ယင်းမာပင်နှင့်ပုလဲမြို့နယ်တို့ တွင် စစ်ကြောင်းကို မိုင်းဆွဲခြင်းနှင့် စစ်တပ်အထိုင်စခန်းများကို လက်နက်ကြီးများဖြင့် ပစ်ခတ်တိုက်ခိုက်မှု ၁၀ ဦးထက်မနည်းသေဆုံးနိုင်
ရန်ကုန်၊ နိုဝင်ဘာ ၇
စစ်ကိုင်းတိုင်း၊ ယင်းမာပင်မြို့နယ်နှင့်ပုလဲမြို့နယ်တို့တွင် စစ်တပ်စစ်ကြောင်းကို မိုင်းဆွဲခြင်းနှင့် စစ်တပ်အထိုင်စခန်းများကို လက်နက်ကြီးဖြင့် ပစ်ခတ်မှုတိုက်ခိုက်ရာ စစ်သား ၁၀ ဦးထက်မနည်းသေဆုံးနိုင်ကြောင်း တော်လှန်ရေးတပ်ဖွဲ့များက ပြောဆိုကြသည်။
နိုဝင်ဘာလ ၆ ရက်နေ့ မွန်းလွဲ ၂ နာရီ ၂၀ မိနစ်အချိန် စစ်ကိုင်းတိုင်း၊ ပုလဲမြို့နယ်တွင် ၊ ယင်းမာပင်ခရိုင်တပ်ရင်းအမှတ် ၂၉ တပ်ရင်း ဒေါင်းမင်း PDFက ပုလဲမြို့မှ ထွက်လာသော စစ်ယာဥ်တန်းနှင့် ခြေလျင်ဖြန့်ဆင်းလာသော ကျားဘီးလူးစစ်တပ်စစ်ကြောင်းကို လက်တောင်းကြီးနှင့်သရက်ကန်ရွာ အကြားတွင် ပဒေဿာမိုင်း ၈ လုံး၊ ရှေ့ထွက်မိုင်းများဖြင့် တိုက်ခိုက်ရာ စစ်သား ၁၀ ဦးထက်မနည်းသေဆုံးခဲ့ကြောင်း ဒေါင်းမင်း PDFမှ ဗိုလ်အိုင်အိုက ရန်ကုန်ခေတ်သစ်သတင်းဌာနထံသို့ ပြောဆိုသည်။
“ကျားဘီးလူးစစ်ကြောင်းကို ပဒေဿာမိုင်း၈လုံး၊ ရှေ့ထွက်မိုင်းတွေနဲ့ ဧည့်ခံကျွေးမွေး ခဲ့ရာမှာ စစ်တပ်က ၁၀ ကောင်ကျော် နေရာမှာတင် ပွဲချင်းပြီး သေဆုံးပါတယ်။ အလောင်းတွေကို အားယာဥ်တန်းမှာ ပါလာတဲ့ ကားပေါ်သို့ဆွဲ တင်သွားပါတယ်”ဟု ဗိုလ်အိုင်အိုက ပြောဆိုသည်။
အလားတူ နိုဝင်ဘာလ ၆ ရက်နေ့ ညနေ၄နာရီ၂၀မိနစ် အချိန် စစ်ကိုင်းတိုင်း ယင်းမာပင်အရှေ့ခြမ်း၊ ရွှေတောင်ဦးကုန်းနှင့် သီတဂူကျောင်းဝင်းအတွင်းတွင် အထိုင်ချတပ်စွဲထားသော စစ်တပ်နေရာ ၂ ခုကို Black Vote Fighterအဖွဲ့၊ စစ်ကျွန်မခံမြွေဆိုးတစ်သိုက်၊ FBGA ၊ ဗမာအမျိုးသားတော်လှန်ရေးတပ်မတော် BNRA၊ SBTF ၊ EAGLE Defense Force Salingyi အပါအဝင် ယင်းမာပင် နှင့် ဆားလင်းကြီး မဟာမိတ်တပ်ပေါင်းစုနှင့်မဟာမိတ်ညီနောင်များက တာဝေးပစ်လက်နက်ကြီး ၆၀မမ၊ ၈၀မမ၊ ၁၂၀ မမ၊ရှော့တိုက် ဒုန်းများဖြင့် သွားရောက်ပစ်ခတ်တိုက်ခိုက်ခဲ့ကြောင်း သိရှိရသည်။
“စစ်တပ်ဘက်သို့လက်နက်ကြီးတွေ ကျရောက်ပေါက်ကွဲခဲ့ပြီး ထိခိုက်သေဆုံးမှုတွေရှိနိုင်ပါတယ်။ စစ်တပ်ဘက်ကလည်း အပြန်အလှန် လက်နက်ကြီး၊ လက်န က်ငယ် ၆၀ မမ တွေနဲ့ ပြန်လည် ပစ်ခတ်ခဲ့ပေမယ့် အထိအခိုက်မရှိပါဘူး” ဟု Black Vote မှ တာဝန်ရှိသူက ပြောဆိုသည်။
