မကွေးတိုင်း၊ ပေါက်မြို့နယ်ရှိ ဇီးတော၊ သပြေအေး ကျေးရွာများကို စစ်တပ်က မီးတင်ရှို့နေ
ရန်ကုန်၊ ဧပြီ ၂၄
မကွေးတိုင်း၊ ပေါက်မြို့နယ်အတွင်းရှိ ဇီးတော ကျေးရွာ၊ သပြေအေးကျေးရွာများကို စစ်ကောင်စီတပ်များနှင့် ပျူစောထီးများက မီးတင်ရှို့လျက်ရှိကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဧပြီလ ၂၄ ရက်နေ့ မွန်းလွဲ ၁ နာရီ ၄၅ မိနစ်အချိန် မကွေးတိုင်း၊ ပေါက်မြို့နယ် တောင်ပိုင်း၊ ဇီးတောကျေးရွာကို စစ် တပ်၊ ပျူစောထီးများက ဝင်ရောက် မီးရှိုနေ့ခြင်းဖြစ်ပြီး ယခုအကြိမ် မီးရှို့မှုသည် ၅ ကြိမ်မြောက် မီးရှို့ခြင်းဖြစ် ကြောင်း ၊ ဇီးတောကျေးရွာအနီးတွင် တိုက်ပွဲဖြစ်ပြီး စစ်ကောင်စီဘက်မှ ၄ ဦးသေဆုံးခဲ့ပြီးနောက် ဇီးတောကျေးရွာကို မီးဝင်ရှို့ခြင်းဖြစ်ကြောင်း သိရှိရသည်။
“ဒီနေ့ မွန်းလွဲ ၁ နာရီ ၄၅ မိနစ်အချိန်မှာ မကွေးတိုင်း ပေါက်မြို့နယ် တောင်ပိုင်း ဇီးတောကျေးရွာကို စစ်ခွေး၊ ပျူခွေးတွေက မီးဝင်ရှို့နေပါတယ်။ ဇီးတောရွာဆိုရင် ခုအကြိမ်နဲ့ဆိုရင် ၅ ကြိမ်တိုင်တိုင်မီးရှို့ဖျက်ဆီးခံနေရပါပြီ။ ရွာမှာ လူလည်းမရှိပါဘူး။ လွန်ခဲ့တဲ့ ၁ နှစ်ကျော်လောက်ကတည်းက ရွာက ပြည်သူတွေက မောင်းထုတ်ခံရ၊ ထွက်ပြေးနေရတာပါ” ဟု ဇီးတောကျေးရွာသားတစ်ဦးက ဆိုသည်။
အလားတူ မကွေးတိုင်း၊ ပေါက်မြို့နယ်တောင်ပိုင်း သစ်ချိုကုန်း၊ပင်တောင်နှင့်ဝန်ခြုံးကျေးရွာများမှ ပျူစောထီးများက သပြေအေးကျေးရွာကို မီးရှို့ဖျက်ဆီးနေကြောင်း သိရှိရသည်။
“တိုက်ပွဲဖြစ်တာမရှိပါဘူး။ သပြေအေးကျေးရွာကို ပျူစောထီးတွေ ဝင်လာပြီး မီးရှို့လို့ ပြည်သူတွေ ထွက်ပြေးနေရပါတယ်။ သူတို့ ရိက္ခာတွေ လိုချင်တာတွေ လာလုတာပါ” ဟု ဒေသပြည်သူတစ်ဦးက ပြောဆိုသည်။
