ထိုင်း-မြန်မာနယ်စပ်တွင် လက်နက်နှင့် ဆက်စပ်ပစ္စည်းများ ထိုင်းရဲက ဖမ်းဆီးပြီးနောက် နယ်စပ်နှင့် မဲဆောက်တွင် အဖမ်းအဆီး အစစ်အဆေးကြမ်း
ရန်ကုန်| မေ ၁၇
ထိုင်း-မြန်မာနယ်စပ် တာခ့်ခရိုင် မယ်လမတ်ဒေသရှိ နေအိမ်တစ်အိမ်ကို ဝင်ရောက်စစ်ဆေးရာတွင် တရား မဝင် လက်နက်များနှင့် ဆက်စပ်ပစ္စည်းများကို ဖမ်း ဆီးရမိခဲ့ပြီး မြန်မာနိုင်ငံသား ၁ ဦးအပါအဝင် ဆက် စပ်သူ ၃ ဦးကို ဖမ်းဆီးရမိခဲ့ပြီးနောက် နယ်စပ်နှင့် မဲဆောက်တွင် အဖမ်းအဆီး အစစ်အဆေးကြမ်းနေကြောင်း သိရှိရသည်။
ယမန်နေ့(မေ ၁၄)တွင် မယ်လမတ်ဒေသရှိ နေအိမ်တစ်လုံးကို ဝင်ရောက်စစ်ဆေးစဉ် အိမ်စီးကားပေါ်တွင် ဝှက်ထားသော လက်နက်နှင့် ဆက်စပ်ပစ္စည်းများ ထောင်နှင့်ချီ သိမ်းဆည်းရမိခဲ့ကြောင်း ဖော်ပြထားသည်။
အဆိုပါပစ္စည်းများနှင့်အတူ မြန်မာနိုင်ငံသား အမျိုး သမီး တစ်ဦးနှင့် ထိုင်းနိုင်ငံသား ၂ ဦး စုစုပေါင်း ၃ ဦးတို့ကိုလည်း ဖမ်းဆီးရမိခဲ့ကြောင်း ဖော်ပြထားသည်။
လက်နက်ပစ္စည်းများတွင် ပစ်စတိုနှင့် ဆက်စပ်ပစ္စည်းများ၊ M 16 နှင့် ဆက်စပ်ပစ္စည်းများ၊ M 15 နှင့် ဆက်စပ်ပစ္စည်းများ အရေအတွက် ထောင်နှင့်ချီ ဖမ်းဆီးမိခဲ့ခြင်းဖြစ်သည်။
ဖမ်းဆီးခံရသူများကို တရားမဝင် လက်နက်အမှုများဖြင့် အရေးယူသွားမည်ဖြစ်ပြီး မယ်လမတ်ရဲစခန်းသို့ ပို့ဆောင်ခဲ့ကာ ဆက်စပ်နေသူများကို ထပ်မံစုံစမ်းဖော်ထုတ်သွားမည်ဖြစ်ကြောင်း ဖော်ပြထားသည်။
မေလ ၁ ရက်နေ့တွင်လည်း ထိုင်း-မြန်မာနယ်စပ် တာခ့်ခရိုင် မဲဆောက်မြို့အနီးရှိ မဲဆောက်-အူဖန်း ကားလမ်းမပေါ်တွင် ဆိုင်ကယ်စီးလာသော မြန်မာလူငယ်နှစ်ဦးကို သေနတ် ၂ လက်နှင့်အတူ ဖမ်းဆီးရမိခဲ့သေးသည်။
“အခု မဲဆောက်နဲ့ ထိုင်း-မြန်မာနယ်စပ်မှာ အရမ်းအစစ် အဆေးတွေများနေတယ်။ လက်နက်နဲ့ ဆက် စပ်တာတွေ မိတာများလာလို့။ မဲဆောက်ထဲမှာလည်း တရားဝင်ရော၊ ရဲကတ်ကိုင်သူရော အကုန်စစ် ဆေးနေတယ်။ အိမ်တွေကို ဝင်စစ်တာတွေလည်း များလာတယ်”ဟု မဲဆောက်ရောက်ရှိနေသူ မြန်မာရွှေ့ပြောင်း လုပ်သားတစ်ဦးက ပြောဆိုသည်။
