ရန်ကုန်၊ ဇူလိုင် ၉
ရန်ကုန်တိုင်း၊ သာကေတမြို့နယ်နှင့် ဒေါပုံမြို့နယ်တွင် ၃ ရက်အတွင်း ဝမ်းပျက်ဝမ်းလျှော လူနာ ၁၇၇ ဦး ဆေးရုံတက် ကုသမှု ခံယူရပြီး ကာလဝမ်းရောဂါ ဖြစ်ပွားသူ ၁၃ ဦး ရှိကြောင်း စစ်ကောင်စီ၏ ကျန်းမာရေးဝန်ကြီး ဌာန၏ ထုတ်ပြန်ချက်နှင့် ဒေသအခြေစိုက် ပရဟိတအဖွဲ့၏ ပြောကြားချက်အရ သိရှိရသည်။
ဇူလိုင်လ ၆ ရက်နေ့တွင် ဝမ်းပျက်ဝမ်းလျှော လူနာ ၆၃ ဦး ဆေးရုံတင်ကုသမှု ခံယူရကြောင်း၊ ဇူလိုင်လ ၇ ရက်နေ့တွင် ဝမ်းပျက်ဝမ်းလျော လူနာ ၄၄ ဦး ဆေးရုံတင်ကုသမှုခံယူရကြောင်း၊ ဇူလိုင်လ ၈ ရက်နေ့တွင် ဝမ်းပျက်ဝမ်းလျှော လူနာ ၆၀ ဦး ဆေးရုံတင်ကုသမှု ခံယူရကြောင်း၊ ဇူလိုင်လ ၆ ရက်မှ ၈ ရက်နေ့အတွင်း ဝမ်းပျက်ဝမ်းလျှောရောဂါကြောင့် ဆေးရုံတက်လူနာ ၁၇၇ ဦးရှိကြောင်း သိရှိရသည်။
အဆိုပါ ဝမ်းပျက်ဝမ်းလျှော လူနာများတွင် မူလ ကာလဝမ်းရောဂါ ကူးစက်ခံရသူ ၅ ဦးရှိပြီး ယင်းတို့အနက်မှ ၁ ဦးမှာ သေဆုံးခဲ့ကြောင်း၊ ဇူလိုင်လ ၇ ရက်နေ့ ဝမ်းပျက်ဝမ်းလျှောသူ လူနာ ၄၄ ဦးအနက်မှ ၂ ဦးမှာ ပြင်းထန်ဝမ်းပျက်ဝမ်းလျှောရောဂါ (ခေါ်) ကာလဝမ်းရောဂါ ဖြစ်ပွားကြောင်း၊ ဇူလိုင်လ ၈ ရက်နေ့ ဝမ်းပျက်ဝမ်းလျှော လူနာ ၆၀ ဦးအနက်မှ ၆ ဦးမှာ ကာလဝမ်းရောဂါ (ခေါ်) ပြင်းထန် ဝမ်းပျက်ဝမ်းလျှောရောဂါ ကူးစက်ခံရကြောင်း သိရှိရသည်။
“အခုထက်ထိတော့ Control မရသေးဘူးပြောရမယ်။ နေ့စဉ် လူနာတွေ ရှိနေတယ်။ ကာလဝမ်းရောဂါ အကူးခံရသူတွေ တွေ့နေတယ်။ ရောဂါစက်ကွင်းကို ဖြတ်နိုင်မှပဲ ကူးစက်တာနဲ့ လူနာလျှော့သွားမယ့်အခြေအနေရှိပါတယ်” ဟု သာကတေမြို့နယ်မှ ပရဟိတအသင်းမှ အဖွဲ့ဝင်တစ်ဦးက ပြောဆိုသည်။
စစ်ကောင်စီက သာကေတနှင့်ဒေါပုံတို့တွင် လမ်းဘေးစားသောက်ဆိုင်များကို ယာယီပိတ်ထားခြင်း၊ ရေနှင့် ပတ်ဝန်းကျင်သန့်ရှင်းမှုလုပ်ငန်းများကို ဆောင် ရွက် နေပြီး စျေးများကိုလည်း စစ်ကောင်စီက ကြီးကြပ်စစ်ဆေးမှုများ လုပ် ဆောင်နေကြောင်း သိရှိရသည်။
ဓာတ်ပုံ – သင်္ခါရဝိမုတ္တိလူမှုကူညီရေးအသင်းက ရန်ကုန်တွင် ဝမ်းပျက်ဝမ်း လျှော လူနာတစ်ဦးကို ကူညီပေးနေစဉ်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
