ရန်ကုန်၊ ဇန်နဝါရီ ၂၇
စစ်ကိုင်းတိုင်း၊ အင်းတော်မြို့နယ်တွင် အကြမ်းဖက်စစ်ကောင်စီ စစ်ကား အစီး ၃၀ ပါ ထောက်ပို့ယာဉ်တန်းကို ကချင်လွတ်လပ်ရေးတပ်မတော်နှင့် အင်းတော်မြို့နယ် ပြည်သူ့ကာကွယ်ရေးတပ်ဖွဲ့က ယနေ့ ဇန်နဝါရီလ ၂၇ ရက် နံနက် ၄ နာရီခန့်တွင် ၃ ကြိမ် မိုင်းဆွဲပြီး လက်နက်ကြီး လက်နက်ငယ်များဖြင့် ပစ်ခတ်တိုက်ခိုက်သဖြင့် စစ်ကောင်စီဘက်မှ သေဆုံးဒဏ်ရာရမှုများကြောင်း သတင်းရရှိသည်။
စစ်ကောင်စီ၏ ထောက်ပို့ယာဉ်တန်းကို KIA နှင့် PDF ပူးပေါင်းတပ်ဖွဲ့က အင်းတော်-မဲဇာကြားတွင် ၁ ကြိမ်၊ အင်းတော်-မော်လူးကြားတွင် ၂ ကြိမ် မိုင်းဆွဲတိုက်ခိုက်ကာ ကျည်ကုန်သည်အထိ ပစ်ခတ်တိုက်ခိုက်မှုကြောင့် စစ်ကောင်စီတပ်သား အများအပြား ထိခိုက်သေဆုံးကြောင်း၊ သေဆုံးဒဏ်ရာရ စစ်သားများကို ကားများဖြင့် ပြန်လည်တင်ဆောင်သွားကြောင်း အင်းတော်တော်လှန်ရေးအင်အားစုက သတင်းထုတ်ပြန်သည်။
အကြမ်းဖက်စစ်ကောင်စီက လက်နက်ကြီး၊ လက်နက်ငယ်များဖြင့် ပြန်လည်ပစ်ခတ်ခဲ့သော်လည်း KIA နှင့် PDF ပူးပေါင်းတပ်ဖွဲ့က အထိအခိုက်မရှိ ဆုတ်ခွာနိုင်ခဲ့ကြောင်း အင်းတော်တော်လှန်ရေးအင်အားစုထံမှ သိရှိရသည်။
ဓါတ်ပုံ – အင်းတော် PDF တပ်ဖွဲ့ဝင်များ
