ရေဦးတွင် နေအိမ်များကို မီးရှို့ ဖျက်ဆီးနေသော စစ်သားများကို ၄၀ မမ ဖြင့် ပစ်ခတ် တိုက်ခိုက်၊ ကလေးမြို့တွင် ကင်းလှည့်နေသော စစ်ကားကို မိုင်းဆွဲတိုက်ခိုက်
ရန်ကုန်၊ အောက်တိုဘာ ၁၉
စစ်ကိုင်းတိုင်း၊ ရေဦးမြို့နယ်၊ မစိုးရိမ်ကျေးရွာရှိ နေအိမ်များကို မီးရှို့နေသော စစ်သားများကို ၄၀ မမ ဖြင့်ပစ်ခတ်တိုက်ခိုက်ခဲ့ကြောင်း Freedom Revolution Force- FRF တပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
အောက်တိုဘာလ ၁၈ ရက်နေ့ ညပိုင်းက ရေဦးမြို့မှ အင်အား ၁၀၀ ကျော်ဖြင့် ထွက်လာသော ခမရ ၇၀၁ ၊ ၇၀၈ မှ စစ်သားများနှင့် ပျူစောထီး များပါဝင်သော ပူးပေါင်းစစ်ကြောင်းသည် ရေဦးမြို့နယ်၊ မစိုးရိမ်ကျေးရွာ ၌ ညအိပ်စခန်းချ ရပ်နားပြီး နေအိမ်များကို မီးရှို့နေစဥ် တော်လှန်ရေး ပူးပေါင်းတပ်ဖွဲ့များက ၄၀ မမ လက်နက်ကြီးဖြင့် ၇ ချက် ပစ်ခတ်တိုက်ခိုက်ခဲ့ရာ အကြမ်းဖက် စစ်သားများ အထိုင်ချရာနေရာ အနီး တဝိုက်ကျရောက် ပေါက်ကွဲခဲ့ပြီး ထိခိုက်သေဆုံးမှုရှိနိုင်ကြောင်း သိရသည်။
“စစ်ကြောင်းက ဒီနေ့ပဲ ဒီပဲယင်းမြို့ကိုဝင်ရောက်သွားပါပြီ၊ မစိုးရိမ်ကျေးရွာမှာပဲ ညအိပ်ပြီး ဒီနေ့မှ ဆက်လက်ထွက်ခွာပြီး ဒီပဲယင်းမြို့ထဲ ဝင်သွားတာပါတယ်” ဟု Freedom Revolution Force- FRF တပ်ဖွဲ့မှ သတင်းနှင့်ပြန်ကြားရေးတာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
အဆိုပါ တိုက်ခိုက်မှုကို Freedom Revolution Force- FRF အထူးလှုပ်ရှားအဖွဲ့၊ FRF ကြယ်ရောင်တပ်ခွဲ နှင့် ရွှေဘိုခရိုင်အမှတ် ၂၄ တပ်ရင်းတို့ ပူးပေါင်းကာ တိုက်ခိုက်ခဲ့ခြင်းဖြစ်ကြောင်း သိရသည်။
ထို့ပြင် စစ်ကိုင်းတိုင်း၊ ကလေးမြို့ရှိ တာဟန်းရပ်ကွက် တောင်သာတံတားတွင် အောက်တိုဘာ ၁၇ ရက်နေ့ ညနေ ၆ နာရီ ဝန်းကျင်ခန့်က ကင်းလှည့်နေသည့် စစ်ကားကို မိုင်းဆွဲတိုက်ခိုက်ခဲ့ကြောင်း တော်လှန်ရေး တပ်ဖွဲ့ဝင် တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။
“အင်္ဂါနေ့ ညနေ ၅ ခွဲ ၆ ဝန်းကျင်အချိန်က သေတော့ မသေလောက်ဘူး ထိခိုက်ကတော့ ရှိမှာ သေချာ တယ်။ ခရိုင်မြို့ပြစစ်ဆင်ရေးကက လုပ်တာ။ ကားဘီးတွေပါ ကျွတ်ပြီး ထိုးရပ်သွားတယ်” ဟု တော်လှန် ရေး ရဲဘော်တစ်ဦးက ရန်ကုန်ခေတ်သစ်သတင်းဌာနသို့ ပြောကြားသည်။
မိုင်းဆွဲတိုက်ခိုက်မှုကြောင့် ကားဘီးကျွတ်ကာ ကားပျက်စီးသွားပြီး အကြမ်းဖက် စစ်သားများ ထိခိုက် ဒဏ်ရာရရှိမှုရှိသော်လည်း သေဆုံးမှု ရှိ မရှိကို အတည်မပြုနိုင်သေးကြောင်း သိရှိရသည်။
