ရန်ကုန်၊ ဇန်နဝါရီ ၃၁
အကြမ်းဖက်စစ်ကောင်စီက ရန်ကုန်မြို့တွင် YBS လိုင်းကား စီးနင်းခများကို ယနေ့မှစတင်၍ တစ်ဦးလျှင် ၄၀၀ ကျပ်သို့ တရားဝင်တိုးမြှင့်လိုက်ကြောင်း ရန်ကုန်မြို့မှ ပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
“ဒီကနေ့ စပြီး YBS ကားတွေ ဘယ်စီးစီး ၊ ဘယ်မှတ်တိုင်က တက်တက် တစ်ဦးကို ၄၀၀ ကျပ် တိုးမြှင့်ပါတယ်။ ဂိတ်စ ဂိတ်ဆုံး စီးလည်း ၄၀၀ ကျပ်ပဲ။ တစ်မှတ်တိုင်ပဲ စီးလည်း ၄၀၀ ပဲ။ ဒီနေ့ တရားဝင်စပြီး တိုးမြှင့်သတ်မှတ်တာ” ဟု YBS ယာဉ်လိုင်းတစ်ခုမှ ဝန်ထမ်းတစ်ဦးက ပြောဆိုသည်။
ရန်ကုန်မြို့တွင်း အလုပ်သွား အလုပ်ပြန် လုပ်ကြသည့် အခြေခံလူတန်းစားများသည် လုပ်ငန်းခွင်သို့ ရောက်ရှိရန် အနည်းဆုံး လိုင်းကား ၂ ဆင့် စီးရသဖြင့် တစ်နေ့လျှင်အလုပ်အသွား အပြန် လိုင်းကားခ ငွေကျပ် ၁၆၀၀ ကျပ် ကုန်ကျမည်ဖြစ်၍ အခြေခံ လူတန်းစားများ ပိုမို၍ ကျပ်တည်းလာကြောင်း ရန်ကုန်မြို့မှ ပြည်သူတစ်ဦးက ပြောဆိုသည်။
“လုပ်ခလစာက မတိုးဘူးလေ။ အလုပ်ဆင်းတာက ပန်းဆိုးတန်းမှာ။ အုတ်ကျင်းမှတ်တိုင်ကနေ သခင်မြပန်းခြံကို စီးရတယ်။ သခင်မြပန်းခြံကနေ ပန်းဆိုးတန်းကို ပြန်စီးရတယ်။ နှစ်ဆင့် စီးရတော့ တစ်နေ့ကို အခုတိုးလိုက်တဲ့ စျေးနဲ့ဆိုရင် ကားခ အသွားအပြန်က ၁၆၀၀ ကျပ် ကုန်မှာပေါ့။ လုပ်ခလစာက တိုးမလာဘူး။ သွားလာစရိတ် ပိုကြီးလာတာ ပေါ့” ဟု ပန်းဆိုးတန်းရှိ TV နှင့် လျှပ်စစ်ပစ္စည်းအရောင်းဆိုင်တွင် အလုပ်လုပ်သည့် အရောင်းစာရေး ဝန်ထမ်းတစ်ဦးက ပြောဆိုသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup
