ရန်ကုန်၊ မတ် ၁၉
ရန်ကုန်တိုင်း၊ ရွှေပြည်သာရဲစခန်းနှင့်မြို့နယ်ခန်းမကို ၄၀ မမ ဗုံးသီးလက်နက်ဖြင့် ပစ်ခတ်တိုက်ခိုက်ခဲ့ပြီး စစ်ကောင်စီကို အခွန်ပေးနေသည့် ရွှေပြည်သာမှ KTV တစ်ခုကိုလည်း ဗုံးခွဲတိုက်ခိုက်ခဲ့ကြောင်း သိရှိရသည်။
မတ်လ ၁၉ ရက်နေ့ ည ၇ နာရီအချိန် People’s Force နှင့် Spring Brother တို့ပူးပေါင်း၍ ရွှေပြည်သာမြို့နယ်ရဲစခန်းကို ၄၀ မမ ဗုံးသီးလက်နက် တစ်လုံးဖြင့် အယောင်ပြတိုက်ခိုက်ခဲ့ပြီး စစ်ကောင်စီတပ်များ စုပြုံလာနိုင်သော ရွှေပြည်သာမြို့နယ်ခန်းမရှိ စစ်ကားကြီး ၅ စီးနှင့် Double Cap ၂ စီးတို့ကို ၄၀ မမ ဗုံးသီး ၂ လုံးဖြင့် ထပ်မံ ပစ်ခတ်တိုက်ခိုက်ခဲ့ကြောင်း၊ အထူးလေ့ကျင်ထားသော မြို့ပြပျောက်ကြားအဖွဲ့များ ဖြင့်တိုက်ခိုက်ခြင်းဖြစ်ကြောင်း ဒေသကာကွယ်ရေးတပ်ဖွဲ့က သတင်းထုတ်ပြန်သည်။
ရန်ကုန်မြို့တွင် မြို့ပြပျောက်ကြားတပ်ဖွဲ့များက အရှိန်အဟုန်မြင့်တိုက်ခိုက်မည်ဖြစ်၍ ပြည်သူများအနေဖြင့် မလိုအပ်ဘဲ အပြင်မထွက်ကြရန်နှင့်ပေါက်ကွဲသံများကြားလျှင် မစူးစမ်းကြရန် တော်လှန်ရေးအဖွဲ့များက တိုက်တွန်းအသိပေးချက်များ ထုတ်ပြန်ထားသည်။