ကြာအင်းဆိပ်ကြီးတွင် တိုက်ပွဲဖြစ်ပွားပြီးနောက် စစ်တပ်က ပြည်သူ ၂ ဦးကို ပစ်သတ်သွား
ရန်ကုန်၊ ဇူလိုင် ၁၇
ကရင်ပြည်နယ်၊ ကြာအင်းဆိပ်ကြီးမြို့နယ်တွင် အကြမ်းဖက် စစ်တပ်နှင့် ဒေသကာကွယ်ရေး တပ်ဖွဲ့များ တိုက်ပွဲဖြစ်ပွားခဲ့ပြီးနောက် စစ်တပ်က ပြည်သူ ၂ ဦးကို ပစ်သတ်သွားကြောင်း Lion Battalion Commando – ဗျူဟာ စစ်ကြောင်းမှ ရဲဘော် အညာသားက ပြောဆိုသည်။
ဇူလိုင်လ ၁၄ ရက်နေ့တွင် ဝင်းရေးမြို့ ပုလိန်ကျေးရွာနှင့် ခလယ်ကျေးရွာ အကြား မီးသွေးကုန်း ဝန်းကျင်တွင် စစ်ကြောင်းထိုး ဝင်ရောက်လာသည့် အကြမ်းဖက် စစ်တပ်၏ စကခ ၁၃ (ဘုတ်ပြင်း) လက်အောက်ခံရှိ တပ်မ ၂၂၊ ခမရ ၂၀၉၊ ခမရ ၂၁၀ တပ်ရင်းများနှင့် ဒေကာကွယ်ရေး တပ်ဖွဲ့များ တိုက်ပွဲဖြစ်ပွားခဲ့ကြောင်း၊ ထိတွေ့ တိုက်ပွဲအတွင်း အကြမ်းဖက် စစ်တပ်ဘက်မှ စစ်သား ၅ ဦးသေဆုံးခဲ့ပြီး ၆ ဦး ထိခိုက် ဒဏ်ရာရှိခဲ့ကြောင်း၊ အဆိုပါ အကြမ်း ဖက် စစ်တပ် စစ်ကြောင်းကို Lion Battalion Commando – ဗျူဟာစစ် ကြောင်း နှင့် KNU/KNLA အမှတ်(၁၆)တပ်ရင်း တောင်ညိုစစ်ကြောင်း၊ နဂါးနီ စစ်ကြောင်း တို့က ပူးပေါင်း တိုက်ခိုက်ခဲ့ကြောင်း သိရသည်။
တိုက်ပွဲဖြစ်ပွားပြီးနောက် အကြမ်းဖက် စစ်တပ်က ခရီးသွား ပြည်သူ ကား ၁ စီးကို ဖမ်းဆီးကာ ပြည်သူ အမျိုးသား ၂ ဦးကို ပစ်ခတ်သတ်ဖြတ်ခဲ့ကြောင်း၊ ထို့ပြင်ငြိမ်းချမ်း မြိုင်ဘုရားကုန်းမှနေ၍ အကြမ်းဖက် စစ်တပ်က လက်နက်ကြီးများဖြင့် ပစ်ခတ်ခဲ့သောကြောင့် နေအိမ်များထိခိုက် ပျက်စီးခဲ့ကြောင်း သိရှိရသည်။
“စစ်တပ်က အထိနာလို့ လမ်းမှာတွေ့တဲ့ ပြည်သူ့ကားကို ဖမ်းဆီးပြီး ပြည်သူ ၂ ဦးကို ပစ်သတ်သွားတာပါ။ ရမ်းကား ပစ်ခတ်သတ်ဖြတ်သွားတာပါ” ဟု ဒေသပြည်သူတစ်ဦးက ပြောဆိုသည်။
