အုတ်ဖိုတွင် စစ်ကြောင်းထိုးနေသော စစ်တပ်က ရွာထဲပြန်လည်ဝင်ရောက်လာသော ကိုအေးကြီးနှင့် ကိုဖိုးဇော်ကို ပစ်သတ်၊ သောင်းနှင့်ချီသော ပြည်သူများ ဆက်လက် တိမ်းရှောင်နေရပြီး စားနပ်ရိက္ခာများ လိုအပ်နေ

ရန်ကုန်၊ မေ ၂၇

ပဲခူတိုင်း၊ အုတ်ဖိုမြို့နယ်တွင် စစ်ကြောင်းထိုးနေသော အကြမ်းဖက် စစ်တပ်က ရွာထဲ ပြန်လည်ဝင်ရောက်လာသော ကိုအေးကြီးနှင့် ကိုဖိုးဇော်ကို ပစ်သတ်ခဲ့ကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။

မေလ ၂၁ ရက်နေ့မှ စတင်ပြီး အင်အား ၃၀၀ ခန့်ပါ အကြမ်းဖက် စစ်တပ် စစ်ကြောင်းသည် အုတ်ဖိုမြို့နယ်၊ ကျေးပျက်ရွာနှင့် စံပြရွာတို့တွင် စခန်းချပြီး ကျေးရွာများကို ဒရုန်းဖြင့် မီးလောင်ဗုံးများ ကျဲချကာ လက်နက်ကြီး၊ လက်နက်ငယ်များဖြင့် ပစ်ခတ် တိုက်ခိုက်ခဲ့ကြောင်း၊ ထို့ကြောင့် ကြို့ကိုးပင်ရွာ ၊ မအူတန်းရွာ ၊ ကိုင်းကြီးရွာ နှင့် ရှားစေးဘို တို့ကို ကျရောက် ပေါက်ကွဲခဲ့ပြီး အသက် ၆၄ နှစ်အရွယ် ချောင်းခွရွာသား ဦးခင်လွင် ပြင်းထန် ဒဏ်ရာရရှိခဲ့ကြောင်း သိရှိရသည်။

ထိုအကြမ်းဖက် စစ်တပ် စစ်ကြောင်းနှင့် တော်လှန်ရေးတပ်ဖွဲ့များလည်း ထိတွေ့ တိုက်ပွဲများ ဆက်တိုက် ဖြစ်ပွားခဲ့ပြီး အကြမ်းဖက် စစ်တပ်က ကျေးရွာများဖြင့် တပ်စွဲကာ လက်နက်ကြီး၊ ဒရုန်းများဖြင့် နေ့စဉ် ပစ်ခတ် တိုက်ခိုက်နေကြောင်း၊ ယနေ့ မေလ ၂၇ ရက်နေ့တွင် အုတ်ဖိုမြို့နယ်၊ ကိုင်ကြီးကျေးရွာကို ပြန်လည်ဝင်ရောက်လာသော စစ်ဘေးရှောင်ပြည်သူ ၃ ဦးသည် အကြမ်းဖက် စစ်တပ်နှင့် ထိပ်တိုက်တွေ့ပြီး လိုက်လံပစ်ခတ်ခံရကြောင်း သိရသည်။

ထိုပစ်ခတ်မှု အတွင်း ကိုအေးကြီးနှင့် ကိုဖိုးဇော်တို့သည် နေရာတင် ပွဲချင်းပြီး သေဆုံးခဲ့ကြောင်း၊ ကျန်ရှိနေသော ကိုကြည်လှိုင်သည်လည်း သေနတ်ကျည် ထိမှန်ခဲ့ပြီး သေချင်ယောင်ဆောင်ကာ အလောင်းများကြားတွင် ဝပ်နေခဲ့သောကြောင့် ပြန်လည်လွတ်မြောက်လာခဲ့ကြောင်း၊ ယင်းဖြစ်စဉ်နှင့် ပတ်သက်ပြီး အကြမ်းဖက် စစ်တပ်က စစ်ဘေးရှောင် ပြည်သူများကို PDF တပ်က ပစ်သတ်ဖြတ်သည်ဟု လိမ်လည်ဝါဒဖြန့်ရန် ပြင်ဆင်နေကြောင်း သိရှိရသည်။

“ပြည်သူတွေက စစ်ကြောင်း ပြန်လှည့်သွားပြီအထင်နဲ့ ရွာထဲကို ပြန်လည်ဝင်ရောက်ကြည့်ရှု့နေတုန်း စစ်ခွေး ကင်းပုန်းနဲ့ ထိပ်တိုက်တိုးတာ ကိုအေးကြီး၊ ကိုဖိုးဇော်နဲ့ ကိုကြည်လှိုင်တို့ ၃ ဦးစလုံးကို စစ်ခွေးတွေက သေနတ်နဲ့ ပစ်ခတ်လို့ ကိုအေးကြီးနဲ့ ကိုဖိုးဇော်တို့ နေရာမှာတင် သေဆုံးတယ်။ ကိုကြည်လှိုင်ကတော့ သေနတ်ပစ်ခတ်ခံရတဲ့ ဒဏ်ရာနဲ့ သေချင်ယောင်ဆောင်ပြီး အလောင်းတွေ ကြားထဲ ဝပ်နေလို့ လွတ်မြောက်လာခဲ့တာ” ဟု ဒေသပြည်သူတစ်ဦးက ပြောဆိုသည်။

ယင်း အကြမ်းဖက် စစ်တပ် စစ်ကြောင်းကြောင့် ဒေါင်းကြီးရွာ၊ ဒေါင်းလေးရွာ၊ ကျေးပင်ဆိတ်ရွာ၊ မအူတန်းရွာ၊ ဝင်းသရက်ရွာ၊ သရက်နှစ်ပင်လိမ်ရွာ၊ ကိုင်းရှိုကြီးရွာ၊ သာလိကာရွာ၊ ချောင်းခွကြီးရွာ၊ ကျွဲတဲကုန်းရွာ၊ ကြိုးကြာကွင်းရွာ၊ စမ်းကြီးကုန်းရွာ၊ စံပြရွာ၊ ထွက်တိုးရွာ၊ ရေငံရွာ၊ စမ်းသုခရွာ၊ ကိုင်းတောစုရွာ၊ ကြို့ကိုးပင်ရွာ၊ ချင်းစုရွာ၊ ကျွဲဖြူမရွာ၊ ရွာရှောင်ရွာ၊ ကိုင်းကြီးရွာ၊ ကိုင်းလေးရွာ၊ တင်းကုတ်ရွာ၊ ဥတိုရွာ၊ ရေဒါရွာနှင့် ကျေးပြတ်ရွာတို့အပါအဝင် ရွာပေါင်း ၃၀ နီးပါးမှ သောင်းနှင့်ချီသောပြည်သူများ ဘေးလွတ်ရာ ထွက်ပြေးတိမ်းရှောင်နေရပြီး စားနပ်ရိက္ခာများလည်း လိုအပ်နေကြောင်း သိရသည်။