရှိထားပြီး တပ်ရင်းဌာနချုပ်တွင် တိုက် ပွဲပြင်းထန်နေကြောင်း ဒေသသတင်းရင်းမြစ်နှင့် CDM ဗိုလ်ကြီးဇင်ယော်တို့က ရန်ကုန်ခေတ်သစ် သတင်းဌာနထံသို့ ပြောကြားသည်။

၂၀၂၅ နှစ်ခုနှစ် ဆန်းပိုင်းကတည်းက အာရက္ခတပ်တော် – AAနှင့် မဟာမိတ်များက ရေ ကြည်မြို့နယ်၊ အမတ ၃၄၄ အမြောက် တပ်၏ ကာကင်းစခန်း၂ ခုကို သိမ်းယူထားပြီး ယခု မေလ ၁၀ ရက်နေ့မှစတင်၍ ကျန်ရှိနေသော ကာကင်းများကို ထိုးစစ်ဆင်တိုက်ခိုက်ခဲ့ရာ မေလ ၁၂ ရက်နေ့နှင့် ၁၃ ရက်နေ့တို့တွင် တိုက်ပွဲပိုမိုပြင်းထန်ခဲ့ပြီး အမတ ၃၄၄ တပ်ရင်းနှင့် တမိုင်ခန့်အကွာရှိ စစ်တပ် ကာ ကင်းစခန်း ၃ ခုကို သိမ်းပိုက်ရရှိခဲ့ကြောင်း သိရသည်။

“မြောက်စမ်းအမြောက်တပ် ၃၄၄ တစ်ခုလုံးကို ဝိုင်းပတ်ပိတ်ဆို့ထိန်းချုပ်ထားတဲ့ အနေအထားကို ရောက်သွားပြီ။ ပြောရမယ်ဆိုရင် ၃၄၄ ရဲ့အပြင်ခံစစ်စခန်း အကုန်ကုန်သွားပြီ။ ၃၄၄ မြောက်တပ်ရင်း တစ်ခုပဲ ကျန်တော့တဲ့အနေ အထားကို တွေ့ရပါတယ်။” ဟု CDM ဗိုလ်ကြီးဇင်ယော်က ရန်ကုန်ခေတ် သစ်သတင်းဌာနထံသို့ ပြောကြားသည်။

ထိုသို့ ကာကင်းစခန်းများကို သိမ်းပိုက်ရရှိပြီးနောက် အာရက္ခတပ်တော် -AA နှင့်ပူးပေါင်းတပ်ဖွဲ့များ က ကျန်ရှိနေသော အမတ ၃၄၄ တပ်ရင်းကို ဆက်လက်၍ ထိုးစစ်ဆင်တိုက်ခိုက်လျက်ရှိရာ တပ်ရင်း အတွင်းမှ အရာရှိ မိသား စုဝင်များမှာ ပြောင်းရွှေ့နေကြသော်လည်း လက်အောက်ငယ်သားမိသားစု ဝင်များကိုမူ ပြောင်းရွှေ့ခွင့်မပြုပဲ ပိတ်ဆို့ထားကြောင်း သိရသည်။

ထို့အပြင် တိုက်ပွဲများအတွင်း သေဆုံးသွားသော စစ်သားများနှင့် ဒဏ်ရာရ စစ်သားများကိုလည်း မိုး ကာအုပ် စစ်သုံးဖောကားများဖြင့် ပုသိမ်မြို့သို့ သယ်ယူကာ ဒဏ်ရာရ စစ်သားများကို ပုသိမ်စစ်မြေ ပြင်ဆေးတပ်ရင်း မဆရ -၄ သို့လည်းကောင်း၊ သေဆုံးသွားသော စစ်သားများကို ရွှေမြင်တင် မီး သင်္ဂြိုလ် စက်သို့လည်းကောင်း ပို့ဆောင်ကာ သင်္ဂြိုလ်နေကြောင်း သိရသည်။

အဆိုပါ အမြောက်တပ်ရင်းအတွင်း၌ ပုသိမ်မြို့ အခြေစိုက် အနောက်တောင်တိုင်း စစ်ဌာနချုပ်မှ တပ်ရင်းများ၊ ကျုံပျော် ခလရ ၃၆ တပ်ရင်း၊ ဖျာပုံအခြေစိုက် ခလရ ၉၈ တပ်ရင်း၊ ဓနုဖြူအခြေစိုက် ခလရ ၁၀၈၊ တပ်မ ၆၆ လက်အောက်ခံ ခလရ ၁၄ တပ်ရင်း၊ ဟင်္သာတမြို့ အခြေစိုက် ခလရ ၁၈ တပ်များအပြင် အခြားထုတ်နုတ်တပ်များမှ စစ်သားများကို ပို့ဆောင်ကာ ခုခံနေကြောင်း သိရသည်။

လက်ရှိတွင် စစ်တပ်က အင်္ဂပူမြို့နယ် ၊ ကွင်းကောက်မြို့ရှိ တပ်မတော်တန်းမြင့်လေ့ကျင့်ရေးသင်တန်းကျောင်း (တတက-၅) ကို ခံစစ်စခန်းအသွင်ပြောင်းကာ စစ်အင်အား ထောင်ချီဖြည့်တင်း၍ ရက္ခိုင်ပြည်တောင်ပိုင်းကို ထိုး စစ်ဆင်ရန် ပြင်ဆင်နေချိန်တွင် အာရက္ခတပ်တော်နှင့် တော်လှန်ရေးပူးပေါင်းတပ်ဖွဲ့က ရေကြည်မြို့ နယ် မြောက်စမ်းကျေးရွာရှိ အမတ ၃၄၄ ကို ထိုးစစ်ဆင်တိုက်ခိုက်နေခြင်းဖြစ်ကြောင်း သိရှိရသည်။

The post ရေကြည်မြို့နယ်၊ အမြောက်တပ် ၃၄၄ ၏ ကာကင်းစခန်းအားလုံးကို AAနှင့် ပူးပေါင်းတော်လှန်ရေးတပ်များက သိမ်းပိုက်လိုက်ပြီး တပ်ရင်းဌာနချုပ်ကို အပြင်းအထန်ထိုးစစ်ဆင်နေ appeared first on Khit Thit Media.

ရခိုင်ပြည်တွင် အာရက္ခတပ်တော်-AA နှင့် ငြိမ်းချမ်းရေး စေ့စပ်ပေးရန်၊ သိမ်းပိုက်ခံထားရသော ရခိုင်မြို့များ ပြန် လည်ရရှိရေး ညှိ နှိုင်းပေးရန် တရုတ်ထံသို့ မင်းအောင်လှိုင်က အကူအညီတောင်းခံခဲ့ကြောင်း နေပြည် တော်စစ်ဘက်သတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။

တရုတ်နိုင်ငံခြားရေးဝန်ကြီး ဝမ်ယိက နေပြည်တော်သို့ ဧပြီလ ၂၅ ရက်နေ့မှ ဧပြီလ ၂၆ ရက်နေ့အထိ လာရောက်ခဲ့ပြီး ယင်းခရီးစဉ်အတွင်း မင်းအောင်လှိုင်က တရုတ်နိုင်ငံခြားရေးဝမ်ယိထံသို့ ရခိုင်အရေးနှင့်ပတ်သက်၍ တရားဝင် အကူအညီတောင်းခံခဲ့ခြင်း ဖြစ်ကြောင်း၊ ရခိုင်ပြည်နယ်အတွင်း တည်ငြိမ်အေးချမ်းရေးနှင့် လုံခြုံရေးသည် တရုတ်-မြန်မာ နှစ်နိုင်ငံလုံး၏ အကျိုး စီးပွားများနှင့် ဆက်စပ်နေသဖြင့် တည်ငြိမ်အေးချမ်းမှု ပြန်လည် ရရှိရေး အကူအညီပေးရန် မင်းအောင် လှိုင်က တရုတ်နိုင်ငံခြားရေးဝမ်ယိထံသို့ တင်ပြခဲ့ကြောင်း၊ ရခိုင်ပြည်မှ မြို့များကို ပြန်လည်ရရှိရေးအတွက်လည်း အကူအညီများပေးပါရန် မင်းအောင်လှိုင်က တရားဝင် ထုတ်ဖော်ပြောဆိုခဲ့ကြောင်း သိရှိရသည်။

တရုတ်နိုင်ငံခြားရေးဝန်ကြီးကလည်း မြန်မာနိုင်ငံ၏ တည်ငြိမ်အေးချမ်းရေးနှင့် အချုပ်အခြာအာဏာအတွက် လုပ်ဆောင်မှုများကို တရုတ်နိုင်ငံအနေဖြင့် ထောက်ခံပြီး မြန်မာနိုင်ငံ ဖွံ့ဖြိုးတိုးတက်ရေး၊ ငြိမ်းချမ်းရေး၊ တည်ငြိမ်ရေးနှင့်လုံခြုံရေးများအတွက် တတ်စွမ်းသမျှ အကူအညီပေးသွားမည်ဟု ထုတ်ဖော်ပြောဆိုခဲ့ကြောင်း သိရှိရသည်။

ယင်းအပြင် အကြမ်းဖက် စစ်ခေါင်းဆောင် မင်းအောင်လှိုင်သည် မကြာမီကာလအတွင်း တရုတ်နိုင်ငံသို့ သွားရောက်ရန် ရှိနေကြောင်း သိရှိရသည်။

The post အာရက္ခတပ်တော်-AA နှင့် ငြိမ်းချမ်းရေး စေ့စပ်ပေးရန်၊ သိမ်းပိုက်ခံထားရသော ရခိုင်မြို့များ ပြန်လည်ရရှိရေး ညှိနှိုင်းပေးရန် တရုတ်ထံသို့ မင်းအောင်လှိုင်က အကူအညီတောင်းခံ appeared first on Khit Thit Media.

အာရက္ခတပ်တော် AA နှင့် ဘင်္ဂလားဒေ့ရှ်တို့အကြား ညှိနှိုင်းပြီးနောက် ရခိုင်ဘက်တွင် ငါးခိုးဖမ်း၍ ဖမ်းဆီးခံထားရသည့် ဘင်္ဂလားဒေ့ရှ်တံငါသည် ၁၄ ဦးကို ပြန်လွှတ်ပေးလိုက်ကြောင်း ဘင်္ဂလားဒေ့ရှ်မှ လာသော သတင်းများအရ သိရှီရသည်။

မေလ ၉ ရက်နေ့ ဘင်္ဂလားပင်လယ်အော်အတွင်း ငါးခိုးဖမ်းနေစဉ် ဖမ်းဆီးခံခဲ့ရသည့် ဘင်္ဂလားဒေ့ရှ်တံငါသည် ၁၄ ဦးကို AA က ဘင်္ဂလားဒေ့ရှ်နယ်ခြားစောင့်တပ် (BGB) ထံသို့ ပြန်လည် လွှဲပြောင်းပေးလိုက်ကြောင်း ၊အဆိုပါ တံငါသည်များကို စနေနေ့က နာဖ်မြစ် (Naf River) ၏ Zero Line (နယ်စပ်မျဉ်း) တွင် လွှဲပြောင်းလက်ခံခဲ့ခြင်းဖြစ်ပြီး၊ ထိုမှတစ်ဆင့် တက္ကနာ့ဖ် (Teknaf) မြူနီစီပယ်ရှိ ဂျာလီယာပါရာ (Jaliapara) အကူးအပြောင်းဆိပ်ခံတံတားသို့ ခေါ်ဆောင်လာခဲ့ကြောင်း သိရှိရသည်။

ပြန်လည်လွတ်မြောက်လာသူများထဲတွင် ဘင်္ဂလားဒေ့ရှ်နိုင်ငံသား ၁၃ ဦးနှင့် ဘင်္ဂလားဒေ့ရှ်ဘက်သို့ ခိုလှုံနေသည့် ရိုဟင်ဂျာတစ်ဦး ပါဝင်ကြောင်း၊ BGB ၏ ထုတ်ပြန်ချက်အရ အဆိုပါတံငါသည်များမှာ ၂၀၂၅-၂၀၂၆ ငါးဖမ်းရာသီအတွင်း ဘင်္ဂလားပင်လယ်အော်၌ ငါးဖမ်းနေစဉ် သတိမထားမိဘဲ မြန်မာ့ရေပိုင်နက်အတွင်းသို့ ဝင်ရောက်မိခဲ့ကြခြင်းဖြစ်ကြောင်း၊ ထိုသို့ဝင်ရောက်မိချိန်တွင် အာရက္ခတပ်တော် (AA) က ဖမ်းဆီးပြီး မြန်မာနိုင်ငံအတွင်းရှိ နေရာအသီးသီးတွင် ထိန်းသိမ်းထားခဲ့ခြင်း ဖြစ်ကြောင်း ဘင်္ဂလားဒေ့ရှ်သတင်းများက ဆိုသည်။

၎င်းတို့ကို ပြန်လည်လွတ်မြောက်စေရန်အတွက် ကော့ဘဇား (Cox’s Bazar) ဒေသရှိ BGB တာဝန်ရှိသူများက လူသားချင်းစာနာထောက်ထားမှုဆိုင်ရာ အခြေခံချက်များဖြင့် အာရက္ခတပ်တော် (AA) နှင့် ကာလရှည်ကြာ ဆွေးနွေးညှိနှိုင်းခဲ့ရပြီး အဆိုပါ ညှိနှိုင်းမှုများကြောင့် ယခုကဲ့သို့ ပြန်လည်ခေါ်ဆောင်နိုင်ခဲ့ခြင်း ဖြစ်သည်ဟု သိရှိရသည်။

တက္ကနာ့ဖ်တပ်ရင်း (Teknaf Battalion) မှ တပ်မှူး ဒုတိယဗိုလ်မှူးကြီး Hanifur Rahman Bhuiyan က “နယ်စပ်ကို ကာကွယ်ရုံတင်မကဘဲ သာမန်ပြည်သူတွေရဲ့ ဘေးကင်းလုံခြုံရေးကိုလည်း ကျွန်တော်တို့ အလေးထားပါတယ်။ လူသားချင်းစာနာမှု ရှုထောင့်ကနေ အမြဲတမ်းကြိုးစားခဲ့လို့ ဒီတံငါသည်တွေကို ပြန်လည်ခေါ်ဆောင်နိုင်ခဲ့တာ ဖြစ်ပါတယ်” ဟု ပြောကြားသည်။

လက်ရှိတွင် ပြန်လည်ရောက်ရှိလာသည့် တံငါသည်များကို ကိုယ်ရေးအချက်အလက် စိစစ်မှုများ ပြုလုပ်နေပြီး၊ စိစစ်ပြီးပါက ဒေသန္တရအုပ်ချုပ်ရေးအဖွဲ့များနှင့် ရဲတပ်ဖွဲ့တို့မှတစ်ဆင့် မိသားစုများထံသို့ ပြန်လည်လွှဲပြောင်းပေးအပ်သွားမည် ဖြစ်သည်။

ထို့ပြင် မြန်မာနိုင်ငံအတွင်း ကျန်ရှိနေသေးသည့် အခြားသော ဘင်္ဂလားဒေ့ရှ်တံငါသည်များကိုလည်း ဆက်လက်ခေါ်ဆောင်နိုင်ရန် BGB က AA နှင့် ဆက်လက်ညှိနှိုင်းကြိုးပမ်းနေကြောင်း သိရသည်။

The post အာရက္ခတပ်တော် AA နှင့် ဘင်္ဂလားဒေ့ရှ်တို့အကြား ညှိနှိုင်းပြီးနောက် ရခိုင်ဘက်တွင် ငါးခိုးဖမ်းသည့် ဘင်္ဂလားဒေ့ရှ်တံငါသည် ၁၄ ဦးကို ပြန်လွှတ်ပေး appeared first on Khit Thit Media.

ပဲခူးတိုင်း၊ ပန်းတောင်းမြို့နယ်၊ ကပစ ၁၆ စက်ရုံအနီး ပွိုင့် ၅၀၀ ခံစစ်စခန်းနှင့်ကာကင်းစခန်းများကို အာရက္ခတပ်တော် AA က တိုက်ခိုက်ခဲ့ရာ စစ်သား ၂၀ ကျော်သေဆုံးပြီး လက်နက်ခဲယမ်းများရရှိကြောင်းရခိုင်ဒေသသတင်းရင်းမြစ် Arakan Princess Media က သတင်းထုတ်ပြန်ထားသည်။

မေလ ၄ ရက်နေ့မှ မေလ ၇ ရက်နေ့အထိ ပဲခူးတိုင်း၊ ပန်းတောင်းမြို့နယ်၊ မသုန်ကျေးရွာ၊ ကပစ ၁၆ အနီး ပွိင့် ၅၀၀ ဗျူဟာကုန်း၏ ခံစစ်စခန်းများနှင့် ကာကင်းစခန်းများထဲမှ ကာကင်းစခန်း ၄ ခုကို AA က ထိုးစစ်ဆင်တိုက်ခိုက်ခဲ့ကြောင်း၊ အဆိုပါ ကာကင်းစခန်းများကို တိုက်ခိုက်မှုအတွင်း စစ်သားအလောင်း ၂၀ ကျော်၊ လက်နက်ခဲယမ်းများကို AA က သိမ်းဆည်းရရှိကြောင်း၊ ကာကင်းစခန်းများတွင် စကခ ၁၀ လက် အောက်ခံ ခမရ ၃၆၃၊ ၃၆၄၊ ၃၆၆၊ ၃၆၉ တပ် ရင်းများမှ ခုခံတိုက်ခိုက်လျက်ရှိသည်ကို သိမ်းဆည်းရရှိသည့် စစ်သားအလောင်းများထံမှ သိရှိရသည်။

ယမန်နေ့ မေလ ၈ ရက်နေ့တွင် ကစဉ့်ကလျား ထွက်​ပြေးနေသော အကြမ်းဖက်စစ်ကောင်စီတပ်ဖွဲ့ဝင်များကို လိုက်လံရှင်းလင်းလျက်ရှိပြီး တစ်ချိန်တည်းမှာပင် စစ်တပ်၏ ခံစစ်စခန်းနှင့် ကာကင်းစခန်းများကို ဆက်လက် ထိုးစစ်ဆင်လျက်ရှိကြောင်း သိရှိရသည်။

“ကပစ ၁၆ ကို အဓိက အင်အားဖြည့်တင်းနေတာက စစ်မှုထမ်းတပ်သားတွေပါ။ အပတ်စဉ် ၂၀ နဲ့ အပတ်စဉ် ၂၁ စစ်မှုထမ်း သင်တန်းဆင်း ၅၀၀ ကနေ ၆၀၀ လောက် ကပစ ၁၆ နဲ့ ကင်းစခန်းတွေကို ပို့ထားတာ” ဟု စစ်ဘက်သတင်းရင်းမြစ်က ပြောဆိုသည်။

အလားတူ ကလေးမြို့မှ ဖလမ်းမြို့သို့ တက်လာသည့် စစ်ကောင်စီ၏ စစ်ရေးနှင့် အုပ်ချုပ်ရေးယန္တရား လည်ပတ်ရန် ရည်ရွယ်သည့် ယာဉ်တန်းကြီးတစ်ခုကို တီးတိန်မြို့နယ်၊ ကလေး-သိုင်းငင် လမ်းပိုင်းရှိ ကော်ဖီခြံနှင့် ယန်ဇီရွာကြားတွင် ဒေသကာကွယ်ရေးတပ်ဖွဲ့များက ချုံခိုတိုက်ခိုက်ခဲ့ရာ စစ်ကောင်စီဘက်မှ အရာရှိများ သေဆုံးပြီး မော်တော်ယာဉ်တစ်စီးကို သိမ်းဆည်းရမိခဲ့ကြောင်း CDF-CDM Siyin စစ်ဦးစီးချုပ် ထောင်းပူက ရန်ကုန်ခေတ်သစ်သတင်းဌာနထံသို့ ပြောဆိုသည်။

မေလ ၆ ရက်နေ့ စစ်တပ်က ဖလမ်းမြို့ရှိ ၎င်းတို့၏ အုပ်ချုပ်ရေးယန္တရား ပြန်လည်လည်ပတ်နိုင်ရန်အတွက် Non-CDM ဝန်ထမ်းများ၊ စက်ယန္တရားဝန်ထမ်းများနှင့် စစ်ကောင်စီတပ်ဖွဲ့ဝင်များ ပါဝင်သည့် ယာဉ်တန်းကြီးတစ်ခုဖြင့် တက်လာခဲ့ခြင်းဖြစ်သည်။ အဆိုပါယာဉ်တန်းတွင် ရှေ့ဆုံးမှ ပွိုင့်ကား (Double Cab) နှစ်စီးဖြင့် စစ်ကောင်စီတပ်သား ၂၀ ခန့်က ဦးဆောင်လာပြီး ၎င်းတို့နောက်တွင် ဆိုင်ကယ်အစီး ၁၀၀ ခန့်၊ ၁၀ ဘီးကား၊ ၆ ဘီးကားနှင့် အိမ်စီးကား အများအပြား လိုက်ပါလာခဲ့သည်။

ဒေသကာကွယ်ရေးတပ်ဖွဲ့ဝင်များသည် စစ်ရေးအရ ကြိုတင်သတင်းရရှိထားသဖြင့် ချုံခိုတိုက်ခိုက်ရန် ပြင်ဆင်ခဲ့ကြပြီး တိုက်ခိုက်မှုအတွင်း လက်နက်မပါသည့် Non-CDM ဝန်ထမ်းများကို ထိခိုက်မှုမရှိစေရန်အတွက် ရှေ့ဆုံးမှတက်လာသည့် ဝန်ထမ်းယာဉ်တန်းများကို ကျော်လွန်ခွင့်ပေးခဲ့ပြီး နောက်ဆုံးမှ လိုက်ပါလာသည့် လက်နက်ကိုင် စစ်ကောင်စီတပ်ဖွဲ့ဝင်များပါသော ကားများကိုသာ ပစ်မှတ်ထား တိုက်ခိုက်ခဲ့ကြောင်း သိရှိရသည်။

နာရီဝက်ခန့် စောင့်ဆိုင်းပြီးနောက် နောက်ဆုံးမှ တက်လာသည့် ၁၂ ဘီးကားတစ်စီးနှင့် Fordland ကားအပါအဝင် ယာဉ် ၄ စီးကို စတင်တိုက်ခိုက်ခဲ့သည်။ တိုက်ပွဲအတွင်း Fordland ကားတစ်စီးကို သိမ်းဆည်းရမိခဲ့ပြီး ကျန်ရှိသည့် ကားလေးတစ်စီးမှာမူ ယာဉ်မောင်းဖြစ်သူ မသေဆုံးဘဲ ထွက်ပြေးမောင်းနှင်သွားနိုင်သဖြင့် လွတ်မြောက်သွားခဲ့သည်။

သိမ်းဆည်းရမိသည့် ကားပေါ်တွင် စစ်ကောင်စီဘက်မှ ဗိုလ်ကြီးတစ်ဦးနှင့် ဗိုလ်တစ်ဦးတို့ သေဆုံးနေသည်ကို တွေ့ရှိရသည်။ ထူးခြားချက်အနေဖြင့် အဆိုပါယာဉ်တန်း၏ အနောက်ပိုင်းတွင် စစ်တပ်လော်ဘီ (People Media) မှ ကျော်စိုးဦး လည်း လိုက်ပါလာခဲ့သည်။ ၎င်းသည် တိုက်ခိုက်မှုဖြစ်ပွားချိန်တွင် အလွန်အမင်း ထိတ်လန့်သွားခဲ့ပြီး ကလေးမြို့ဘက်သို့ နေ့ချင်းပြန် ချက်ချင်းလှည့်ပြေးသွားခဲ့ကြောင်း CDF-CDM Siyin စစ်ဦးစီးချုပ် ထောင်းပူက ရှင်းပြသည်။

“ကျနော်တို့ ပစ်လိုက်တဲ့ ကားပေါ်မှာ ဗိုလ်ကြီးတစ်ဦးပါတယ်၊ ပြီးတော့ ဗိုလ်တစ်ဦးပါတယ်။ သေဆုံးတဲ့ ဗိုလ်က ဗိုလ်ဇင်မျိုးမြတ်၊ သေဆုံးသွားတဲ့ ဗိုလ်ကြီးကတော့ နာမည်မသိရသေးဘူး။ ပြီးတော့ ကျော်စိုးဦးတပ်လော်ဘီ People Media က ကျော်စိုးဦးလည်းပါလာတယ်။ သူစီးတဲ့ကားဖြစ်မလား။ အဲနောက်မှာ ၁၂ ဘီးရဲ့နောက်မှာလိုက်လာတဲ့ ကားထဲမှာ သူထိုင်လာတော့ ၊အတိ အကျတော့ မပြော နိုင်ဘူး။ ကျနော်တို့ပစ်တာက နှစ်စီးပေါ့၊ အဲဒီနောက်မှာက နှစ်စီးကျန်သေးတယ်။ သူလည်းတော်တော်လန့်မှာပဲ။ သတင်းကြားတာတော့ သူက ချက် ချင်းနေ့ချင်းပြန်နဲ့ ကလေးဘက်ကို ပြန်လှည့်တယ်လို့တော့ သတင်းပြန်ကြားရတယ်။ အဲဒီကျော်စိုးဦး” ဟု CDF-CDM Siyin စစ်ဦးစီးချုပ် ထောင်းပူကရှင်းပြသည်။

အဆိုပါ တိုက်ခိုက်မှုအတွင်း သေနတ် ၄ လက်နှင့်စစ်ကား ဖောကားတစ်စီးကို CDF-CDM Siyin တပ်များက သိမ်းဆည်းရရှိခဲ့ကြောင်း သိရှိရသည်။

The post ပန်းတောင်း ကပစ ၁၆ စက်ရုံအနီး ပွိုင့် ၅၀၀ ခံစစ်စခန်းနှင့်ကာကင်းစခန်းများကို AA က တိုက်ခိုက်မှု စစ်သား ၂၀ ကျော်သေဆုံးပြီး လက်နက်ခဲယမ်းများရရှိ၊ စစ်လော်ဘီကျော်စိုးဦး လိုက်ပါသော စစ်ယာဉ်တန်းကို တီးတိန်တွင် တိုက်ခိုက်မှု ဗိုလ် ၂ ဦး အပါ အဝင် ၅ ဦးသေဆုံးပြီး ကျော်စိုးဦး ထွက်ပြေးလွတ်မြောက် appeared first on Khit Thit Media.

ပဲခူးတိုင်း၊ ပန်းတောင်းမြို့နယ်၊ မသုန်ကျေးရွာအနီးရှိ ကာကွယ်ရေးပစ္စည်းစက်ရုံ (ကပစ ၁၆) အနီးသို့ အာရက္ခတပ်တော် (AA) နှင့် တော်လှန်ရေးပူးပေါင်းတပ်ဖွဲ့များ ရောက်ရှိပြီး တိုက်ပွဲများ ပြင်းထန်နေကြောင်း တော်လှန်ရေး သတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။

ယခုနှစ် ဖေဖော်ဝါရီလမှစတင်၍ အကြမ်းဖက်စစ်တပ်လက်အောက်ခံ ကပစ ၁၆ ၏ ကာကင်းစခန်းဖြစ်သော ပွိုင့် ၆၆၆ စခန်းကုန်းကို တော်လှန်ရေးပူးပေါင်းတပ်ဖွဲ့များက သိမ်းပိုက်နိုင်ခဲ့ပြီးနောက်၊ လက်ရှိတွင် ပွိုင့် ၅၀၆ စခန်းကုန်းကို ဆက်လက်ထိုးစစ်ဆင်နေသဖြင့် တိုက်ပွဲများ ပြင်းထန်နေကြောင်း သိရှိရသည်။

ယခုနှစ် မတ်လအတွင်းကလည်း လက်နက်ကြီးများဖြင့် ပစ်ခတ်မှုကြောင့် စက်ရုံအတွင်း ကျရောက်ပေါက်ကွဲခဲ့ပြီး လည်ပတ်မှု ယာယီရပ်ဆိုင်းသွားခဲ့ကြောင်း၊ လက်ရှိတွင်လည်း နေ့စဉ်လိုလို တိုက်ပွဲများ အပြင်းအထန် ဖြစ်ပွားနေကြောင်း သိရှိရသည်။

AA က စစ်တပ်၏ လက်နက်စက်ရုံများကို ခြိမ်းခြောက်လာနိုင်ခြင်းကြောင့် အကယ်၍ လက်နက်စက်ရုံများကို သိမ်းပိုက်နိုင်ပါက စစ်တပ်တွင် လက်နက်ခဲယမ်းရရှိ​မှု လျှော့ကျသွားနိုင်ကြောင်း CDM ဗိုလ်ကြီး ဇင်ယော်က သုံးသပ်ပြောဆိုသည်။

“ကပစအနီးထိတော့ အာရက္ခနဲ့ တော်လှန်ရေးတပ်တွေက လက်နက်ကြီး လက်တစ်ကမ်းအလိုတော့ ရောက်ရှိလာပြီလို့ သိရတယ်။ စစ်တပ်ကလည်း ပြီးခဲ့တဲ့ မေလ ၅ ရက်နေ့ကစပြီးတော့ အင်အားဖြည့်တင်းမှုတွေ လုပ်ထားတယ်။ အဓိကတော့ ကပစ ၁၆ တို့ ကပစ ၆ တို့ ကျသွားမှာစိုးတဲ့ အနေအထားမျိုးပေါ့။ စစ်တပ်ရဲ့ ခြေလျင်တပ်သုံး ခဲယမ်းတွေ အပါအဝင် အမြောက်တပ်သုံး၊ ဒရုန်းတပ်ဖွဲ့၊ ပြီးရင် လေကြောင်းကနေ တိုက်ခိုက်တဲ့ ဗုံးသီးမှန်သမျှ ကပစ ၁၆ က ယမ်းနဲ့ပဲ အဓိကလုပ်တာ။ ၁၆ က ယမ်းကို ၅ မှာ ပြန်ပြီးတော့ သန့်စင်တယ်။ အဲဒီတော့ ယမ်းမရှိရင်တော့ ကျည်ဆံ၊ ခဲယမ်းက ဘယ်လိုမှ လုပ်လို့မရတော့တဲ့ အနေအထားမျိုးပေါ့။ ကပစ ၁၆ ကိုသာ အာရက္ခတပ်တော်က သိမ်းပိုက်မိမယ်ဆိုရင် စစ်တပ်အတွက် ခဲယမ်းထုတ်လုပ်မှု ၉၀ ရာခိုင်နှုန်းလောက်အထိ ရပ်ဆိုင်းသွားရမယ့် အနေအထားမျိုးထိ ဖြစ်သွားနိုင်တယ်လို့ သေချာပေါက် ပြောရဲပါတယ်။” ဟု CD​M ဗိုလ်ကြီးဇင်ယော်က ရှင်းပြသည်။

စစ်တပ်က ကပစ ၁၆ မကျစေရေးအတွက် မေလ ၅ ရက်နေ့ကတည်းက အင်အားများ ထပ်မံဖြည့်တင်းထားပြီး ပွိုင့် ၅၀၆၊ ပွိုင့် ၅၃၅ နှင့် ပွိုင့် ၂၆၈ အစရှိသည့် ကာကင်းစခန်း ၃ ခုဖြင့် အပြင်းအထန်ခုခံနေကြောင်း သိရှိရသည်

စစ်တပ်၏ ကပစစက်ရုံများအနီးသို့ နီးကပ်လာသော စစ်ဆင်ရေးကို အာရက္ခတပ်တော် (AA) နှင့်အတူ ဗမာပြည်သူ့လွတ် မြောက်ရေးတပ်တော် (BPLA)၊ မြေလတ်စစ်ဒေသ အမှတ် ၂၀၃ ဗျူဟာတို့အပါအဝင် တော်လှန်ရေးတပ်ဖွဲ့များ ပူးပေါင်းတိုက်ခိုက်နေခြင်း ဖြစ်သည်။

ထို့အပြင် ဥသျှစ်ပင်မြို့နယ်၊ ညောင်ခြေထောက်ကျေးရွာအနီးရှိ ကပစ ၆ စက်ရုံကိုလည်း တော်လှန်ရေးတပ်များက ဆက်လက်ထိုးစစ်ဆင်လျက် ရှိကြောင်း သိရှိရပါသည်။

The post ပန်းတောင်းမြို့နယ်၊ ကပစ ၁၆ အနီးသို့ AA နှင့် တော်လှန်ရေးတပ်များ ရောက်ရှိနေပြီး တိုက်ပွဲများ ပြင်းထန်နေ appeared first on Khit Thit Media.

အာရက္ခတပ်တော်-AA စစ်ဦးစီးချုပ် ဗိုလ်ချုပ်ထွန်းမြတ်နိုင်ကို The Diplomat သတင်းထောက် Rajeev Bhattacharyyaက တွေ့ဆုံမေးမြန်းထားသည်များကို ဆီလျှော်အောင် ဘာသာပြန်ဆို ဖော်ပြအပ်ပါသည်။

မေး- ခင်ဗျားရဲ့ နောက်ခံအကြောင်းနဲ့ အာရက္ခတပ်တော် (AA) ရဲ့ ခေါင်းဆောင် ဘယ်လိုဖြစ်လာလဲဆိုတာ ပြောပြပေးပါဦး။

ဖြေ – ကျွန်တော် စစ်တွေမှာ ဥပဒေကျောင်း တက်ခဲ့ပါတယ်။ ဒါပေမဲ့ သင်တန်းကို အဆုံးထိ မတက်ဖြစ်ခဲ့ပါဘူး။ ကျွန်တော်က ကျောင်းသားခေါင်းဆောင်တစ်ယောက်အနေနဲ့ တက်တက်ကြွကြွ လှုပ်ရှားခဲ့ပြီး တစ်နေ့မှာ (ကျွန်တော် ၉ တန်းတုန်းကပေါ့) စစ်တပ်နဲ့ ထိပ်တိုက်ရင်ဆိုင်မှု ဖြစ်ခဲ့ပါတယ်။ ဒါပေမဲ့ ကြီးကြီးမားမားတော့ မဟုတ်ပါဘူး။ အဲဒါက စစ်တပ်နဲ့ ကျွန်တော့်ရဲ့ ပထမဆုံး ထိတွေ့မှုပါပဲ။

၁၉၉၀ ပြည့်နှစ်တွေရဲ့ နောက်ပိုင်းမှာ ဘင်္ဂလားဒေ့ရှ်နယ်စပ်ကို စတင်ဖြတ်ကျော်ခဲ့ပါတယ်။ ပထမဆုံးအကြိမ်ကတော့ ၁၉၉၈ ခုနှစ်၊ Operation Leech တုန်းက ရခိုင်တော်လှန်ရေးသမားတချို့ ကျဆုံးသွားပြီးတဲ့နောက်မှာပါ။ ကျွန်တော်တို့ဟာ ရခိုင်ပြည်လွတ်မြောက်ရေးပါတီ (ALP) နဲ့ ရခိုင်ပြည်အမျိုးသားညီညွတ်ရေးပါတီ (NUPA) တို့ရဲ့ လှုပ်ရှားမှုတွေဆီကနေ အများကြီး သင်ယူခဲ့ရပေမဲ့ မကြာခင်မှာပဲ ဒီအဖွဲ့တွေဟာ ကျွန်တော်တို့ စိတ်ကူးထားသလောက် မခိုင်မာတာကို သတိထားမိခဲ့ပါတယ်။

စည်းလုံးညီညွတ်မှု လိုအပ်နေတယ်ဆိုတာကို ကျွန်တော် သိခဲ့ပါတယ်။ ၂၀၀၆ ခုနှစ်အထိ ကျွန်တော်တို့ဟာ ဒီရခိုင်အဖွဲ့တွေအားလုံးကို စည်းလုံးလာအောင် မျှော်လင့်ခဲ့ကြပါတယ်။

အဲဒီနှစ်မှာပဲ ကျွန်တော် အိန္ဒိယနိုင်ငံကို အထောက်အထားမပါဘဲ သွားခဲ့ပါတယ်။ မဏိပူရ်ကနေတစ်ဆင့် အိန္ဒိယနယ်စပ်ကို ဖြတ်ကျော်ပြီးနောက် အင်ဖာ (Imphal) မှာ နေခဲ့တယ်၊ အဲဒီနောက် အာသံပြည်နယ် ဂူဝါဟာတီး (Guwahati) မှာ နေခဲ့ပါတယ်။

အဲဒီမှာ ထြီပူရ (Tripura) က ခေါင်းဆောင်တစ်ဦး အပါအဝင် ခေါင်းဆောင်များစွာနဲ့ တွေ့ဆုံခဲ့ပါတယ်။ ဂူဝါဟာတီးကနေ ဒေလီကို ရထားနဲ့ သွားခဲ့ပါတယ်။ ဒေလီမြို့ Vikaspuri မှာ ၂၀ ရက်လောက်နေပြီး ရခိုင်အမျိုးသားကွန်ဂ ရက်ရဲ့ ပထမဆုံးအစည်းအဝေးကို တက်ရောက်ခဲ့ပါတယ်။ အဲဒီမှာ ခေါင်းဆောင်တွေက သေးငယ်တဲ့ ကိစ္စတွေနဲ့ အငြင်းပွားနေကြတာကို တွေ့ရတဲ့အတွက် ကျွန်တော်တို့ လိုချင်တဲ့ စည်းလုံးညီညွတ်မှုကို ဒီမှာ မရနိုင်တော့ဘူးလို့ ယုံကြည်သွားခဲ့ပါတယ်။ သူတို့နဲ့ အချိန်ဖြုန်းနေလို့ မဖြစ်တော့ဘူးဆိုတာ ကျွန်တော် သိလိုက်ပါတယ်။

နောက်ပိုင်းမှာ ကချင်လွတ်မြောက်ရေးတပ်မတော် (KIA) နဲ့ မြန်မာနိုင်ငံရဲ့ တခြားဒေသက အဖွဲ့အစည်းတွေနဲ့ ဆက် သွယ်ဖို့ စိတ်ကူးခဲ့ပါတယ်။ ရန်ကုန်တက္ကသိုလ်က သူငယ်ချင်းတွေကတစ်ဆင့် ကရင်အမျိုးသားလွတ် မြောက်ရေးတပ်မတော် (KNLA) နဲ့ အဆက်အသွယ် ရခဲ့ပါတယ်။ စစ်တွေတက္ကသိုလ်မှာ ဥပဒေသင်တန်း တက် နေရင်းနဲ့ ခရီးသွားလမ်းညွှန် လုပ်ခဲ့တယ်၊ ကျောက်မျက်တွေ ရောင်းခဲ့ပါတယ်။

ဒါတွေက ဂျာမနီ၊ ဆွစ်ဇာလန်နဲ့ တခြားနိုင်ငံက ခရီးသွားတွေကတစ်ဆင့် ကျွန်တော့်ရဲ့ ကွန်ရက်ကို ချဲ့ထွင်ဖို့ အများကြီး အထောက်အကူ ဖြစ်ခဲ့ပါတယ်။ ကျွန်တော် ဆက်သွယ်မိခဲ့တဲ့ အမေရိကန် သူငယ်ချင်းတချို့က ကျွန်တော့်ကို အမေရိကန်မှာ ကျောင်းတက်ဖို့ ဖိတ်ခေါ်ခဲ့ပေမဲ့ ကျွန်တော်က မြေပြင်ကွင်းဆင်းအလုပ်တွေကို ပိုစိတ်ဝင်စားခဲ့ပါတယ်။

ကျွန်တော် ၂၀၀၅ ခုနှစ်မှာ အိမ်ထောင်ကျခဲ့ပြီး ဇနီးသည်ကို ကျွန်တော့်ရဲ့ ရခိုင်ပြည်အတွက် စီမံကိန်းတွေကို ပြောပြခဲ့ပါတယ်။ ကျွန်တော့်ရဲ့ အစ်ကိုကြီး (အခု ကျွန်တော်တို့ အဖွဲ့အစည်းရဲ့ ဒု-ဥက္ကဋ္ဌ နံပါတ် ၃) က KIA နဲ့ ဆက်သွယ်ဖို့ ကူညီပေးခဲ့ပါတယ်။ ကျွန်တော် ကချင်ပြည်နယ်ကို သွားဖို့အတွက် ကျွန်တော့်ရဲ့ Omega နာရီကို ဒေါ်လာ ၄၀၀ နဲ့ ရောင်းခဲ့ပါတယ်။

၂၀၀၆ ခုနှစ် ကချင်ပြည်နယ်ကို ပထမဆုံး ခရီးစဉ်ကတော့ KIA နဲ့ အမြင်ချင်းဖလှယ်ဖို့နဲ့ သင်တန်းတွေကို ၂ ပတ်ကြာ လေ့လာဖို့ပါ။ KIA နဲ့ ယုံကြည်မှု တည်ဆောက်ဖို့ ၃ နှစ်လောက် အချိန်ယူခဲ့ရပါတယ်။ အဲဒီအချိန်မှာ KIA ဟာ အစိုးရနဲ့ အပစ်အခတ်ရပ်စဲထားချိန်ဖြစ်ပြီး KIA ကို နယ်ခြားစောင့်တပ် (BGF) အဖြစ် ပြောင်းလဲဖို့ ဖိအားတွေ ရှိနေချိန်ပါ။ KIA အတွင်းမှာလည်း ဒီအဆိုပြုချက်အပေါ် သဘောထားကွဲလွဲမှုတွေ ရှိခဲ့ပါတယ်။ ၂၀၀၈ ခုနှစ်မှာ KIA ဆီကနေ သင်တန်းပေးဖို့ မီးစိမ်းပြခဲ့ပြီး တစ်နှစ်အကြာမှာ သင်တန်းတွေ စတင်ခဲ့ပါတယ်။ ကျွန်တော်တို့က လူ ၅၀ လောက် သင်တန်းပေးဖို့ စီစဉ်ထားပေမဲ့ KIA က သင်တန်းသား ၂၆ ယောက်ပဲ လက်ခံခဲ့ပါတယ်။ ကျွန်တော်တို့ သူငယ်ချင်းတချို့ ကချင်ပြည်နယ်ကို သွားတဲ့လမ်းမှာ စစ်ဘက်ရေးရာ လုံခြုံရေးအဖွဲ့ (MI) ရဲ့ ဖမ်းဆီးခြင်းကို ခံခဲ့ရပါတယ်။

ကျွန်တော်တို့ ကချင်ပြည်နယ်ကနေ ၂ နှစ်အကြာမှာ ရိုင်ဖယ်သေနတ် ၂၀၀ နဲ့ ပြန်လာဖို့ စဉ်းစားခဲ့ကြပါတယ်။ စစ်ဘက်ဆိုင်ရာ ကိစ္စတွေကို ကျွန်တော်တို့ သင်ယူခဲ့ပါတယ်။ စစ်ဗျူဟာတွေနဲ့ နည်းပရိယာယ်တွေအကြောင်း စာတွေအများကြီး ဖတ်ခဲ့ပါတယ်။ အဲဒီအချိန်မှာပဲ ထိုင်း-မြန်မာနယ်စပ်က ပြည်ပရောက် ကျောင်းသားလူငယ်တွေနဲ့ ဆက်သွယ်ပြီး သင်တန်းပေးဖို့ လူသစ်တွေ စုဆောင်းခဲ့ပါတယ်။

KIA ကလည်း (စစ်တပ်နဲ့ အပစ်ရပ်ထားတာကြောင့်) ဒီသင်တန်းတွေကို လျှို့ဝှက်ထားဖို့ စိုးရိမ်ခဲ့ပါတယ်။ ၂ နှစ်အတွင်းမှာ သင်တန်းသား ၃၀၀ လောက်ကို သင်တန်းပေးနိုင်ခဲ့ပါတယ်။ တချို့အချိန်တွေမှာ ရိက္ခာပြတ်လပ်ခဲ့ပြီး နောက်ပိုင်းမှာ နယ်စပ်က ကျောက်စိမ်းလုပ်ငန်းတွေမှာ ပါဝင်ခဲ့ပါတယ်။ ၂၀၁၃ ခုနှစ်မှာ ကျွန်တော်တို့ရဲ့ ကွန်ရက်ချဲ့ထွင်ဖို့ လူ ၁၉ ယောက်ကို ရွှေတြိဂံဒေသနဲ့ ဘင်္ဂလားဒေ့ရှ်နယ်စပ်ကို စေလွှတ်ခဲ့ပါတယ်။ ရှမ်းပြည်နယ်က ကိုးကန့်နဲ့ ပလောင်အဖွဲ့တွေနဲ့လည်း ရင်းနှီးတဲ့ ဆက်ဆံရေး တည်ဆောက်ခဲ့ပြီး အဲဒီဒေသတွေကနေ လက်နက်တချို့ စုဆောင်းနိုင်ခဲ့ပါတယ်။

အာရက္ခတပ်တော်ရဲ့ ပထမဆုံး တိုက်ပွဲကတော့ ၂၀၁၅ ခုနှစ်၊ မတ်လ ၂၈ ရက်နေ့မှာ ဘင်္ဂလားဒေ့ရှ်နယ်စပ်အနီး ပလက်ဝမြို့နယ်မှာ ဖြစ်ပွားခဲ့ပြီး မြန်မာစစ်တပ်က ဗိုလ်ကြီးတစ်ဦးကို သတ်ဖြတ်နိုင်ခဲ့ပါတယ်။

မေး – ခင်ဗျားမှာ စစ်ရေးအတွေ့အကြုံ မရှိခဲ့ဘဲနဲ့ AA အနေနဲ့ စစ်ရေးအရ အခုလို အံ့ဩစရာကောင်းလောက်အောင် အောင်မြင်မှုတွေ ရနေတာ ဘာကြောင့်လဲ။

ဖြေ – ပြောရုံပြောပြီး မလုပ်တဲ့ အရာတွေရှိသလို၊ လုပ်ပေမဲ့ မပြောတဲ့ အရာတွေလည်း ရှိပါတယ်။ ပြောလည်းပြော လုပ်လည်းလုပ်တဲ့ အရာတွေလည်း ရှိပါတယ်။ ရခိုင်ပြည်နယ်ဆိုတာ သေးငယ်တဲ့ မြေပြင်တစ်ခုပါ၊ ဒါပေမဲ့ ကျွန်တော်တို့က အရင်က အဲဒီလောက် မသေးပါဘူး။ နယ်မြေအပိုင်းအစလေး တစ်ခုအတွက် ရန်ဖြစ်နေမယ့်အစား ကျွန်တော်တို့ လုပ်သင့်တာကို လုပ်ရပါမယ်။ နယ်မြေပိုင်နက် ရည်မှန်းချက်တွေအကြောင်း ပြောနေမယ့်အစား ကိုယ့်ရဲ့ ရည်မှန်းချက် (Mission) အပေါ်မှာပဲ သစ္စာရှိတာ ပိုကောင်းပါတယ်။

ကျွန်တော်တို့ အောင်မြင်မှုအတွက် အကြောင်းရင်းတွေ အများကြီး ရှိပါတယ်။ ဒါပေမဲ့ ကျွန်တော်တို့က အကြီးကျယ်ဆုံး အောင်မြင်မှုအဆင့်ကိုတော့ မရောက်သေးပါဘူး။ ကျွန်တော်တို့မှာ စိတ်ရှည်ဖို့ လိုတယ်၊ အာရုံစိုက်ထားဖို့ လိုတယ်၊ ပြီးတော့ ရှိတဲ့ အကန့်အသတ်ရှိတဲ့ အရင်းအမြစ်တွေနဲ့ စီမံခန့်ခွဲရပါမယ်။

အောင်မြင်မှုရဲ့ အဓိကအချက်ကတော့ ပြည်သူတွေရဲ့ ထောက်ခံမှုပါ။ ကျွန်တော်တို့ဟာ ရခိုင်ပြည်နယ်က မတူကွဲပြားတဲ့ လူ့အသိုက်အဝန်းတွေကြားမှာ ယုံကြည်မှုကို ပြန်တည်ဆောက်နိုင်ခဲ့ပါတယ်။ အထူးသဖြင့် ၂၀၁၂ နဲ့ ၂၀၁၇ ခုနှစ်တွေမှာ လူအများအပြား နှင်ထုတ်ခံခဲ့ရပြီးနောက်ပိုင်း မွတ်စလင်အသိုက်အဝန်းနဲ့ ယုံကြည်မှု ပျက်ပြားမှုတွေ အများကြီး ရှိခဲ့ပါတယ်။ သာမန်အချိန်တွေမှာဆိုရင် သူတို့ဆီ ချဉ်းကပ်ဖို့က မဖြစ်နိုင်ပါဘူး။ သူတို့ကလည်း မိတ်ဆွေတွေကို ရှာဖွေနေကြတာဖြစ်ပြီး ကျွန်တော်တို့က ကျွန်တော်တို့ရဲ့ အစီအစဉ်တွေကို ရှင်းပြခဲ့ပါတယ်၊ ဒါဟာ အရေးကြီးတဲ့ ခြေလှမ်းပါ။

နောက်ပြီး မြေပြင်အနေအထားကလည်း အရေးကြီးတဲ့ အချက်တစ်ခုပါ။ စစ်တပ်မှာ အခြေခံအဆောက်အအုံ ပိုကောင်းပါတယ်။ ကျွန်တော်တို့မှာ အရင်းအမြစ်တွေ အကန့်အသတ်ရှိပေမဲ့ အဲဒါတွေကို အကောင်းဆုံး အသုံးချခဲ့ပါတယ်။

စစ်ပွဲတွေမှာ အလွန်ရဲရင့်မှုနဲ့ ကျွမ်းကျင်မှုကို ပြသခဲ့တဲ့ ကျွန်တော့်ရဲ့ စစ်သည်တွေနဲ့ အရာရှိတွေကို ကျွန်တော် အရမ်းဂုဏ်ယူပါတယ်။ ကျွန်တော်တို့ရဲ့ ဌာနချုပ်ဟာ ဂြိုဟ်တုဆက်သွယ်ရေး အပါအဝင် ရရှိနိုင်တဲ့ နည်းပညာအားလုံးကို ထိထိရောက်ရောက် အသုံးချခဲ့ပြီး ထိရောက်တဲ့ ဆက်သွယ်ရေးအတွက် ပေါင်းစပ်အသုံးချခဲ့ပါတယ်။

ပြန်လှည့်ကြည့်တဲ့အခါမှာ ကျွန်တော့်အဖွဲ့ တစ်ခုလုံးမှာ ကြိုတင်ပြင်ဆင်မှုတွေ အများကြီးလုပ်တဲ့၊ သန္နိဋ္ဌာန်ခိုင်မာတဲ့ လူတွေ အများကြီး ရှိနေတာကို တွေ့ရပါတယ်။ ကျွန်တော် သူတို့နဲ့ သဟဇာတဖြစ်ဖြစ် အလုပ်လုပ်နိုင်ခဲ့ပါတယ်။

မေး – ၂၀၂၅ ခုနှစ်ဟာ အကျပ်အတည်းဖြစ်နေတဲ့ နှစ်တစ်နှစ်ပါ။ AA အနေနဲ့ ကျောက်ဖြူနဲ့ စစ်တွေမြို့တွေကို တိုက်ခိုက်ဖို့ ရှောင်ခဲ့ပေမဲ့ တခြားတော်လှန်ရေးအဖွဲ့တွေနဲ့ ပူးပေါင်းပြီး ဗမာပြည်မထဲကိုတော့ ဝင်ရောက်ခဲ့ပါတယ်။ ဒါဟာ ဗျူဟာပြောင်းလဲမှုလို့ ပြောလို့ရမလား။

ဖြေ – ဗျူဟာရဲ့ အသေးစိတ်ကို ပြောဖို့ကတော့ စောလွန်းပါသေးတယ်။ အချိန်မတိုင်သေးပါဘူး။

မေး – စစ်တပ်ဘက်က ညှိနှိုင်းအဖြေရှာဖို့ ကမ်းလှမ်းလာရင် AA အနေနဲ့ လက်ခံနိုင်တယ်လို့ တွေးဆမှုတွေ ရှိနေပါတယ်။

ဖြေ – နိုင်ငံရေးအရ ဆွေးနွေးတာနဲ့ တည်ငြိမ်မှုဆိုတာ လူတိုင်းရဲ့ အကျိုးစီးပွားပါပဲ။ ကျွန်တော်တို့က နိုင်ငံရေးအရ ရင့်ကျက်ဖို့ လိုပါတယ်။ အဲဒီလောက်ပဲ ပြောပါရစေ။

မေး – ကျွန်တော် ရခိုင်ကို ရောက်နေတဲ့ တစ်လအတွင်းမှာ လေကြောင်းတိုက်ခိုက်မှု ၆ ကြိမ် ရှိခဲ့ပါတယ်။ ဖေဖော် ဝါရီ ၂၄ မှာ ပုဏ္ဏားကျွန်းမြို့နယ်က လူ ၁၇ ယောက် သေဆုံးခဲ့တဲ့ နေရာကို ကျွန်တော် သွားခဲ့ပါတယ်။ အခု ရွေး ကောက်ပွဲတွေ ပြီးသွားပြီဆိုတော့ လေကြောင်းတိုက်ခိုက်မှုတွေ ပိုရှိလာနိုင်ပါတယ်။ ဒီအန္တရာယ်ကို ဘယ်လို ကိုင်တွယ်ဖို့ စီစဉ်ထားလဲ။

ဖြေ – အရပ်သားတွေရဲ့ ဘေးကင်းလုံခြုံရေးက ကျွန်တော်တို့ရဲ့ ဦးစားပေးပါ။ အရပ်သားတွေကို ထိထိရောက်ရောက် အကာအကွယ်ပေးဖို့ ဖြစ်နိုင်သမျှ နည်းလမ်းအားလုံးကို ရှာဖွေနေပါတယ်။ ဒါပေမဲ့ ခက်ခဲပါတယ်။ ဒီလေကြောင်းဗုံးကြဲမှုတွေကို မှတ်တမ်းတင်ဖို့ နိုင်ငံတကာ အသိုက်အဝန်းနဲ့ ပူးပေါင်းနေပေမဲ့ သိပ်ပြီး ထိရောက်မှု မရှိပါဘူး။

ဒါဟာ အလွန်ဆိုးရွားတဲ့ လူသားချင်းစာနာမှုဆိုင်ရာ စိုးရိမ်စရာ ကိစ္စပါ။ ဒါကြောင့်လည်း စစ်တပ်က အရပ်သားတွေကို ဗုံးကြဲနေသမျှ ကာလပတ်လုံး ကျွန်တော်တို့အတွက် နိုင်ငံရေး လုပ်ငန်းစဉ်တွေကို ရှာဖွေဖို့က အလွန်ခက်ခဲနေဦးမှာပါ။ စစ်အစိုးရက အင်အားသုံးပြီး (Position of strength ကနေ) ဆွေးနွေးချင်နေတာပါ။ ဒါပေမဲ့ ကျွန်တော်တို့ကတော့ အဲဒီလို ဖိအားမျိုးကို အလျှော့ပေးမှာ မဟုတ်ပါဘူး။

မေး – လွန်ခဲ့တဲ့ ၂ နှစ်က တရုတ်နိုင်ငံမှာ စစ်ကောင်စီ ကိုယ်စားလှယ်တွေနဲ့ AA ဆွေးနွေးခဲ့ဖူးပါတယ်။ အဲဒီတုန်းက ရခိုင်မှာ စစ်ကောင်စီတပ်တွေ မရှိရဘူးလို့ AA က တောင်းဆိုခဲ့လို့ ဆွေးနွေးပွဲ ပျက်ခဲ့ပါတယ်။ အခုအချိန်မှာရော အစိုးရနဲ့ အဲဒီလို ဆွေးနွေးဖို့ ဆန္ဒရှိလား။

ဖြေ – ခင်ဗျား ပြောတာ မှန်ပါတယ်၊ အဲဒါ ကျွန်တော်တို့ လိုချင်တဲ့ အချက်ပါ။ အစိုးရက ကျွန်တော်တို့ကို ၂၀၂၃ မတိုင်ခင်က အနေအထားကို ပြန်သွားဖို့ လိုလားနေပါတယ်။ အဲဒီလိုဆိုရင် ကျွန်တော်တို့ကလည်း ၁၇၈၄ ခုနှစ်ကို ပြန်သွားချင်ပါတယ်။ (ရခိုင်ဟာ ၁၇၈၄ ခုနှစ်မှာ လွတ်လပ်တဲ့ ဘုရင်စနစ် ပျက်သုဉ်းခဲ့တာပါ)။

လက်တွေ့မကျတဲ့ အရာတွေကို တောင်းဆိုမယ့်အစား အစိုးရအနေနဲ့ လက်တွေ့မြေပြင် အခြေအနေပေါ်မှာ အခြေခံတဲ့၊ အားလုံးပါဝင်နိုင်ပြီး ရိုးသားတဲ့ ညှိနှိုင်းမှုတွေကိုပဲ အာရုံစိုက်သင့်ပါတယ်။ ညှိနှိုင်းမှုတွေဟာ မြေပြင်လက်တွေ့ အခြေအနေနဲ့ ကင်းကွာနေလို့ မဖြစ်ပါဘူး။

မေး – ၂၀၂၃ တုန်းက ကျွန်တော် စစ်ကိုင်းတိုင်းနဲ့ ချင်းပြည်နယ်ကို သွားခဲ့တုန်းက တော်လှန်ရေးအဖွဲ့ အများစုက ၂၀၂၅ အကုန်မှာ စစ်အစိုးရ ပြုတ်ကျမယ်လို့ ယုံကြည်ခဲ့ကြပါတယ်။ ဒါပေမဲ့ အဲဒီလို ဖြစ်မလာခဲ့ပါဘူး။ အဲဒီအစား စစ်တပ်က တချို့ဒေသတွေကို ပြန်ထိန်းချုပ်နိုင်ခဲ့ပါတယ်။ ဒါကို ခင်ဗျား ဘယ်လို ရှင်းပြချင်လဲ။

ဖြေ – အမျိုးသားညီညွတ်ရေးအစိုးရ (NUG) ဟာ အရေးကြီးတဲ့ အခန်းကဏ္ဍက ပါဝင်နေပါတယ်။ ကျွန်တော်တို့ သူတို့ကို လေးစားပါတယ်။ တခြား ပါဝင်ပတ်သက်သူတွေလည်း ရှိပါတယ်။ အားလုံးဟာ ရှင်းလင်းတဲ့ နိုင်ငံရေး အနာဂတ်တစ်ခုအတွက် စုစည်းလာကြဖို့ ကျွန်တော်တို့ ဆန္ဒရှိပါတယ်။ လက်ရှိ အခြေအနေကတော့ ခန့်မှန်းရ ခက်ခဲနေဆဲပါ။ စစ်အစိုးရ ကျင့်သုံးနေတဲ့ ဗျူဟာတွေကြောင့် သွေးထွက်သံယိုမှုတွေ ပိုရှိလာနိုင်ပါတယ်။

မေး – အိမ်နီးချင်းနိုင်ငံတွေနဲ့ ဆက်ဆံရေးအကြောင်း မေးပါရစေ။ ခင်ဗျားက ဘင်္ဂလားဒေ့ရှ်က BNP အစိုးရသစ်ကို ဂုဏ်ပြုခဲ့ပြီးပါပြီ။ လူအများရဲ့ အမြင်မှာတော့ BNP အစိုးရက ရိုဟင်ဂျာ ဒုက္ခသည်တွေကို ပြန်လက်ခံဖို့ AA ကို ဖိအားပေးတာမျိုး၊ ဒါမှမဟုတ် RSO နဲ့ ARSA လို ရိုဟင်ဂျာ လက်နက်ကိုင်အဖွဲ့တွေကို လက်နက်တပ်ဆင်ပေးတာမျိုး လုပ်လာနိုင်ပါတယ်။ အစိုးရသစ်အပေါ် ဘာတွေ မျှော်လင့်ထားလဲ။

ဖြေ – ကျွန်တော်တို့ရဲ့ မျှော်လင့်ချက်ကတော့ ကောင်းမွန်တဲ့ ပတ်ဝန်းကျင်တစ်ခု ဖန်တီးဖို့ ဘင်္ဂလားဒေ့ရှ်နဲ့ လက် တွဲလုပ်ဆောင်နိုင်ဖို့ပါ။ ပထမအချက်အနေနဲ့ ဒေသတွင်းမှာ ရှိနေတဲ့ အဖွဲ့အစည်းတွေကို မှားယွင်းတဲ့ စွပ်စွဲချက်တွေ လုပ်မယ့်အစား သူတို့ကို အသိအမှတ်ပြု အာဏာအပ်နှင်း (Empower) ရပါမယ်။

အာရက္ခပြည်သူ့တော်လှန်ရေးအစိုးရကို အသိအမှတ်မပြုဘဲ ကောင်းမွန်တဲ့ အခြေအနေတစ်ခု ဖန်တီးဖို့က အလွန်ခက်ခဲပါလိမ့်မယ်။ ကျွန်တော်တို့ဟာ ဒုက္ခသည်တွေ ပြန်လာနိုင်ဖို့အတွက် ကောင်းမွန်တဲ့ အခြေအနေတစ်ခု ဖန်တီးပေးချင်ပါတယ်။ ကျွန်တော်တို့ရဲ့ အဓိက ဦးစားပေးက ပြည်သူတွေ ကြုံတွေ့နေရတဲ့ ပြဿနာတွေကို ဖြေရှင်းဖို့ပါ။ ဒါပေမဲ့ လက်နက်ကိုင်အဖွဲ့တွေရဲ့ လှုပ်ရှားမှုတွေက ပြဿနာတွေကို ပိုဖြစ်စေပါလိမ့်မယ်။ ကျွန်တော်တို့ကတော့ ဘယ်လို အခြေအနေမျိုးကိုမဆို ရင်ဆိုင်ဖို့ အသင့်ပါပဲ။

မြန်မာစစ်တပ်က ရိုဟင်ဂျာ လက်နက်ကိုင်အဖွဲ့တွေကို လက်နက်တွေ ထောက်ပံ့ပေးထားပါတယ်။ စစ်တပ်က အခုဆိုရင် ပိုပြီးတော့ ရန်လိုလာနိုင်ပါတယ်။ RSO နဲ့ ARSA အဖွဲ့တွေမှာ မောင်တောနယ်စပ်နားက ဘင်္ဂလားဒေ့ရှ်ဘက်ခြမ်းမှာ စခန်းတွေ ရှိပါတယ်။ AA အနေနဲ့ စစ်မျက်နှာ နှစ်ဖက်မှာ တိုက်ရပါလိမ့်မယ်။ ကျွန်တော်တို့ကတော့ အဲဒီလို အခြေအနေမျိုး မဖြစ်အောင် အစွမ်းကုန် ကြိုးစားမှာပါ၊ ဘာလို့လဲဆိုတော့ ဒါဟာ ကျွန်တော်တို့အတွက်လည်း မကောင်းသလို ဘင်္ဂလားဒေ့ရှ်ရဲ့ အကျိုးစီးပွားအတွက်လည်း မဟုတ်လို့ပါပဲ။

မေး – ဘင်္ဂလားဒေ့ရှ်နဲ့ ကုန်သွယ်ရေးကို ချက်ချင်း ပြန်စချင်သလား။

ဖြေ – ဟုတ်ပါတယ်။ နယ်စပ် နှစ်ဖက်စလုံးမှာ ကုန်သွယ်ရေး ပြန်စဖို့ စောင့်နေကြတဲ့ ကုန်သည်တွေနဲ့ အဖွဲ့အစည်းတွေ အများကြီး ရှိပါတယ်။ ဘင်္ဂလားဒေ့ရှ်ဟာ လူဦးရေများတဲ့ နိုင်ငံဖြစ်ပြီး နယ်စပ်တစ်လျှောက်မှာ နယ်စပ်ကုန်သွယ်ရေးကို မှီခိုနေရတဲ့ တံငါသည်တွေ အပါအဝင် လူ့အသိုက်အဝန်း အများကြီး ရှိပါတယ်။

မြေပြင်လက်တွေ့ အခြေအနေတွေကို လက်ခံလိုက်ရင် ဒီပြဿနာတွေကို ငြိမ်းငြိမ်းချမ်းချမ်း ဖြေရှင်းနိုင်ပါတယ်။ အဲဒီလို ဖြစ်လာပြီဆိုရင် ကျွန်တော်တို့ဘက်ကလည်း ကောင်းမွန်စွာ တုံ့ပြန်သွားမှာပါ။ တံငါသည်တွေကို ခွင့်ပြုပေးမှာ ဖြစ်သလို သူတို့ရဲ့ လှုပ်ရှားမှုတွေကိုလည်း စနစ်တကျ ထိန်းကျောင်းသွားမှာပါ။

မေး – ပါကစ္စတန်နဲ့ တူရကီနိုင်ငံတွေက ရိုဟင်ဂျာ ဒုက္ခသည်တွေနဲ့ လက်နက်ကိုင်အဖွဲ့တွေအပေါ် ဘာလို့ ပါဝင်ပတ်သက်နေတာလဲ။

ဖြေ – ဒါဟာ အတော်လေး စိုးရိမ်စရာကောင်းပြီး (ရိုဟင်ဂျာတွေကြားထဲမှာ) အစွန်းရောက်မှုတွေကို ပိုဆိုးစေတဲ့ အချက်တစ်ခုပါ။ ဒါဟာ ဘင်္ဂလားဒေ့ရှ်အတွက်ရော ကျွန်တော်တို့အတွက်ပါ မကောင်းပါဘူး။ BNP အစိုးရအနေနဲ့ မှန်ကန်တဲ့ မူဝါဒတွေနဲ့ အရေးယူမှုတွေကို စတင်လိမ့်မယ်လို့ ကျွန်တော်တို့ မျှော်လင့်ပါတယ်။ တစ်ခါတလေ မူဝါဒတွေက မှန်ပေမဲ့ အကောင်အထည်ဖော်တဲ့နေရာမှာ လွဲချော်သွားတာမျိုး ရှိတတ်ပါတယ်။

ပါကစ္စတန်အနေနဲ့ ရိုဟင်ဂျာ လက်နက်ကိုင်အဖွဲ့တွေကို သုံးပြီး အိန္ဒိယကို ပစ်မှတ်ထားလာနိုင်တာကြောင့် ကျွန်တော်တို့နဲ့ အိန္ဒိယကြားမှာ တူညီတဲ့ လုံခြုံရေး စိုးရိမ်ချက်တွေ ရှိပါတယ်။ ဒေသတွင်းက လက်နက်ကိုင် လှုပ်ရှားမှုတွေဟာ ပြန့်နှံ့သွားနိုင်ပြီး ဒေသတွင်း လုံခြုံရေးကို ခြိမ်းခြောက်လာနိုင်ပါတယ်။ ကျွန်တော်တို့ဟာ အိမ်နီးချင်းနိုင်ငံတွေနဲ့ ပူးပေါင်းဆောင်ရွက်ဖို့ အသင့်ပါပဲ။

မေး – အိန္ဒိယအစိုးရဆီကနေ ဘာတွေ မျှော်လင့်ထားလဲ။

ဖြေ – အိန္ဒိယဟာ ဒေသတွင်းမှာ အလွန်အရေးကြီးတဲ့ နိုင်ငံပါ။ အိန္ဒိယအနေနဲ့ ပိုပြီး ဖွံ့ဖြိုးတိုးတက်ပြီး အောင်မြင်တာကို ကျွန်တော်တို့ မြင်ချင်ပါတယ်။ အိန္ဒိယနဲ့ ပိုပြီး ပူးပေါင်းဆောင်ရွက်ဖို့ မျှော်လင့်ပါတယ်။ ကုလားတန်စီမံကိန်း (Kaladan Project) အတွက် ကျွန်တော်တို့ ကူညီဖို့ အသင့်ပါပဲ။

မေး – AA အနေနဲ့ စစ်ပွဲတွေ ရပ်တန့်ဖို့ တရုတ်နိုင်ငံဆီကနေ ပြင်းထန်တဲ့ ဖိအားတွေ ကြုံနေရပါတယ်။ ခင်ဗျားတို့ ဘယ်လို တုံ့ပြန်ထားလဲ။

ဖြေ – ဒါကို ဖိအားလို့ မဆိုလိုပါဘူး၊ တရုတ်က မြန်မာနိုင်ငံကို တည်ငြိမ်တာ မြင်ချင်တာပါ။ တချို့ကတော့ ဒါကို ဖိအားလို့ ပြောကြပါလိမ့်မယ်။ တရုတ်အနေနဲ့ သူတို့ရဲ့ အကျိုးစီးပွားကို ကာကွယ်ဖို့ အစွမ်းကုန် လုပ်ဆောင်ရမှာပါပဲ၊ ဒါဟာ နိုင်ငံတိုင်း လုပ်ဆောင်ကြတဲ့ အရာပါ။

မေး – AA ရဲ့ လူ့အခွင့်အရေး ချိုးဖောက်မှုတွေနဲ့ ပတ်သက်ပြီး ရိုဟင်ဂျာ၊ ခူမီးနဲ့ ချင်းအဖွဲ့တွေဆီကနေ အတင်း အဓမ္မ စစ်သားစုဆောင်းတယ်ဆိုတဲ့ စွပ်စွဲချက်တွေ မကြာခဏ ထွက်ပေါ်နေပါတယ်။ ဒါနဲ့ ပတ်သက်ပြီး ဘာပြောချင်လဲ။

ဖြေ – တချို့လူတွေက လူ့အခွင့်အရေးဥပဒေတွေကို လက်နက်တစ်ခုလို အသုံးချနေကြတာပါ။ ဒီစွပ်စွဲချက်တွေရဲ့ အရင်းအမြစ်ကို ကြည့်ရင် အထူးသဖြင့် ပြည်ပရောက် တက်ကြွလှုပ်ရှားသူတွေဆီက လာတာကို တွေ့ရပါလိမ့်မယ်၊ ဘာလို့လဲဆိုတော့ ဒီလို ပုံဖော်ပြောဆိုခြင်းအားဖြင့် သူတို့က အကျိုးအမြတ် ရနေလို့ပါ။

ချင်းလူ့အခွင့်အရေး တက်ကြွလှုပ်ရှားသူတွေဟာ ချင်းလူ့အသိုက်အဝန်း တစ်ခုလုံးကို ကိုယ်စားမပြုပါဘူး။ ကျွန်တော်တို့ဟာ ချင်းပြည်နယ်က ချင်းလူ့အသိုက်အဝန်း အများစုနဲ့ အဆင်ပြေပြေ ရှိနေပါတယ်။ ကျွန်တော်တို့ အချင်းချင်း ကူညီနေကြပြီး ရှေ့လျှောက်မှာ မွတ်စလင် (ရိုဟင်ဂျာ) လူ့အသိုက်အဝန်းနဲ့ပါ ပိုပြီး ပူးပေါင်းဆောင်ရွက်မှုတွေ ရှိလာမှာပါ။ ကျွန်တော်တို့ဟာ ယုံကြည်မှု တည်ဆောက်နေတာပါ၊ ဒါဟာ အချိန်ယူရပါမယ်။ အရင်အစိုးရရဲ့ မှားယွင်းတဲ့ မူဝါဒတွေကြောင့် စွပ်စွဲချက်တွေ ရှိခဲ့တာပါ။ အတင်းအဓမ္မ စစ်သားစုဆောင်းမှုနဲ့ ပတ်သက်ရင် ရခိုင်ပြည်နယ်မှာ စစ်ပွဲတွေ ဖြစ်နေတာကြောင့် အရေးပေါ် အစီအမံတွေ လိုအပ်ပါတယ်။

လူသစ်စုဆောင်းတဲ့နေရာမှာ ကျွန်တော်တို့ အလွန်သတိထားပါတယ်၊ စုဆောင်းခံရသူတိုင်းကို သူတို့ရဲ့ တာဝန်နဲ့ ဝတ္တရားတွေကို သေချာရှင်းပြပါတယ်။

မေး – AA အနေနဲ့ မူးယစ်ဆေးဝါး ကုန်သွယ်မှုမှာ ပါဝင်ခြင်းမရှိဘူးလို့ ရှင်းလင်းထားပါတယ်။ ဒါပေမဲ့ ရခိုင်မှာ ရှိနေစဉ်အတွင်း ကျွန်တော် သိရသလောက်ကတော့ ဘင်္ဂလားဒေ့ရှ်နဲ့ မြန်မာပြည်မထဲကနေ မူးယစ်ဆေးဝါးတွေ စီးဝင်နေတဲ့ အန္တရာယ် ရှိနေပါတယ်။ လွန်ခဲ့တဲ့ ၃ ရက်ကပဲ မောင်တောက လူတစ်ယောက်ကို အိန္ဒိယနိုင်ငံ မီဇိုရမ်ပြည်နယ်မှာ မူးယစ်ဆေး အများအပြားနဲ့ ဖမ်းမိခဲ့ပါတယ်။ ဒါဟာ ရခိုင်အတွက် စိန်ခေါ်မှုတစ်ခုလို့ မမြင်ဘူးလား။

ဖြေ – ဒါဟာ ရှုပ်ထွေးတဲ့ အခြေအနေပါ။ ရခိုင်ပြည်နယ်မှာ မူးယစ်ဆေးဝါး ပြဿနာဟာ စစ်တပ်အုပ်ချုပ်စဉ်ကထက် အများကြီး လျော့နည်းသွားပါပြီ။ ပြည်မထဲက လာတဲ့ လမ်းကြောင်း အများကြီးကို ပိတ်ထားပါတယ်။ စစ်ဆေးရေးဂိတ်တွေလည်း အများကြီး ရှိပါတယ်။

(မြန်မာနိုင်ငံမှာ) မူးယစ်ဆေး ထုတ်လုပ်မှုဟာ စက်မှုလုပ်ငန်းအဆင့်အထိ ရှိနေပါတယ်။ ပြီးခဲ့တဲ့လကပဲ အကြီးမားဆုံး ဖမ်းဆီးရမိမှုဟာ ရှမ်းပြည်နယ်မှာ ဖြစ်ခဲ့တာပါ။ စစ်ကောင်စီက အဓိပ္ပာယ်မရှိတဲ့ စွပ်စွဲချက်တွေ လုပ်ခဲ့ပါတယ်။ စက်ရုံဝင်း တစ်ခုလုံးကို သိမ်းဆည်းခဲ့တာပါ။ သူတို့ဟာ ဒီစက်ရုံ ရှိနေတာကို အကြာကြီးကတည်းက သိထားကြတာပါ။

ရခိုင်ပြည်နယ်မှာ မူးယစ်ဆေးပြဿနာ လုံးဝ ပျောက်ကွယ်သွားပြီလို့တော့ ကျွန်တော်တို့ မပြောနိုင်ပါဘူး။ ဆေးစွဲနေသူတွေနဲ့ ကုန်သည်တွေ ရှိနေပါသေးတယ်။ ငါးဖမ်းလှေတွေ သွားလာနေကြပြီး သူတို့ ဘာတွေ သယ်နေလဲဆိုတာ ကျွန်တော်တို့ မသိနိုင်ပါဘူး။ ရန်ကုန်ကနေ ဘင်္ဂလားဒေ့ရှ်က ကော့ဘဇားနဲ့ စစ်တကောင်းကို သွားနေတဲ့ သင်္ဘောတွေ ရှိပါတယ်။ ဒီပြဿနာကို အမြစ်ပြတ်အောင် လုပ်ဖို့ အချိန်ယူရပါလိမ့်မယ်။

မေး – လွန်ခဲ့တဲ့ ရက်ပိုင်းအတွင်းမှာ မြန်မာ-ဘင်္ဂလားဒေ့ရှ် နယ်စပ်က ရွာတချို့ကို သွားခဲ့ပါတယ်။ ရိုဟင်ဂျာမဟုတ် တဲ့ ရွာတွေနဲ့ ရိုဟင်ဂျာရွာတချို့ဟာ ARSA ကို အမြဲတမ်း ကြောက်နေရပါတယ်။ ခင်ဗျားတို့ အစိုးရအနေနဲ့ ဒီနေရာတွေကို အခိုင်အမာ မထိန်းချုပ်နိုင်သေးဘူးလား။

ဖြေ – ဒါက မလွယ်ပါဘူး။ ကျွန်တော်တို့ဟာ ဒီဒေသက ဝေးလံတဲ့ ရွာတွေ၊ အထူးသဖြင့် မြို (Mro) လူမျိုးတွေ နေထိုင်တဲ့ ရွာတွေကို အကူအညီတွေ ပေးနေပါတယ်။ သူတို့ထဲက တချို့က မူးယစ်ဆေးဝါး ကုန်သွယ်မှုမှာ ပါဝင်နေပါတယ်။ သူတို့ထဲက တချို့ဟာ ARSA နဲ့ လက်တွဲနေတယ်ဆိုတဲ့ အစီရင်ခံစာတွေလည်း ကျွန်တော်တို့ ရထားပါတယ်။ အချင်းချင်း တိုက်ခိုက်မှုတွေကြောင့် လူအများအပြား သေဆုံးခဲ့ရတာဟာ အံ့ဩစရာ မဟုတ်ပါဘူး။

မောင်တောကို မလွတ်မြောက်ခင်တုန်းက စစ်တပ်နဲ့ ဒီးလ်မိုဟာမက် (Dil Mohammad) လို မူးယစ်ရာဇာတွေဟာ မူးယစ်ဆေး ကုန်သွယ်မှုမှာ အလွန်တက်ကြွခဲ့ကြပါတယ်။ အခုတော့ ကျွန်တော်တို့ဟာ အဲဒီဒေသမှာ နေထိုင်သူတွေအတွက် လုံခြုံရေး ပိုကောင်းလာအောင် အာရုံစိုက် လုပ်ဆောင်နေပါတယ်။

မေး – ဆရာဝန်နဲ့ ဆေးဝါး ပြတ်လပ်မှုတွေလည်း အပြင်းအထန် ရှိနေပါတယ်။ စစ်ဘေးရှောင် (IDP) တွေရဲ့ အခြေအနေကလည်း စိတ်မကောင်းစရာပါ။

ဖြေ – ကျွန်တော်တို့ ဒီပြဿနာတွေကို ဖြေရှင်းနေပြီး ကျန်းမာရေး ဝန်ဆောင်မှုတွေ ပိုကောင်းလာအောင် ကြိုးစားနေပါတယ်။ ပစ္စည်းကိရိယာတွေ ပိုရအောင်၊ ဆေးဝါးတွေ အဆက်မပြတ် စီးဝင်လာအောင်နဲ့ ဆရာဝန်တွေ၊ ကျန်းမာရေး ဝန်ထမ်းတွေ ပိုပြီး ခန့်အပ်နိုင်အောင် လုပ်ဆောင်နေပါတယ်။

ကျွန်တော်တို့ ရခိုင်ပြည်နယ်မှာ ဆေးတက္ကသိုလ်နဲ့ သူနာပြု အကယ်ဒမီ ဖွင့်ဖို့ ဆုံးဖြတ်ထားပြီး ဒါဟာ အလွန်စိတ်လှုပ်ရှားစရာ ကောင်းပါတယ်။ ဒီနှစ်မှာ သူနာပြု ၁၂၀ ကို သင်တန်းပေးဖို့ စီစဉ်ထားပါတယ်။ လက်ရှိမှာ ကျွန်တော်တို့ဆီမှာ ဆရာဝန် ၅၀-၆၀ လောက် ရှိနေပြီး မကြာခင်မှာ ပိုများလာဖို့ မျှော်လင့်ပါတယ်။ ဆရာဝန်နဲ့ သူနာပြုတွေရဲ့ နောက်ခံနဲ့ လူမျိုးစုကို ကျွန်တော်တို့ ဂရုမစိုက်ပါဘူး။ အိန္ဒိယဆရာဝန်တွေ အပါအဝင် ဘယ်သူမဆို လာရောက်ကူညီတာကို ကြိုဆိုပါတယ်။

မေး – နွေဦးတော်လှန်ရေးအပေါ် ဘာတွေ မျှော်လင့်ထားလဲ။

ဖြေ – AA တစ်ခုတည်းရဲ့ မျှော်လင့်ချက်က နွေဦးတော်လှန်ရေးရဲ့ ရလဒ်ကို ဆုံးဖြတ်ဖို့ မလုံလောက်ပါဘူး။ ဗမာပြည်မက ပြည်သူတွေ၊ သူတို့ရဲ့ ပြဿနာတွေနဲ့ ဒေသတွင်း အခြေအနေတွေကိုပါ ထည့်သွင်းစဉ်းစားရပါမယ်။ သူတို့ရဲ့ အခြေအနေတွေကို ကျွန်တော်တို့ အပြည့်အဝ လေးစားပါတယ်။ ကျွန်တော်တို့ သူတို့နဲ့ ရင်းနှီးတဲ့ ဆက်ဆံရေး ရှိသလို စိတ်တူကိုယ်တူ အဖွဲ့အစည်းတွေကိုလည်း ကူညီပေးထားပါတယ်။

မေး – နောက် ၂ နှစ်အတွင်း ရခိုင်ပြည်နယ်ရဲ့ အခြေအနေကို ဘယ်လို မြင်လဲ။

ဖြေ – ပြည်သူတွေရဲ့ ဆင်းရဲဒုက္ခတွေကို အမြန်ဆုံး အဆုံးသတ်စေချင်ပြီး ရေရှည်တည်တံ့တဲ့ အဖြေတစ်ခုကို ရှာချင်ပါတယ်။ မြန်မာပြည်သူတွေရဲ့ မျှော်လင့်ချက်တွေ ပြည့်ဝဖို့အတွက် အဆိုးဆုံး အခြေအနေတွေအထိ ကျွန်တော်တို့ ပြင်ဆင်ထားရပါမယ်။

The post “မြန်မာပြည်သူတွေရဲ့ မျှော်လင့်ချက်တွေ ပြည့်ဝဖို့အတွက် အဆိုးဆုံး အခြေအနေတွေအထိ ကျွန်တော်တို့ ပြင်ဆင်ထားရပါမယ်” appeared first on Khit Thit Media.

ချင်းပြည်သူ့တပ်မတော်က AA ၏ ဖိတ်ကြားမှုဖြင့် ရခိုင်ဒေသသို့ သွားရောက်ခဲ့ပြီး ဗိုလ်ချုပ်ထွန်းမြတ်နိုင် အပါအဝင် AA ခေါင်းဆောင်များနှင့် နွေဦးတော်လှန်ရေး ဖြစ်ပေါ်တိုးတက်မှုများ ဆွေးနွေးခဲ့ကြောင်း ချင်းပြည်သူ့အစည်းအရုံး/ချင်းပြည်သူ့တပ်မတော်က သတင်းထုတ်ပြန်သည်။

၂၀၂၆ ခုနှစ် ဖေဖော်ဝါရီလတွင် ရက္ခိုင်အမျိုးသားအဖွဲ့ချုပ်၏ ဖိတ်ကြားမှုဖြင့် ချင်းပြည်သူ့အစည်းအရုံး ဗဟိုအလုပ်အမှုဆောင် ကော်မတီဝင်များသည် အာရက္ခဒေသသို့ သွားရောက်ခဲ့ပြီး ရက္ခိုင်အမျိုးသားအဖွဲ့ချုပ်/အာရက္ခတပ်တော် ခေါင်းဆောင်များနှင့် တွေ့ဆုံခဲ့ကြကြောင်း၊ အဆိုပါ တွေ့ဆုံဆွေးနွေးမှုတွင် လက်ရှိနွေဦးတော်လှန်ရေး၏ ဖြစ်ပေါ်တိုးတက်မှု အခြေအနေများနှင့် စပ်လျဉ်း ၍သော် လည်း ကောင်း၊ ချင်းပြည်သူလူထုနှင့် အာရက္ခပြည်သူများ အကြား အိမ်နီးချင်းကောင်းများပီသစွာ ရေရှည် အပြန်အလှန်အကျိုးပြုရေးတို့အတွက် ဆွေးနွေးတိုင်ပင်ခဲ့ပြီး ရှေ့ဆက်ပူးတွဲလုပ်ဆောင်မည့် လုပ် ငန်းစဉ်များကိုလည်း ချမှတ် နိုင်ခဲ့ကြောင်း သိရှိရသည်။

ရက္ခိုင်အမျိုးသားအဖွဲ့ချုပ်က ချင်းပြည်သူ့အစည်းအရုံး၏ ဗဟိုအလုပ်အမှုဆောင်ကော်မတီဝင်များကို နွေးထွေးလှိုက်လှဲစွာ ကြိုဆိုဧည့်ခံခဲ့ကြပြီး အာရက္ခဒေသတွင်းရှိ အထင်ကရနေရာများကိုလည်း လိုက်လံပြသပို့ဆောင်ပေးခဲ့ကြကြောင်း၊ အဆိုပါခရီးစဉ်သည် ရက်သတ္တပတ် ၂ ပတ်ခန့် ကြာမြင့်ခဲ့ပြီး ချင်းပြည်သူ့အစည်းရုံး/ ချင်းပြည်သူ့တပ်မတော်အတွက် လေ့လာသင်ယူစရာများနှင့်တကွ အလွန် တရာ အကျိုးရှိ သော ခရီးစဉ်ဖြစ်ခဲ့ကြောင်း ချင်းပြည်သူ့အစည်းအရုံး/ချင်းပြည်သူ့တပ်မတော် ထုတ်ပြန်ထားသည်။

The post ချင်းပြည်သူ့တပ်မတော်က AA ၏ ဖိတ်ကြားမှုဖြင့် ရခိုင်ဒေသသို့ သွားရောက်ခဲ့ပြီး ဗိုလ်ချုပ်ထွန်းမြတ်နိုင် အပါအဝင် AA ခေါင်းဆောင်များနှင့် နွေဦးတော်လှန်ရေး ဖြစ်ပေါ်တိုးတက်မှုများ ဆွေးနွေး appeared first on Khit Thit Media.

ဘင်္ဂလားဒေ့ရှ်အစိုးရက ရခိုင်နှင့်ဘင်္ဂလားဒေ့ရှ်နယ်စပ်ရှိ တက်ကနက်ဆိပ်ကမ်းပြန်လည် ဖွင့်လှစ်ပြီး မြန်မာနိုင်ငံနှင့် ကုန် သွယ်မည်ဟု ကြေညာသော်လည်း ရခိုင်ဒေသကို AA ကသာ ထိန်းချုပ်ထား၍ ကုန် သွယ်ရေးမစနိုင်သေးကြောင်းဘင်္ဂလားဒေ့ရှ်မှ လာသော သတငးများအရ သိရှိရသည်။

ရခိုင်ပြည်နယ်အတွင်း ဖြစ်ပွားနေသော လုံခြုံရေးအခြေအနေနှင့် မရေရာမှုများကြောင့် ၁ နှစ်နီးပါး ရပ်တန့်နေခဲ့သည့် တက်ကနက် (Teknaf) ကုန်းတွဲဆိပ်ကမ်းကို ဘင်္ဂလားဒေ့ရှ်အစိုးရက ဧပြီလဆန်းပိုင်းတွင် ပြန်လည်လည်ပတ်ရန် ကြေညာခဲ့သော်လည်း လက်တွေ့တွင် ကုန်သွယ်ရေးများလုံး၀ မစတင်နိုင်သေးကြောင်း သိရှိရသည်။

ဘင်္ဂလားဒေ့ရှ် ရေကြောင်းပို့ဆောင်ရေးဝန်ကြီး ရာဇစ်အာဆန် (Razib Ahsan) က ဧပြီလ ၆ ရက်နေ့တွင် ဆိပ်ကမ်းသို့ သွားရောက်စဉ် “ဆိပ်ကမ်းအာဏာပိုင်၊ အကောက်ခွန်၊ ကမ်းခြေစောင့်တပ်၊ BGB နယ်ခြားစောင့်တပ်နှင့် လုံခြုံရေးတပ်ဖွဲ့များ ပူးပေါင်းညှိနှိုင်းပြီး ယနေ့မှစ၍ လုပ်ငန်းများ ပြန်လည်စတင်ရန် ဆုံးဖြတ်လိုက်ပြီ” ဟု ပြောကြားသည်။

သို့သော် လက်တွေ့တွင်မူ ကုန်သွယ်မှုလုပ်ငန်းများ စတင်နိုင်ခြင်း မရှိသေးကြောင်း ဆိပ်ကမ်းအရာရှိများက ဆိုသည်။

Cox’s Bazar ကုန်သည်ကြီးများအသင်း (CBCCI) ဥက္ကဋ္ဌဟောင်း အဘူမာရှက် ချောင်ဒရီခိုကာ (Abu Morshed Chowdhury Khoka) က ဆိပ်ကမ်းပြန်ဖွင့်ခြင်းကို ကြိုဆိုသော်လည်း နတ်မြစ်ကြောင်းတစ်လျှောက် လုံခြုံရေးနှင့် ရခိုင်ပြည်နယ်အတွင်း တိုက်ပွဲများကြောင့် နယ်စပ်ကုန်သွယ်ရေးမှာ ရပ်တန့်နေဆဲဖြစ်ကြောင်း ထောက်ပြခဲ့သည်။

တက်ကနက်ဆိပ်ကမ်း C&F ကိုယ်စားလှယ်များအသင်း ဥက္ကဋ္ဌ အီတက်ရှာမူဟက် ဘဟာဒူး (Ehteshamul Haque Bahadur) က ဘင်္ဂလားဒေ့ရှ်နှင့် မြန်မာအကြား ကုန်သွယ်ရေးသဘောတူညီချက် ရှိသော်လည်း လက်တွေ့တွင် သွင်းကုန်လုပ်ငန်းများမှာ အချိန်အတော်ကြာ တုံ့ဆိုင်းနေဆဲဖြစ်သည်ဟု ဆိုသည်။

ဆိပ်ကမ်းပြန်ဖွင့်လျှင်ပင် စာရွက်စာတမ်းများ၊ ငွေကြေးအခြေချမှုများ၊ LC ခွင့်ပြုချက်နှင့် ဒေါ်လာအရောင်းအဝယ်များကို ပြန်လည်ပြင်ဆင်ရဦးမည် ဖြစ်သဖြင့် ကုန်စည်များ ချက်ချင်းရောက်ရှိလာနိုင်ဦးမည် မဟုတ်ဟု သူက ဆက်လက်ပြောဆိုသည်။

ဘင်္ဂလားဒေ့ရှ် ကုန်သည်များအနေဖြင့် အာရက္ခတပ်တော် (AA) နှင့် တိုက်ရိုက်ဖြစ်စေ၊ သွယ်ဝိုက်၍ဖြစ်စေ ဆွေးနွေးမှုပြုလုပ်ရန် အစီအစဉ်မရှိဟု ပြောဆိုကြပြီး အဆိုပါကိစ္စမှာ နိုင်ငံတော်အဆင့် ကိစ္စရပ်သာဖြစ်ကြောင်း ၎င်းက ရှင်းလင်းပြောကြားခဲ့သည်။

ဘင်္ဂလားဒေ့ရှ်-မြန်မာ နယ်စပ်ကုန်သွယ်ရေးသည် ၁၉၉၅ ခုနှစ်တွင် စတင်ခဲ့ပြီး ၂၀၀၃ ခုနှစ်တွင် တက်ကနက်ဆိပ်ကမ်းကို တရားဝင်ဖွင့်လှစ်ခဲ့ခြင်းဖြစ်သည်။ သို့သော် ၂၀၂၄ ခုနှစ် ဒီဇင်ဘာလမှစ၍ ရခိုင်ပြည်နယ်အများစုနှင့် ဘင်္ဂလားဒေ့ရှ်နယ်စပ် ၂၇၁ ကီလိုမီတာတစ်လျှောက်ကို အာရက္ခတပ်တော် (AA) က ထိန်းချုပ်လိုက်ပြီးနောက် ကုန်သွယ်ရေး ရပ်တန့်သွားခဲ့သည်။

လတ်တလော နတ်မြစ်ကြောင်းကို လက်နက်ကိုင်တပ်ဖွဲ့များ က စိုးမိုးထားပြီး ကုန်တင်သင်္ဘောများကို တားဆီးကာ ငွေကြေးတောင်းခံမှုများ ရှိနေကြောင်း ကုန်သည်များက ဆိုသည်။ ၂၀၂၅ ခုနှစ် ဧပြီလ ၁၃ ရက်နေ့တွင် နောက်ဆုံးသစ်တင်သင်္ဘော ရောက်ရှိခဲ့ပြီးနောက်ပိုင်း သွင်းကုန်လုပ်ငန်းများ လုံးဝရပ်တန့်သွားခဲ့သည်။

CBCCI ဒါရိုက်တာဟောင်း ဆာဂါ (Abed Ahsan Sagar) က ဆိပ်ကမ်းပြန်ဖွင့်ရုံဖြင့် ပြဿနာမပြေလည်နိုင်ဘဲ မြန်မာ့ရေပိုင်နက်ကို ရှောင်ကွင်းနိုင်မည့် လမ်းကြောင်းအသစ်များကို ဘင်္ဂလားဒေ့ရှ်ဘက်ခြမ်းတွင် တူးဖော်ဖန်တီးသင့်ကြောင်း အကြံပြုထားသည်။

ထို့ပြင် မြန်မာကုန်သည်များထံတွင် ဘင်္ဂလားဒေ့ရှ်ကုန်သည်များ၏ ငွေကြေး ဒေါ်လာ ၉ သန်းခန့် ပိတ်မိနေပြီး ကုန်သွယ်မှုပြန်စမှသာ အဆိုပါငွေကြေးများကို ပြန်လည်ညှိနှိုင်းနိုင်မည်ဖြစ်သည်။

ဘင်္ဂလားဒေ့ရှ် အစိုးရက ဆိပ်ကမ်းကို နည်းပညာအရ ဖွင့်လှစ်ထားပြီဟု ဆိုသော်လည်း နယ်စပ်လုံခြုံရေးနှင့် မြန်မာနိုင်ငံဘက်က တိုက်ပွဲများကြောင့် ကုန်စည်များ လက်တွေ့စီးဆင်းရန်မှာ အချိန်ယူရဦးမည့် အနေအထား ဖြစ်သည်ဟု သတင်းများက ဆိုသည်။

The post ဘင်္ဂလားဒေ့ရှ်အစိုးရက တက်ကနက်ဆိပ်ကမ်းပြန်လည် ဖွင့်လှစ်ပြီး မြန်မာနိုင်ငံနှင့် ကုန်သွယ်မည်ဟု ကြေညာသော်လည်း ရခိုင်ဒေသကို AA ကသာ ထိန်းချုပ်ထား၍ ကုန်သွယ်ရေးမစနိုင်သေး appeared first on Khit Thit Media.

အကြမ်းဖက်စစ်တပ်က ၂၀၂၁ ခုနှစ်တွင် စစ်အာဏာသိမ်းလိုက်ခြင်းက တိုင်းရင်းသားလက်နက်ကိုင်များအတွက် အခွင့်အရေးဖြစ်ခဲ့ပြီး အားလုံးမျှော်မှန်းချက်ရရှိရေး ဆက်လက်ကြိုးစားကြရန် အာရက္ခတပ်တော်-AA ဒုတိယစစ်ဦးစီးချုပ် ဒေါက်တာ ညိုထွန်းအောင်က တိုက်တွန်းပြောဆိုလိုက်သည်။

ယနေ့ ဧပြီလ ၁၃ ရက်နေ့တွင် ပြုလုပ်သော ICNCC ကြားကာလ ချင်းအမျိုးသားအတိုင် ပင်ခံကောင်စီ တည်ထောင်ခြင်း ၅ နှစ်ပြည့်အခမ်းအနားတွင် ၎င်းက အထက်ပါအတိုင်း တိုက်တွန်းလိုက်ခြင်း ဖြစ်သည်။

၂၀၂၁ ခုနှစ်၊ ဖေဖော်ဝါရီလ ၁ ရက်နေ့တွင် စစ်တပ်က တိုင်းပြည်အာဏာကို မတရားသိမ်း ယူလိုက် ခြင်းသည် AA အပါအဝင် တိုင်းရင်းသားတော်လှန်ရေးအဖွဲ့အစည်းများအတွက် အခွင့်အရေးဖြစ်ခဲ့ပြီး ရရှိလာသည့်အခွင့်အရေးကို အကောင်းဆုံးအသုံးချနိုင်ခဲ့သဖြင့် အတိုင်းအတာတစ်ခုအထိ အောင်မြင် ရရှိထားကြောင်း ဒေါက်တာညိုထွန်းအောင်က ပြောကြားသည်။

“လွန်ခဲ့တဲ့ ၁ နှစ် ၂ နှစ်မှာတော့ ကျနော်တို့က ရှမ်းမြောက် စစ်ဆင်ရေးအပါအဝင်ကိုယ့်ဒေသမှာတိုင်း ရင်းသားလက်နက်အဖွဲ့တွေကတော့ ထိုးစစ်ကြီးတွေ လုပ်ခဲ့ကြတဲ့အတွက်ကြောင့် ဒါဟာလည်း နွေဦး တော်လှန်ရေးနဲ့အတူ ပေါ်လာတဲ့ အခွင့်အရေးကို ကျနော်တို့ ERO တွေက အမိအရနဲ့ အခွင့် အရေးကို ရယူနိုင်ခဲ့တဲ့အတွက်ကြောင့် တော်လှန်ရေးအောင်ပွဲ အသီးအပွင့်တွေကို တစ်ဖွဲ့ချင်း သာမကသူနဲ့ သက်ဆိုင်တဲ့ ဆက်စပ်တဲ့လူတွေ အားလုံးလည်း သူ့အတိုင်းအတာနဲ့သူ အောင်မြင်မှု ရရှိခဲ့ပါတယ်။ ဒီ အောင်မြင်မှုတွေအပြင် အားလုံးမျှော်မှန်းထားတဲ့ မျှော်မှန်းချက်တွေ ရောက်ဖို့ကတော့ ကျနော်တို့ ဆက်လက်ကြိုးစား ရပါဦးမယ်” ဟု ဒေါက်တာ ညိုထွန်းအောင်က ပြောကြားသည်။

လက်ရှိအချိန်သည် နွေဦးတော်လှန်ရေး ၅ နှစ်တာကာလ ပြည့်မြောက်ခဲ့ပြီဖြစ်ပြီး တော် လှန်ရေးအဖွဲ့ အ စည်းများအနေဖြင့် နာမည်မတူကြသော်လည်းတော်လှန်ရေးဟူသည့်ခေါင်း စဉ်တစ်ခုတည်း အောက်တွင် ရည်မှန်းချက်တူ ၊ ဘုံရန်သူကို တိုက်ခိုက်နေခြင်းဖြစ်ကြောင်း၊ ထို့ကြောင့် မဟာမိတ် အဖွဲ့အစည်း အချင်းချင်းကြား၊ အဖွဲ့အစည်းခေါင်း ဆောင်များအကြားတွင် ယုံကြည်မှု၊ တန်ဖိုးထားမှု၊ ညီအစ်ကိုစိတ်ဓာတ်ရှိမှုသည် အရေး ကြီးကြောင်း အသိပေးထားသည်။

“နွေဦးတော်လှန်ရေးမှာ ပေါ်လာတဲ့ အဖွဲ့အစည်းတွေကတော့ များပါတယ်။ သူတို့မှာ အားသာချက် တွေအများကြီးရှိသလို အားနည်းချက်တွေလည်း ရှိနေကြတုန်းပါ။ အားသာချက်တွေကိုတော့ ကျ နော့် အနေနဲ့ အများကြီး မလိုပြောပေမယ့် အခုနက ပြောတဲ့ အားနည်း ချက်တွေကို အချိန်တိုတိုလေး မှာ အချိန်မီ ပြုပြင်နိုင်ဖို့ လိုပါတယ်။ ဘာလို့လဲဆိုတော့ လက်ရှိ ကျနော်တို့ရနေတဲ့ အခွင့်အရေးဟာ နောက်ထပ် ဘယ်လောက် ဆက်ပြီးမှ ရနိုင်မလဲ။ ဘုံရန်သူဘက်က သူတို့အနေနဲ့ ကျနော်တို့ ရရှိထား တဲ့ အခွင့်အရေးကို ဆက်လို့ မပေးဖို့အတွက် ကြိုးစားနေတဲ့ဟာမျိုးကိုလည်း အားလုံးသိပြီး ဖြစ်ပါ တယ်။ ဆိုတော့ လက်ရှိရနေတဲ့ အခွင့်အရေးဟာ နည်းသမျှနည်းလာတဲ့အတွက်ကြောင့် ရတဲ့အချိန် ကာလလေးမှာ ကျနော်တို့ဟာ အင်တိုက်အားတိုက်နဲ့ နေ့မအား၊ ညမအား အဆတိုးပြီးတော့မှပဲ ကြိုး စားပြီးမှ ကိုယ့်ရဲ့အားနည်းချက်တွေကို အချိန်မီ ပြုပြင်နိုင်ဖို့အတွက် ခွန်အားအပြည့်နဲ့ ကြိုးစားကြ ပါလို့ ပြောလိုပါတယ်” ဟု ဒေါက်တာညိုထွန်းအောင်က ပြောဆိုသည်။

ကြားကာလ ချင်းအမျိုးသားအတိုင်ပင်ခံကောင်စီ ICNCC အပါအဝင် ချင်းတော်လှန်ရေးအဖွဲ့ အစည်း များအနေဖြင့်လည်း စုဖွဲ့မှုများကို ပိုပြီးကျစ်ကျစ်လစ်လစ်၊ စုစုစည်းစည်းနှင့် ယုံကြည်ချက်အပြည့်၊ အားမာန်အပြည့်၊ ခွန်အားအပြည့်၊ လုံ့လဝီရိယအပြည့်ဖြင့် အလုပ်လုပ်မည်ဆိုပါက ပြင်းထန်သည့် တော်လှန်ရေး သန္နိဌာန်များကို မည်သူကမှ တားဆီး၍ မရနိုင်ကြောင်း သတိပေးထားသည်။

ထို့ကြောင့် လုပ်သင့်လုပ်ထိုက်သည့်ရာများကို လုပ်သင့်လုပ်ထိုက်သည့်အချိန်တွင် တော် လှန်ရေး အင် အားစုများ အားလုံး ဝိုင်းပြီးလုပ်၍ ရသော အရာများကို ဝိုင်းလုပ်ကြသလို တစ်ဦးတစ်ယောက် ချင်း၊ အဖွဲ့အစည်းတစ်ခုချင်းစီ လုပ်၍ရသည့် အရာများကို ဆက်လုပ်ဆောင်ကြရန် ဒေါက်တာညိုထွန်း အောင်က ဆက်လက်တိုက်တွန်းထားသည်။

The post စစ်အာဏာသိမ်းလိုက်ခြင်းက တိုင်းရင်းသားလက်နက်ကိုင်များအတွက် အခွင့်အရေးဖြစ်ခဲ့ပြီး အားလုံးမျှော်မှန်းချက်ရရှိရေး ဆက်ကြိုးစားကြရန် AA ဒုစစ်ဦးစီးချုပ် ဒေါက်တာ ညိုထွန်းအောင် တိုက်တွန်း appeared first on Khit Thit Media.