မိုခါဆိုင်ကလုန်းမုန်တိုင်း ယနေ့ မွန်းလွဲ ၁၂ နာရီ ၃၀ မိနစ်ဝန်းကျင် စစ်တွေမြို့အနီးမှ ဖြတ်သန်းဝင်ရောက်နိုင်ပြီး လေတိုက်နှုန်း တစ်နာရီ ၁၄၄ မိုင်ဝန်းကျင် တိုက်ခတ်နိုင်
ရန်ကုန်၊ မေ ၁၄
ဘင်္ဂလားပင်လယ်အော်တွင် ဖြစ်ပေါ်နေသောအလွန့်အလွန်အားကောင်းသောဆိုင်ကလုန်းမုန်တိုင်းသည် ယနေ့ နံနက်ပိုင်းမှစတင်၍ ရခိုင်ကမ်းရိုးတန်းသို့ စတင်ဝင်ရောက်နိုင်ပြီး ယနေ့ မွန်းလွဲ ၁၂ နာရီ ၃၀ မိနစ်အချိန် ဝန်းကျင်တွင် စစ်တွေမြို့အနီးမှ ဖြတ်သန်းဝင်ရောက်နိုင်ကြောင်း Joint Typhoon Warning Center က တရားဝင် ထုတ်ပြန်ထားသည်။
မိုခါဆိုင်ကလုန်း မုန်တိုင်းသည် ကမ်းရိုးတန်းသို့ စတင်ဝင်ရောက်ချိန်တွင် လေတိုက်နှုန်း တစ်နာရီလျှင် ၁၄၄ မိုင်ဝန်းကျင် ( 125 Knots) ရှိနိုင်ပြီး ကုန်းတွင်းပိုင်းသို့ ဝင်ရောက်ချိန်တွင် ဆိုင်ကလုန်းမုန်တိုင်း အရှိန်လျှော့လာမည် ဖြစ်ကြောင်း သိရှိရသည်။
မြန်မာ မိုးလေဝသနှင့်ဇလဗေဒညွှန်ကြားမှု ဦးစီးဌာန၏ ထုတ်ပြန်ချက်အရ “မိုခါ”ဆိုင်ကလုန်းသည် ယနေ့နံနက်ပိုင်းမှစ၍ ရခိုင်ကမ်းရိုးတန်းကိုစတင်ဖြတ်ကျော်နိုင်ကာ နေ့လယ်ပိုင်းတွင် မုန်တိုင်း၏ ဗဟိုချက်သည်ဘင်္ဂလားဒေ့ရှ်နိုင်ငံ၊ ကော့ဘဇားမြို့နှင့် မြန်မာနိုင်ငံ၊ ကျောက်ဖြူမြို့တို့ကြားစစ်တွေမြို့အနီးမှ အလွန့်အလွန်အားကောင်းသောဆိုင်ကလုန်းမုန်တိုင်း “မိုခါ” အနေဖြင့် ဖြတ်ကျော်ဝင်ရောက်နိုင်ကြောင်း၊ ထို့နောက် မြောက်-အရှေ့မြောက်ဘက်သို့ ဆက်လက်ရွေ့လျားနိုင်ပြီး၊ ချင်းပြည်နယ်၊ မကွေးတိုင်းဒေသကြီး၊ စစ်ကိုင်းတိုင်းဒေသကြီးနှင့် ကချင်ပြည်နယ်ဆီသို့ အားအလွန်ကောင်းသောဆိုင်ကလုန်းမုန်တိုင်း “မိုခါ” အနေဖြင့်ဆက်လက်ရွေ့လျားနိုင်ကြောင်း ခန့်မှန်းထားသည်။
ဆိုင်ကလုန်းမုန်တိုင်းနှင့်အတူ ဖြစ်ပေါ်လာသော မုန်တိုင်းဒီရေကို အဓိက သတိထားရမည်ဖြစ်ပြီး မြေနိမ့်ပိုင်းဒေသများမှ ပြည်သူများအနေဖြင့် အမြန်ဆုံးရွှေ့ပြောင်းကြရန် သတိပေးချက်များ တောက် လျှောက်ဆိုသလို ထုတ်ပြန် လျက်ရှိသည်။
