ရန်ကုန်၊ ဧပြီ ၁၉
ကရင်ပြည်နယ်တွင် စစ်ကောင်စီတပ်နှင့် KNLA၊ PDF စုပေါင်းတပ်များနှင့်ဖြစ်ပွားသော တိုက်ပွဲများတွင် အကြမ်းဖက်စစ်ကောင်စီဘက်မှ စစ်တက္ကသိုလ်အပတ်စဉ် ၄၉ ဆင်း ဗိုလ်မှူးစိုင်းစိုးသီဟ မိုင်းထိ၍ သေဆုံးကြောင်း မိတ်ဆွေတချို့နှင့်တပ်သတင်းရင်းမြစ်ထံမှ သိရှိရသည်။
ဧပြီလ ၁၇ ရက်နေ့ ကရင်ပြည်နယ်၊ တပ်မဟာ ၅ ဘက်ရှိ စစ်တပ်အခြေစိုက်စခန်းများထံသို့ စစ်တပ်ရိက္ခာ သွားရောက် ပို့နေစဉ် ပဒေသာမိုင်းထိ၍ သေဆုံးခြင်းဖြစ်ကြောင်း မိတ်ဆွေတချို့ထံမှ သိရှိရသည်။
“သူ့မှာ ကလေး ၂ ဦးကျန်ခဲ့တယ်။ မိသားစုဆီ ဧပြီ ၁၈ ရက်နေ့မှာမှ သတင်းရောက်တာလို့ပြောတယ်။ Body ပြန်မရဘူးလို့လည်းပြောတယ်။ နေ့မြင် ညပျောက်ဘ၀တွေ။ လူ့အသက်တွေက ခဏလေးအတွင်းမှာ ပျောက်ကွယ်ကုန်တယ်။ နေ့တိုင်း သူ့ဘက် ကိုယ့်ဘက် သေနေကြတာ ဝမ်းနည်းစရာပဲ” ဟု တပ်သတင်းရင်းမြစ်က ပြောသည်။
ကရင်ပြည်နယ်ရှိ PDF သတင်းရင်းမြစ်တချို့ကမူ တပ်မဟာ ၅ တွင် စစ်တပ်ဘက်က စစ်အခြေစိုက် စခန်းများထံသို့ ရိက္ခာပို့ရန်ကြိုးစားစဉ် စစ်သားများ မိုင်းမိ၍ ထိခိုက်သေဆုံးမှုများရှိကြောင်း၊ ဗိုလ်မှူး စိုင်းစိုးသီဟ ဖြစ်စဉ်နှင့်ပတ်သက်၍ မည်သည့်နေရာတွင် မိုင်းထိ၍ သေဆုံးသည်ကို မသိရှိဟုဆိုသည်။
“တပ်မဟာ ၅ ဘက်မှာကတော့ မိုင်းတွေရှိနေတာဆိုတော့ သူဘယ်မှာ မိုင်းထိလဲတော့ မသိဘူး။ စစ်တပ်ရဲ့ အခြေစိုက် စစ်စခန်းတွေကို ရိက္ခာပို့ဖို့ သူတို့ဘက်က နည်းမျိုးစုံနဲ့ ကြိုးစားတာတော့ရှိနေတယ်” ဟု ပြောဆိုသည်။
လက်ရှိ ကရင်ပြည်နယ်၊ မွန်ပြည်နယ်နှင့်တနင်္သာရီတိုင်းရှိ KNLA တပ်မဟာများ၊ PDF ပူးပေါင်းတပ်များနှင့် စစ်ကောင်စီတပ်များအကြား တိုက်ပွဲများ အရှိန်အဟုန်ဖြင့် ဖြစ်ပွားလျက်ရှိနေကြောင်း သိရှိရသည်။
ဓာတ်ပုံ- ဗိုလ်မှူးစိုင်းစိုးသီဟ