မြင်းမူမြို့နယ်၊ မဲနောကျေးရွာကို စစ်တပ်က ပစ်ခတ်ဝင်ရောက်စီးနင်းပြီး ပစ္စည်းများလုယက်ကာ ရွာလုံးကျွတ် မီးရှို့ဖျက်ဆီး
ရန်ကုန်၊ ဇူလိုင် ၁၇
စစ်ကိုင်းတိုင်း၊ မြင်းမူမြို့နယ်၊ မဲနောကျေးရွာကို စစ်တပ်က ပစ်ခတ်ဝင်ရောက်စီးနင်းပြီး ပစ္စည်းများလုယက်ကာ ရွာလုံးကျွတ် မီးရှို့ဖျက်ဆီးသွားကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုကြသည်။
ဇူလိုင် ၁၆ ရက်နေ့ နံနက် ၄ နာရီခွဲအချိန်စစ်ကိုင်းတိုင်း၊ မြင်းမူမြို့နယ်၊ မဲနောကျေးရွာကို လက်နက်များ ပစ်ခတ်ဝင်ရောက်လာကြောင်း၊ ပြည်သူများမှာ ရုတ်တရက် စစ်တပ် ဝင်ရောက်လာသဖြင့်ထွက်ပြေးကြရကြောင်း၊ တစ်နေကုန် စစ်တပ်က တပ်စွဲခဲ့ပြီး ညအချိန်တွင် ကျေးရွာရှိ ပြည်သူများ၏ နေအိမ်များကို ဖောက်ထွင်း ယူဆောင်ကာ ရွာကို မီးရှို့ကြောင်း၊ ယင်းနောက် ယနေ့ နံနက် ၂ နာရီတွင်ပါ ကျန်ရှိနေသော နေအိမ်များကို ထပ်မံမီးရှို့ခဲ့ကြောင်း သိရှိရသည်။
“မနေ့ မနက် ၄ နာရီခွဲလောက်မှာ ရွာထဲကို သေနတ်တွေဖောက်ပြီး ရွာထဲသို့ ဝင်ရောက်လာတယ်။ ပြည်သူတွေကို ဖမ်းဆီးတယ်။ ရွာသူ၊ရွာသားတွေက အဝတ်တစ်ထည် ကိုယ်တစ်ခုနဲ့ ဘေးလွတ်ရာ ထွက်ပြေးတိမ်းရှောင်ရတယ်။ ညရောက်တော့မှ ပြည်သူတွေရဲ့ နေအိမ်တွေမှာရှိတဲ့ တန်ဖိုးကြီးပစ္စည်းများကို ဖောက်ထွင်းယူဆောင်ပြီး တစ်ရွာလုံးမီးလောင်တိုက်သွင်းတယ်။ ပြည်သူတွေမှာ အသက်အန္တရယ်စိုးရိမ်ပြီး အဝတ်တစ်ထည်ကိုယ်တစ်ခုဖြစ် ထွက်ပြေးနေရပါတယ်။ ရွာကို မနေ့ ည ၉ နာရီမှာ မီးရှို့တယ်။ ကျန်တဲ့အိမ်တွေကို ဒီနေ့မနက် ၂ နာရီမှာ ထပ်မီးရှို့တယ်။ တစ်ရွာလုံး မီးလောင်သွားတယ်” ဟု ဒေသပြည်သူတစ်ဦးက ပြောဆိုသည်။
စစ်တပ်က မြင်းမူမြို့နယ်၊ မဲနောကျေးရွာကို ဝင်ရောက် ဖျက်ဆီးမီးရှို့ရာတွင် တိုက်ပွဲဖြစ်ပွားခြင်းမရှိဘဲ အကြောင်းမဲ့ မီးဝင်ရှို့ ပစ္စည်းများလုယက် ဖျက်ဆီးခဲ့ခြင်းဖြစ်ကြောင်း ဒေသပြည်သူများက ပြောဆိုကြသည်။
