ရန်ကုန်၊ မတ် ၂
မကွေးတိုင်း ပခုက္ကူခရိုင် ပေါက်မြို့နယ် အတွင်းရှိ လယ်ယာရွာကို အကြမ်းဖက် စစ်ကောင်စီ တပ်ဖွဲ့များက ယနေ့ မတ်လ ၂ရက်နေ့ ည ၉နာရီ ၃ဝမိနစ်ခန့်တွင် ဝင်ရောက် စီးနင်းခဲ့ပြီး ကျေးရွာအတွင်းရှိ ဘုန်းကြီးကျောင်းပါ မီးရှို့ဖျက်ဆီးနေကာ ရွာလုံးကျွတ်နီးပါး မီးလောင်ကျွမ်းနေကြောင်း ဒေသခံပြည်သူများထံမှ သိရသည်။
အဆိုပါ အကြမ်းဖက် စစ်ကောင်စီ တပ်ဖွဲ့များနှင့် ပေါက်တောင်ပိုင်း ပျောက်ကျားတပ်ဖွဲ့ SPGF တို့ ယနေ့ ညနေပိုင်းတွင် အပြန်အလှန် ပစ်ခတ်မှု ဖြစ်ပွားပြီးနောက် လယ်ယာရွာထဲတွင် တပ်စွဲထားသော စစ်ကောင်စီ တပ်ဖွဲ့များနှင့် ပျူစောထီး အဖွဲ့များက ရွာကို မီးရှို့ဖျက်ဆီးခြင်းဖြစ်ကြောင်း သိရသည်။
အကြမ်းဖက် စစ်ကောင်စီ တပ်ဖွဲ့များသည် ကျေးရွာအတွင်း၌ သေနတ်များ ပစ်ဖောက်နေပြီး ဖုန်းလိုင်း၊ အင်တာနက် လိုင်းများပါ ဖြတ်တောက်ခံထားရကာ ရွာလုံးကျွတ် ထွက်ပြေးတိမ်းရှောင်နေရပြီး ဖုန်းအဆက်အသွယ်နှင့် အင်တာနက်လိုင်းများ ဖြတ်တောက်ခံထားရခြင်းကြောင့် အခြေအနေ အသေးစိတ်ကို မသိရှိရသေးကြောင်း ဒေသခံပြည်သူများက ပြောဆိုသည်။
