ညောင်လေးပင်ခရိုင်ရှိ ကျေးရွာများကို စစ်တပ်က လေကြောင်း၊ လက်နက်ကြီးများဖြင့် ပစ်ခတ်မှု ပြည်သူ ၁ ဦး သေဆုံးပြီး စာသင်ကျောင်းနှင့် နေအိမ်များ ပျက်စီး
ရန်ကုန်၊ ဇွန် ၂
ပဲခူးတိုင်း၊ ညောင်လေးပင်ခရိုင်ရှိ ကျေးရွာများကို အကြမ်းဖက် စစ်တပ်က လေကြောင်းဖြင့် ဗုံးကျဲပစ်ခတ်ခြင်း၊ လက်နက်ကြီးများဖြင့် ပစ်ခတ်ခြင်းကြောင့် ပြည်သူ ၁ ဦး သေဆုံးပြီး စာသင်ကျောင်းနှင့် နေအိမ်များ ပျက်စီးခဲ့ကြောင်း KNU ဗဟိုက သတင်းထုတ်ပြန်သည်။
မေလ ၃၁ ရက်နေ့ ည ၁ဝ နာရီ ၂၅ မိနစ်အချိန် လယ်ဒိုမြို့နယ်အတွင်း အကြမ်းဖက် စစ်တပ်၏ ခလရ-၂၆၄ တပ်ရင်းက ၁၂၀ မမ လက်နက်ကြီး ၂ လုံး ပစ်ခတ်ခဲ့ရာ တောင်ခင်ရွာအတွင်း ကျရောက်ပေါက်ကွဲခဲ့ကြောင်း၊ လက်နက်ကြီး ကျရောက်ပေါက်ကွဲမှုကြောင့် အသက် ၃၆ နှစ်အရွယ် ဒေါ်ပန်းနုမွန် လက်နက်ကြီးကျည် ထိမှန် သေဆုံးခဲ့ကြောင်း၊ ထို့ပြင် အသက် ၇ နှစ် အရွယ် ကလေးငယ် မမိုဟေမန် လည်း ထိခိုက်ဒဏ်ရာ ရရှိခဲ့ပြီး နေအိမ် ၁ လုံး ပျက်စီးခဲ့ကြောင်း သိရှိရသည်။
ယင်းနေ့ မွန်းလွဲ ၂ နာရီ ၈ မိနစ်အချိန် ဆောထိမြို့နယ်အတွင်း အကြမ်းဖက် စစ်တပ်က ဂျက်တိုက်လေယာဥ်ဖြင့် သာစေးဒဲကျေးရွာကို ပေါင် ၅၀၀ ဗုံး ၂ လုံး ကျဲချ တိုက်ခိုက်ခဲ့သောကြောင့် နေအိမ် ၃ လုံး ထိမှန် ပျက်စီးပြီး အိမ်မွေးတိရိစ္ဆာန်များ သေဆုံးခဲ့ကြောင်း သိရှိရသည်။
ထိုသို့ ဗုံးကျဲမှု အပြီး မွန်းလွဲ ၂ နာရီ ၁၀ မိနစ်ခန့်တွင်လည်း ဘောလောတယ် ကျေးရွာအတွင်းသို့ ဗုံး ၂ လုံး ထပ်မံ ကျဲချ တိုက်ခိုက်ခဲ့သောကြောင့် နေအိမ် ၁ လုံး နှင့် ကျေးရွာ စာသင်ကျောင်းတို့ ထိခိုက်ပျက်စီးခဲ့ရကြောင်း သိရှိရသည်။
