ပေါက်မြို့နယ်၊ တပ်ကုန်းရွာရှိ ပျူစောထီးစခန်းကို ဝင်ရောက် တိုက်ခိုက်မှု စစ်ကောင်စီ တပ်သားများ ထိခိုက်ဒဏ်ရာ ရရှိသူ များပြား
ရန်ကုန်၊ ဧပြီ ၃၀
မကွေးတိုင်း၊ ပေါက်မြို့နယ်၊ တပ်ကုန်းရွာ ပျူစောထီးစခန်းကို ဝင်ရောက်တိုက်ခိုက်ခဲ့ရာ ပျူစောထီး ခေါင်းဆောင် တစ်ဦးအပါအဝင် အများအပြား ဒဏ်ရာရရှိခဲ့ကြောင်း မြိုင်ပကဖမှ တာဝန်ရှိသူတစ်ဦး က ရန်ကုန်ခေတ်သစ်သတင်းဌာနထံသို့ ပြောကြားသည်။
ယမန်နေ့ ဧပြီလ ၂၉ ရက် နံနက် အစောပိုင်း ၂ နာရီမှ စတင်၍ နံနက် ၆ နာရီအထိ ပေါက်မြို့နယ်၊ တပ်ကုန်းရွာ၌ အထိုင်ချ တပ်စွဲထားသော ပျူစောထီးစခန်းကို ပြည်သူ့ကာကွယ်ရေးအဖွဲ့များက လက်နက်ငယ်များဖြင့် ဝင်ရောက် ပစ်ခတ်တိုက်ခိုက်ခဲ့ရာ ဘန်ကာ ၃ ခု အထိ သိမ်းပိုက်နိုင်ခဲ့ပြီး နောက်ဆုံး ကျန်ရှိနေသော ဘန်ကာ ၁ ခုကို သိမ်းပိုက်ရန် လုပ်ဆောင်နေစဉ်တွင် စစ်ကောင်စီဘက်မှ ၁၂၀ မမ လက်နက်ကြီး ပစ်ကူများ ပစ်ခတ်ခဲ့သဖြင့် ပြန်လည် ဆုတ်ခွာခဲ့ရကြောင်း သိရသည်။
ယင်းတိုက်ခိုက်မှုအတွင်း အကြမ်းဖက် စစ်တပ် လက်အောက်ခံ ပျူစောထီးခေါင်းဆောင် ၁ ဦး ဝမ်း ဗိုက်ကျည်ထိမှန် ဒဏ်ရာအပါအဝင် ပျူစောထီး အများအပြား ထိခိုက်ဒဏ်ရာရရှိခဲ့ကြောင်း စစ် ကောင်စီဘက်မှ ပြန်လည်ပစ်ခတ်ခဲ့သော လက်နက်ကြီး ထိမှန်မှုကြောင့် ပြည်သူ့ကာကွယ်ရေးတပ် ဖွဲ့ဝင် ၄ ဦး မစိုးရိမ်ရ ထိခိုက်ဒဏ်ရာရရှိခဲ့ကြောင်း သိရသည်။
ထိုသို့ တိုက်ခိုက်ခံရပြီးနောက် တပ်ကုန်းရွာ ပျူစောထီးစခန်းကို အကြမ်းဖက်စစ်သား အင်အား များ ထပ်မံဖြည့်တင်းကာ အနီးအနား ပတ်ဝန်းကျင်ကျေးရွာများကို လက်နက်ကြီးဖြင့် ရမ်းသမ်းပစ်ခတ်ခဲ့ ကြောင်း သိရသည်။
အဆိုပါတိုက်ခိုက်မှုကို မြိုင်မြို့နယ်အခြေစိုက် စုဖွဲ့မှုတပ်ရင်းတပ်ဖွဲ့ ၊ ပခုက္ကူမြို့နယ် အခြေစိုက် စုဖွဲ့မှု တပ်ရင်းတပ်ဖွဲ့၊ မြိုင်ပကဖတပ်ရင်း ၁ ၊ မြိုင်ပကဖတပ်ရင်း ၂ ၊ ပခုက္ကူမြို့နယ်ပြည်သူ့ကာကွယ်ရေး တပ်ဖွဲ့ ၂ (Young Force UG)၊ Pakokku People’s Defence Force ၊ Earthquake People’s Defence Force၊ ပခုက္ကူမြို့နယ်ပြည်သူ့ကာကွယ်ရေးတပ်ဖွဲ့ ၂ (Thu Rain TR)၊ ပခုက္ကူမြို့နယ် ပြည် သူ့ ကာကွယ်ရေးတပ်ဖွဲ့ ၂ (Pakokku Ranger) ၊Pakokku Hunter၊ ပခုက္ကူမြို့နယ်ပြည်သူ့ကာကွယ် ရေးတပ်ဖွဲ့ ၂ (Shwe Nyar Myae)၊ ချောက်ပကဖ၊ ပခုက္ကူခရိုင် တပ်ရင်း ၁၁၊ ပခုက္ကူခရိုင် တပ်ရင်း ၁၉၊ ပခုက္ကူခရိုင် တပ်ရင်း ၄၊ ပခုက္ကူခရိုင် တပ်ရင်း ၅၊ ကိုဥသြ၊ ကိုကောင်းကောင်းအဖွဲ့၊ YRS နား ပေါက်နှင့် ပေါက်ကျေးရွာ ပကဖအဖွဲ့များ ပူးပေါင်းကာ တိုက်ခိုက်ခဲ့ခြင်းဖြစ်ကြောင်း သိရသည်။
