By စကော့ မာစီရယ်

အကြမ်းဖက်အာဏာသိမ်း မြန်မာစစ်ကောင်စီနှင့် ဆက်ဆံနေသည့် နိုင်ငံတကာအသိုင်းအဝိုင်းကို အုပ်စု သုံးခုခွဲခြားနိုင်သည်။ ပထမအုပ်စုမှာ စစ်ကောင်စီကို ထောက်ခံနေသော ရုရှား၊ တရုတ်၊ အိန္ဒိယတို့ပါဝင်သည့် အရှက်ကင်းမဲ့သော အုပ်စုဖြစ်ကာ ရုရှားနှင့်တရုတ်ဆိုလျှင် ၎င်းတို့၏ အမြင်ကျဉ်းမြောင်းသော အမျိုးသားအကျိုးစီးပွားအတွက် မြန်မာစစ်တပ်ကို လက်နက်ပစ္စည်း ထောက်ပံ့မှုများပင် ပြုလုပ်လျက်ရှိသည်။

ဒုတိယအုပ်စုမှာ လျော့ရဲရဲစုစည်းထားသော သွေးကွဲနေသည့် အာဆီယံအဖွဲ့ဖြစ်ကာ ၎င်းတို့သည် လွန်ခဲ့သောတစ်နှစ်ကျော် စတင်ချမှတ်စဉ်ကတည်းက ထိရောက်မှုကင်းမဲ့ပြီး မသေချာမရေရာသည့် တူညီဆန္ဒငါးရပ်ကို ဆက်လက်အားပေးလိုကြသည်။ တတိယအုပ်စုမှာ အနောက်ကမ္ဘာဖြစ်ပြီး ထိုအုပ်စုသည် အရေးယူပိတ်ဆို့မှုများ ချမှတ်ခြင်း၊ လူသားချင်းစာနာမှု အကူအညီပေးအပ်ခြင်း၊ အာဏာသိမ်းမှုကို ဆန့်ကျင်ကြောင်း အပြင်းအထန် ရပ်တည်တုံ့ပြန်ခြင်းတို့ကို ဆောင်ရွက်လျက်ရှိသည်။

သို့သော် အဆိုပါတတိယအုပ်စုသည် လက်နက်ကိုင်တော်လှန်ရေးကို မလိုလားသလို ရဲရဲတင်းတင်း ရင်ဆိုင်မှုကို ရှောင်ရှားလိုပြီး ၎င်းအစား အာဆီယံ၏ မအောင်မြင်သော အစီအစဉ်ကို ထောက်ခံရင်း ထိရောက်မှုမရှိသော သတိကြီးစွာထားသည့်လမ်းကြောင်းကို လက်ခံလျက်ရှိသည်။

၎င်းအုပ်စုသုံးခုသည် အာဏာတည်မြဲရေးအတွက် ထင်ရာစိုင်းကြိုးပမ်းမှုအဖြစ် မိမိပြည်သူများကို ကန့်သတ်မဲ့ စစ်ပွဲဆင်နွှဲနေသည့် မြန်မာစစ်တပ်အပေါ် ထားရှိသည့် လက်ရှိနိုင်ငံတကာ အခင်းအကျင်း၏ မြင်ကွင်းပင်ဖြစ်သည်။ နိုင်ငံတကာအသိုင်းအဝိုင်းက အဘယ့်ကြောင့် အကူအညီ များများစားစား မပေးရသနည်းဟု တစ်စထက်တစ်စ စိတ်ပျက်လာသော မြန်မာပြည်သူများက မေးခွန်းထုတ်လာကြသည်။

လက်ရှိအနေအထားမှာ ထိတ်လန့်တုန်လှုပ်ဖွယ်ဖြစ်သည်။ လူထုမငြိမ်သက်မှု၊ ချောက်ကမ်းပါးထိပ်မှ စီးပွားရေး၊ ကြောက်မက်ဖွယ်လူသားချင်း စာနာမှုအကြပ်အတည်း စသည်တို့အပြင် စစ်တပ်၏ အကြမ်းဖက်မှု၊ အာဏာဆာလောင်မှုနှင့် စီးပွားရေး မကျွမ်းကျင်မှုတို့ကြောင့် ထောင်နှင့်ချီသောလူများ သေကြေဖမ်းဆီးခံရခြင်း၊ နိုင်ငံအနှံ့ ပျက်စီးယိုယွင်းခြင်းများကိုပါ ဖြစ်ပေါ်စေလျက်ရှိသည်။

ဤအခြေအနေဆိုးကြီးမှာ ပြီးဆုံးမည့် အလားအလာ မတွေ့မြင်ရသေးပါ။

မြန်မာ့အနာဂတ်ကို မြန်မာပြည်တွင်း၌ ဖြစ်ပျက်နေမှုများက အဓိကအဆုံးအဖြတ် ပေးလိမ့်မည်ဖြစ်သော်လည်း စစ်အုပ်ချုပ်မှုကို တရားဝင်ဖြစ်စေရေး စစ်ကောင်စီက လာမည့်နှစ်တွင် ကျင်းပရန် မျှော်မှန်းထားသည့် အတုအယောင် ရွေးကောက်ပွဲမတိုင်မီ ကြားကာလ၌ နိုင်ငံတကာ တုံ့ပြန်မှုမှာ အရေးကြီးသလို အဓိကအခရာလည်းကျနေသည်။

ရွေးကောက်ပွဲအကြိုကာလအတွင်း မြန်မာ စစ်တပ်သည် မဆင်မခြင် အကြမ်းဖက်နှိပ်စက်မှုများဖြင့် လူထုကအညံ့ခံလာအောင် ဆက်လက်ခြိမ်းခြောက် သိမ်းသွင်းနေမည်ဖြစ်သလို ၎င်း၏နိုင်ငံရေးအတိုက်အခံများကို မသတ်ဖြတ်ဘူးဆိုလျှင်ပင် တရားစွဲဆို အရေးယူနေလိမ့်မည်ဟု ယူဆရသည်။

အခြားတစ်ဖက်တွင် စစ်တပ်က ထွက်ပေါက်တစ်ခု ရှာလာရသည်အထိ ၎င်းတို့အင်အားချိနဲ့သွားအောင် ဆောင်ရွက်နိုင်ရန် နိုင်ငံတကာအကူအညီများ ပိုမိုရရှိရေး မျှော်လင့်ချက်ဖြင့် အမျိုးသားညီညွတ်ရေးအစိုးရ (အင်န်ယူဂျီ)နှင့် အမျိုးမျိုးသော မြန်မာ့တော်လှန်ရေး အင်အားစုများသည် ဆက်လက်ရုန်းကန် တိုက်ပွဲဝင်နေကြရမည် ဖြစ်သည်။

ချိန်ခွင်ပေါ်တင်ကြည့်ပါက ယနေ့အထိ နိုင်ငံတကာအသိုင်းအဝိုင်း၏ မြန်မာ့အရေး ကြိုးပမ်းအားထုတ်မှုကြောင့် အသားတင် အကျိုးဖြစ်ထွန်းမှုမှာ သုညအဆင့်တွင် ရှိနေသည်။ လက်နက်အကူအညီများ အပါအဝင်တရုတ်၊ အိန္ဒိယနှင့် ရုရှားတို့က စစ်ကောင်စီကိုပေးအပ်သော အကူအညီကို ချိန်ခွင်တစ်ဖက်နှင့် ကျန်ကမ္ဘာ့နိုင်ငံအများအပြားက စစ်ကောင်စီအပေါ် စိတ်ဓာတ်ပိုင်းဆိုင်ရာ ပြစ်တင်ဝေဖန်မှုများ၊ မြန်မာပြည်သူတို့အပေါ် ပွင့်ပွင့်လင်းလင်း ထောက်ခံအားပေးမှုများအား အခြား ချိန်ခွင်တစ်ဖက်အပေါ် တင်ကြည့်သည့်အခါ မည်သည့်ဘက်ကမျှ အားမသာဘဲ ချိန်ခွင်လျှာ နှစ်ဖက်ညီမျှနေသည်။

ဤအခြေအနေအတိုင်း ဆက်သွားမည်ဆိုပါက နိုင်ငံတကာအသိအမှတ်ပြုမှု ရရှိရန်အပြင် အကြမ်းဖက်အုပ်စိုးမှုကို သက်တမ်းတိုးနိုင်ရေးအတွက် လာမည့်နှစ် အတုအယောင် ရွေးကောက်ပွဲကို စစ်တပ်က အောင်မြင်စွာ အသုံးချသွားနိုင်မည့် အချက်မှာ လုံးဝသေချာသည်ဟု မဆိုနိုင်သည့်တိုင်အောင် ဖြစ်တန်ချေ အလားအလာရှိနေသည်။

မည်သို့ပင်ဆိုစေ မြန်မာပြည်သူများသည် ဆင်းရဲဒုက္ခများ ဆက်လက် ခံစားနေရမည်ဖြစ်သလို ကမ္ဘာကြီးက အထူးသဖြင့်အနောက်ကမ္ဘာက ယူကရိန်းနိုင်ငံကို အားတက်သရော ကူညီလိုကြသော်လည်း ပူတင်၏ကျူးကျော်တပ်များကဲ့သို့ ရက်စက်ဆိုးဝါးသည့် စစ်တပ်တစ်ခုအား ဆန့်ကျင်နေသည့် ၎င်းတို့ကိုမူ အဘယ့်ကြောင့် မကူညီနိုင်ရသနည်းဟု ဆက်လက်မေးခွန်းထုတ်နေကြမည် ဖြစ်သည်။

တစ်နိုင်ငံလုံးအုံကြွမှုကို ထောက်ခံရန်လိုအပ်

ယခုအခါ အမေရိကန်ဦးဆောင်သော အနောက်အုပ်စုသည် စစ်ကောင်စီ၏ အပြုအမူကို မနှစ်မြို့သော အာဆီယံအဖွဲ့ဝင် နိုင်ငံအချို့နှင့်ပူးပေါင်း၍ မြန်မာ့တော်လှန်ရေး အောင်မြင်စေရန် ကူညီမည့် ရည်မှန်းချက်ကို အတိအလင်းချမှတ်၍ အရှိန်အဟုန်မြှင့် တိုးတက်ကူညီရန် အချိန်ကျရောက်လာပြီ ဖြစ်သည်။

ထိုသို့ကူညီရန် ကြိုးပမ်းမှုသည် မြန်မာနိုင်ငံအတွင်းရှိ အခြေအနေကို ရှင်းလင်းစွာ ဆန်းစစ်လေ့လာမှုဖြင့် စတင်ရန်လိုသည်။ ဤအရေးအခင်းသည် ပြိုင်ဖက်နိုင်ငံရေး အသိုင်းအဝိုင်းနှစ်ခုအကြား ဖြစ်ရိုးဖြစ်စဉ် အာဏာလွန်ဆွဲပွဲ တစ်ခုမဟုတ်ပေ။ ၎င်းသည် တိုင်းရင်းသားလူနည်းစုများကို ဆယ်စုနှစ်များနှင့်ချီ၍ စစ်ဆင်နွှဲခဲ့ပြီး ရိုဟင်ဂျာတို့အပေါ် လူမျိုးသုဉ်းသတ်ဖြတ်မှု ကျူးလွန်ခဲ့ကာ ခမာနီခေတ်ကာလနောက်ပိုင်း အရှေ့တောင်အာရှဒေသ၌ မမြင်ဖူးသေးသည့် ရက်စက်မှုများ၊ အကြမ်းဖက်မှုများ ပြုလုပ်နေသည့် လူမုန်းများပြီး အကျင့်ပျက်နေသော သွေးဆာစစ်တပ်တစ်ခုကို တော်လှန်ရမည့် တစ်နိုင်ငံလုံးအုံကြွမှု ဖြစ်သည်။

တွေ့ဆုံဆွေးနွေးမှုများဖြင့် အကြမ်းဖက်မှုများ အဆုံးသတ်ရန် ရည်မှန်းသည့် အာဆီယံတူညီဆန္ဒငါးရပ်သည် လက်တွေ့ကို ထင်ဟပ်ခြင်းမရှိသဖြင့် မအောင်မြင်ခဲ့ပေ။ အာဆီယံ အစီအစဉ်အရ ပြည်သူတို့အပေါ် စစ်တပ်၏ အကြမ်းဖက်မှုများ အဆုံးသတ်စေမည့် အခွင့်အလမ်းမှာ မည်သည့်အခါကမျှ မရှိခဲ့သလို စစ်ခေါင်းဆောင်မင်းအောင်လှိုင်နှင့် ၎င်းအဖွဲ့သားများအား ဆင်ခြင်တုံတရားရှိလာစေရန် အာဆီယံအထူးကိုယ်စားလှယ်(နှင့် အခြားမည်သူမဆို)က နားချနိုင်မည့် မျှော်လင့်ချက်မျိုးလည်း တစ်ကြိမ်တစ်ခါမျှ မရှိခဲ့ဖူးပေ။

အကြပ်ကိုင်မှုများကြောင့် စစ်တပ်သည် ကြီးမားသော အလျှော့ပေးလိုက်လျောမှုများကို မဖြစ်မနေပြုလုပ်ရမည်ဟု နားလည်သဘောပေါက်မှု မရှိမချင်း မြန်မာပြည်သူများက လက်ခံနိုင်မည့် နိုင်ငံရေးသဘောတူညီမှုအတွက် စေ့စပ်ဆွေးနွေးရန်မဖြစ်နိုင်ပေ။

ဇူလိုင် ၂၅ ရက်က အတိုက်အခံ တက်ကြွလှုပ်ရှားသူလေးဦးကို ကွပ်မျက်ရန် စစ်ကောင်စီ၏ ဆုံးဖြတ်ချက်သည် အာဆီယံ၏ မေတ္တာရပ်ခံချက်ကို ဗြောင်ကျကျ ငြင်းဆန်ခြင်းဖြစ်ကာ မအောင်မြင်မှုများနှင့် ၁၅လကြာကြုံတွေ့ရအပြီး အာဆီယံတူညီဆန္ဒငါးရပ်သည် ကွယ်လွန်အနိစ္စရောက်သွားပြီဖြစ်သဖြင့် ၎င်းအစီအစဉ်ကို ကောင်းမွန်စွာသင်္ဂြိုဟ်ရန်သာ ကျန်ရှိတော့ကြောင်း သက်ဆိုင်သူအားလုံးကို ရှင်းလင်းစွာသဘောပေါက် နားလည်စေခဲ့ဖွယ်ရှိသည်။

ယခုအကြပ်အတည်းမှ တည်ငြိမ်အေးချမ်းစွာဖြင့် မြန်မာနိုင်ငံ လွတ်မြောက်နိုင်မည့် တစ်ခုတည်းသော နည်းလမ်းမှာ စစ်တပ်ကို အာဏာမှဖယ်ရှားရေးဖြစ်သည်။ သို့မဟုတ် မဖယ်ရှားနိုင်လျှင်ပင် ၎င်းတို့ရေရှည် တည်တံ့ရေးအတွက် အာဏာကိုစွန့်ခွာ၍ အဖတ်ဆယ်စေလောက်အောင် စစ်တပ်ကို အင်အား ချိနဲ့သွားစေမည့်နည်းလမ်း ဖြစ်သည်။ ထိုနည်းအပြင် တခြားနည်းမရှိပါ။ စစ်တပ်က စီစဉ်ထားသည့် ၂၀၂၃ အယောင်ဆောင် ရွေးကောက်ပွဲသည် မြန်မာနိုင်ငံကို တစ်ပါတီစနစ်အဖြစ် အသွင်ကူးပြောင်းရန် ရည်ရွယ်သည်။ စစ်အုပ်စု၏ စကားလုံးဖြင့်ဆိုလျှင် “စည်းကမ်းပြည့်ဝသော ဒီမိုကရေစီ” သို့ ကူးပြောင်းရန် ရည်ရွယ်ခြင်းဖြစ်သည်။

ပိုမိုရဲတင်းသော မူဝါဒများက တော်လှန်ရေးကို ကူညီနိုင်မည်

မြန်မာပြည်သူများကို အလေးထားသည့်၊ ယုတ်စွအဆုံး မြန်မာနိုင်ငံအား တည်ငြိမ်မှုပြန်လည်ရရှိပြီး တိုးတက်လာစေလိုသည့် နိုင်ငံတကာ အသိုင်းအဝိုင်းအနေဖြင့် ခေတ္တရပ်တန့်၍ မိမိတို့၏ချဉ်းကပ်မှုကို ပြန်လည်သုံးသပ်ကာ မြန်မာ့တော်လှန်ရေးအောင်မြင်ရန် အလားအလာ ပိုကောင်းစေမည့် ပိုမိုရဲတင်းသောမူဝါဒများကို ချမှတ်ဆောင်ရွက်ရန် လိုအပ်သည်။ အထူးသဖြင့် နိုင်ငံတကာ အသိုင်းအဝိုင်းသည် အောက်ပါအချက်များကို ထည့်သွင်းစဉ်းစားသင့်သည်-

• စစ်ကောင်စီကို အတိုင်းအတာတစ်ခုအထိ တရားဝင်မှုပေးထားပြီး အဖြေထွက်နိုင်သော နိုင်ငံရေးလုပ်ငန်းစဉ်တစ်ခု ရှိနေသယောင် အမြဲထင်ယောင်ထင်မှား ဖြစ်စေခြင်းဖြင့် ကောင်းကျိုးထက် ဆိုးကျိုးပိုများနေသော အာဆီယံတူညီဆန္ဒငါးရပ်ကို မလေးရှားနိုင်ငံက အကြံပြုထားသည့်အတိုင်း တရားဝင်ဖျက်သိမ်းခြင်း။
• အင်န်ယူဂျီနှင့် အထူးအရေးပါသော တိုင်းရင်းသား လက်နက်ကိုင်အဖွဲ့များ (အီးအေအိုများ)၊ အရပ်ဖက် အာဏာဖီဆန်ရေးလှုပ်ရှားမှု ခေါင်းဆောင်များ အပါအဝင် စစ်ကောင်စီကို တက်ကြွစွာ ဆန့်ကျင်နေသော အခြားအဓိကအဖွဲ့များနှင့် လူသိရှင်ကြားသာမက သီးသန့်ချိတ်ဆက်မှုများ အထူးတိုးမြှင့် ဆောင်ရွက်ခြင်း။
• အင်န်ယူဂျီ၊ အမျိုးသားညီညွတ်ရေး အတိုင်ပင်ခံကောင်စီ၊ ပြည်နယ်အဆင့် အတိုင်ပင်ခံကောင်စီများ၊ ဒေသန္တရအုပ်ချုပ်မှုအဖွဲ့များ၊ တိုင်းရင်းသားလက်နက်ကိုင် အုပ်စုများ၏ အရပ်ဖက်ဌာနများ၊ အရပ်ဖက် အာဏာဖီဆန်ရေးလှုပ်ရှားမှု အုပ်စုများ စသည်တို့အပါအဝင် အဓိကတော်လှန်ရေးအုပ်စုများကို ကူညီနေသော အရပ်ဖက်အဖွဲ့အစည်းများသို့ ပေးအပ်သည့် အကူအညီပမာဏကို အနည်းဆုံးနှစ်ဆ တိုးမြှင့်ခြင်း။
• စစ်တပ်မှ ထွက်ပြေးကူးပြောင်းလာသူများကို ထောက်ပံ့ရေးအပါအဝင် အင်န်ယူဂျီနှင့် မဟာမိတ်အုပ်စုများအတွက် ရန်ပုံငွေပေးနိုင်မည့် နည်းလမ်းသစ်များ ရှာဖွေဖန်တီးခြင်း။
• အမေရိကန်ရောက်နေသော တော်လှန်ရေးသမားများအတွက် ထောက်ပံ့ကြေး သို့မဟုတ် အခြား အခွင့်အလမ်းအများအပြား တိုးချဲ့ပေးအပ်ခြင်း၊ ထိုင်း၊ အိန္ဒိယနှင့် အခြားနိုင်ငံရောက်နေသူများနှင့် မြန်မာနိုင်ငံအတွင်းရှိ ကျောင်းသားများအတွက် ပညာရေးရန်ပုံငွေ တိုးမြှင့်ခြင်း (အွန်လိုင်းပို့ချခြင်း သို့မဟုတ် အင်န်ယူဂျီ/အီးအေအိုက ထောက်ပံ့ထားသော ကျောင်းများမှတစ်ဆင့် သင်ကြားခြင်း)။
• အာဏာသိမ်းမှုကို ဆန့်ကျင်သည့် အစိုးရများနှင့် ညှိနှိုင်းပူးပေါင်း၍ ပစ်မှတ်ထားပိတ်ဆို့မှုများ ချမှတ်ခြင်း၊ ထိုသို့ ပိတ်ဆို့မှုများ ဖော်ထုတ်သတ်မှတ်ရန် ရင်းမြစ်များ သီးသန့်ခွဲဝေပေးခြင်းနှင့် ဖြစ်နိုင်သည့်နေရာတွင် စစ်ကောင်စီထံ ရန်ပုံငွေစီးဝင်မှုကို ပိတ်ဆို့ခြင်း သို့မဟုတ် သိမ်းဆည်းခြင်း။
• စစ်ကောင်စီအတွက် အဓိကဝင်ငွေရှာပေးနေသော မြန်မာ့ရေနံနှင့် သဘာဝဓာတ်ငွေ့လုပ်ငန်းအပေါ် အီးယူ၏ အရေးယူထားမှုတွင် အမေရိကန်ပြည်ထောင်စုက ပါဝင်ရန် ပြန်လည်စဉ်းစားသင့်ခြင်း၊ ထိုသို့ ပိတ်ဆို့ပါက အမေရိကန်၏ မဟာမိတ်ထိုင်းနိုင်ငံအတွက် စွမ်းအင်ဖြည့်ဆည်းမှု ပြဿနာဖြစ်ပေါ် နိုင်သော်လည်း ဤကိစ္စကို ကိုယ်တွယ်ဖြေရှင်းမည့် နည်းလမ်းသစ်များ ရှာဖွေရန် အဖွဲ့တစ်ခု သတ်မှတ်ဖွဲ့စည်း ဆောင်ရွက်နိုင်ခြင်း။
• စစ်ကောင်စီမှ တစ်ဆင့်ပေးအပ်သည့် လူသားချင်းစာနာမှု အကူအညီအားလုံးကို ရပ်ဆိုင်းခြင်း၊ ထိုသို့ ပေးအပ်မည့်အစား ထိုင်းနှင့် အိန္ဒိယနိုင်ငံများမှတစ်ဆင့် လူသားချင်းစာနာမှု အကူအညီစင်္ကြန်များ ဖန်တီးမည့် နိုင်ငံတကာအစီအစဉ်တစ်ရပ်ကို ကုလသမဂ္ဂအထွေထွေ အတွင်းရေးမှူးချုပ်က ဦးဆောင်၍ အကောင်အထည်ဖော်ခြင်း။
• ရိုဟင်ဂျာအပေါ် လူမျိုးသုဉ်းသတ်ဖြတ်မှုဖြင့် အပြည်ပြည်ဆိုင်ရာတရားရုံး၌ ဂမ်ဘီယာ၏ စွပ်စွဲ တရားစွဲဆိုမှုတွင် ပူးပေါင်းပါဝင်ခြင်းအပါအဝင် စစ်ကောင်စီအပေါ် နိုင်ငံတကာဥပဒေကြောင်းအရ အရေးယူရန်အားထုတ်မှုကို ဆထက်ထမ်းပိုး ပါဝင်ပြုလုပ်ခြင်း။
• နောက်ဆုံးအချက်အဖြစ် မြန်မာနိုင်ငံဆိုင်ရာ ယူကေသံအမတ်ကြီးဟောင်း ဒဲရက်တွန်ကင် အကြံပြုသည့် အတိုင်း အင်န်ယူဂျီရုံးများ လက်ခံဖွင့်လှစ်ထားသော နိုင်ငံများက ညှိနှိုင်းမှု၊ ပူးပေါင်းမှုများ တိုးမြှင့်ဆောင်ရွက်ခြင်း။

အထက်ပါအစီအစဉ်များ ဆောင်ရွက်ရာတွင် လက်ငင်းအရေးတကြီး လုပ်ငန်းသည် စစ်တပ်ကို အာဏာလက်မဲ့ဖြစ်အောင် တိုက်ထုတ်ရာတွင် တော်လှန်ရေးအဖွဲ့များကိုကူညီရန်ဖြစ်သော်လည်း ထိုမျှနှင့်သာ လုံလောက်မှု ရှိမည်မဟုတ်သည်ကို နိုင်ငံတကာအသိုင်းအဝိုင်းက နားလည်လက်ခံထားသင့်သည်။

လွန်ခဲ့သော ၁၈လအတွင်း ပျက်စီးမှုများကို ပြန်လည်တည်ဆောက်ရန်၊ ပစ္စုပ္ပန်နှင့် အတိတ်အကြမ်းဖက်မှုများအတွက် တာဝန်ခံမှုရှိစေရန်နှင့် ပိုမိုအရေးကြီးဖွယ်ရှိသော ရိုဟင်ဂျာအပါအဝင် တိုင်းရင်းသားလူနည်းစု အုပ်စုအများအပြားနှင့် လူများစုအကြား ယုံကြည်မှု တည်ဆောက်ရန် တို့အတွက် မြန်မာနိုင်ငံသည် အလွန်ကြီးမားသော အခက်အခဲများနှင့် ဆက်လက်ရင်ဆိုင်နေရဦးမည်ဖြစ်သည်။

တော်လှန်ရေးကိုကူညီ၍ ပြန်လည်တည်ဆောက်ရေး ဆောင်ရွက်မည့် အစီအစဉ်မှာ အလုပ်ဖြစ်မည်ဟု ကျိန်းသေအာမခံနိုင်ခြင်းမရှိပါ။ လွဲချော်မှု အများအပြားလည်း ရှိနေနိုင်သည်။ သို့သော် ၎င်းအစီအစဉ်သည် အနိမ့်ဆုံးအားဖြင့် အောင်မြင်နိုင်ချေ အလားအလာတစ်ခု ရှိနေသည်။ အကြောင်းမှာ စစ်တပ်က အာဏာ ချုပ်ကိုင်ထားနေသမျှ ကာလပတ်လုံး မြန်မာ့အရေး မျှော်လင့်ချက် ကင်းမဲ့ဆိတ်သုဉ်းနေခြင်းကြောင့် ဖြစ်သည်။

(USIP မှထုတ်ဝေသော Scot Marciel ၏ “It’s Time to Help Myanmar’s Resistance Prevail” ဆောင်းပါးကို ဆီလျှော်အောင် ဘာသာပြန်ဆိုထားခြင်း ဖြစ်ပါသည်။ ဆောင်းပါးရှင် စကော့ မာစီရယ်သည် မြန်မာနိုင်ငံဆိုင်ရာ အမေရိကန်သံအမတ်ကြီးအဖြစ် ၂၀၁၆ မှ ၂၀၂၀ ပြည့်နှစ်အထိ တာဝန်ထမ်းဆောင်ခဲ့သည်)။