သံတွဲ အကျဉ်းထောင်မှ နိုင်ငံရေး အကျဉ်းသားများ အပါအဝင် အကျဉ်းသား ၃၇၂ ဦးကို အာရက္ခတပ်တော်က ဘေးလွတ်ရာ ကယ်ထုတ်ပြီးနောက် နိုင်ကျဉ်းများကို နေအိမ်များသို့ ပြန်လည် ပို့ဆောင်ပေး
ရန်ကုန်၊ ဩဂုတ် ၈
ရခိုင်ပြည်နယ်၊ သံတွဲ အကျဉ်းထောင်မှ နိုင်ငံရေး အကျဉ်းသားများ အပါအဝင် အကျဉ်းသား ၃၇၂ ဦးကို အာရက္ခတပ်တော်က ဘေးလွတ်ရာကို ကယ်ထုတ်ပြီးနောက် နိုင်ကျဉ်းများကို နေအိမ်များသို့ ပြန်လည် ပို့ဆောင်ပေးခဲ့ကြောင်း AA က ပြောဆိုသည်။
ရခိုင်ဒေသအတွင်းရှိ သိမ်းပိုက်ရန် ကျန်ရှိနေသေးသော သံတွဲမြို့ရှိ အကြမ်းဖက် စစ်ကောင်စီ၏ တပ်စခန်းများ အားလုံး၊ ငပလီ (မဇင်လေဆိပ်)၊ သံတွဲဟိုတယ်ဇုန်အပါအဝင် နေရာအများစုကို အာရက္ခတပ်တော်က ဇူလိုင်လ ၁၆ ရက်နေ့၊ ညနေ ၅ နာရီ ၃၀ မိနစ်တွင် အပြီးသတ် သိမ်းပိုက်ရရှိပြီးနောက် သံတွဲမြို့ အကျဉ်းထောင်၌ ပိတ်မိနေသော အကျဉ်းသားများ ၃၇၂ ဦးကို အာရက္ခတပ်တော်က ဘေးကင်းလုံခြုံရာကို ကယ်ထုတ်နိုင်ခဲ့ကြောင်း သိရသည်။
သံတွဲအကျဉ်းထောင်မှ အကျဉ်းသား စုစုပေါင်း ၃၇၂ ဦးအနက် ၇ ဦးမှာ ကယ်ထုတ်နေစဉ် အတွင်း အကြမ်းဖက် စစ်ကောင်စီ၏ လက်နက်ကြီး ကျည်စထိမှန်ကာ ၅ ဦးသေဆုံးခဲ့ပြီး ကျန် ၂ ဦးသည်လည်း ပြင်းထန် ဒဏ်ရာများဖြင့် ဆေးကုသမှု ခံယူနေစဉ် သေဆုံးခဲ့ကြောင်း သိရှိရသည်။
ကယ်ထုတ်လာခဲ့သော အကျဉ်းသားများထဲတွင် နိုင်ငံရေးအကျဉ်းသား ၄၃ ဦးပါဝင်ပြီး ၂ ဦးမှာ ကယ်ထုတ်နေစဉ်အတွင်း သေဆုံးခဲ့ကြောင်း၊ ကျန်နိုင်ငံရေး အကျဉ်းသား ၄၁ ဦးထဲတွင် ရောဂါ၊ ဒဏ်ရာဖြင့် ပါလာသူများနှင့် ကျန်းမာရေး စောင့်ရှောက်ရန် အရေးတကြီး လိုအပ်နေသောသူ ၁၇ ဦးတို့ကို အာရက္ခတပ်တော်က ကောင်းမွန်စွာ ကျန်းမာရေး စောင့်ရှောက်မှု ပေးလျက်ရှိကြောင်း သိရသည်။
ယခင်ရက်ပိုင်းများ၌ အကြမ်းဖက် စစ်တပ်၏ ပင်လယ်ပြင်မှ လက်နက်ကြီးများဖြင့် ပစ်ခတ် တိုက်ခိုက်နေခြင်း အပြင် လက်နက်ဖြင့် ထွက်ပြေး လွတ်မြောက်နေသော စစ်ကောင်စီတပ်ဖွဲ့ဝင်အချို့ကို လိုက်လံရှင်းလင်း နေရခြင်းနှင့် လတ်တလော ရေကြီးနေမှုများကြောင့် နိုင်ငံရေး အကျဉ်းသားများ အားလုံးကို ဘေးကင်းလုံခြုံရာတွင် ခေတ္တနေရာချထားပေးခဲ့ကြောင်း၊ ယခုချိန်တွင် လုံခြုံရေး အာမခံချက် အတိုင်းအတာ တစ်ခုထိ ရှိပြီဖြစ်သောကြောင့် ၎င်းနိုင်ငံရေး အကျဉ်းသားများ အားလုံးကို ၎င်းတို့၏ နေအိမ်များနှင့် မိသားစုများထံကို ဩဂုတ်လ ၆ ရက်နေ့မှ စတင်ပြီး ပြန်လည်ပို့ဆောင်ပေးနေကြောင်း သိရှိရသည်။
အဆိုပါ အကျဉ်းသား ၄၁ ဦးကို ရက္ခိုင်အမျိုးသားအဖွဲချုပ်/အာရက္ခတပ်တော် (ULA/AA) ၏ ရဲဘက်၊ အုပ်ချုပ်ရေးဘက်ဆိုင်ရာ တာဝန်ရှိသူများမှ အချက်အလက်များ ကောက်ယူ စိစစ်ပြီး လူသားချင်း စာနာထောက်ထားမှုဆိုင်ရာ စံနှုန်းများအရ လိုအပ်သည့် ကျန်းမာရေး စောင့်ရှောက်မှုများနှင့် အရေးပေါ် လိုအပ်လျက်ရှိသော စားဝတ်နေရေး ထောက်ပံ့ကူညီမှုများကိုလည်း လုပ်ဆောင်ပေးခဲ့ကြောင်း သိရသည်။
ထို့ပြင် ရာဇဝတ်မှု ကျုးလွန်ထားသော အကျဉ်းသားများကို မိမိတို့အနေဖြင့် ဆက်လက် ထိန်းသိမ်းထားလျက်ရှိကာ ၎င်းတို့ ကျူးလွန်ခဲ့သော ပြစ်မှုများကို ပြန်လည်စစ်ဆေးလျက်ရှိပြီး တရားနည်းလမ်းကျကျ ကိုင်တွယ်ဆောင်ရွက်လျက်ရှိကြောင်း အာရက္ခတပ်တော်ကပြောဆိုသည်။
