ရေဦးမြို့ တိုင်းရင်းဆေးရုံတွင် တပ်စွဲထားသော စစ်ကောင်စီ တပ်သားများကို လက်နက်ကြီးများဖြင့် ပစ်ခတ်တိုက်ခိုက်မှု စစ်သား ၂ ဦးသေဆုံးနိုင်
ရန်ကုန်၊ ဩဂုတ် ၁၀
စစ်ကိုင်းတိုင်း၊ ရေဦးမြို့ တိုင်းရင်းဆေးရုံတွင် တပ်စွဲထားသော အကြမ်းဖက် စစ်ကောင်စီ တပ်သားများကို လက်နက်ကြီးများဖြင့် ပစ်ခတ်တိုက်ခိုက်ရာ စစ်သား ၂ ဦးသေဆုံးနိုင်ကြောင်း Wolf Guerrilla LDF(YE-U) အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။
ဩဂုတ်လ ၉ ရက်နေ့ ည ၁၀ နာရီ ၃၀ မိနစ်ခန့်တွင်ရေဦးမြို့ တိုင်းရင်းဆေးရုံတွင် တပ်စွဲထားသော အကြမ်းဖက် စစ်ကောင်စီ တပ်သားများကို ဗိုလ်ရုပ်ကဆိုး ဦးဆောင်သော Wolf Guerrilla LDF(YE-U) အဖွဲ့က လက်နက်ကြီးများဖြင့် ပစ်ခတ် တိုက်ခိုက်ခဲ့ကြောင်း သိရသည်။
ယင်း တိုက်ခိုက်မှုအတွင်း တိုင်းရင်းဆေးရုံရှိ အရာခံ ဗိုလ်များနေထိုင်သော လေးထပ်တိုက်အပေါ်ဆုံးထပ်ကို ကျရောက် ပေါက်ကွဲခဲ့ပြီး အကြမ်းဖက် စစ်သား ၂ ဦး ထိခိုက်သေဆုံးနိုင်ကြောင်း၊ ထို့ပြင် အကြမ်းဖက် စစ်တပ်ဘက်ကလည်း လက်နက်ကြီး ၁၂၀ မမ ၃ လုံး ပြန်လည်ပစ်ခတ်ခဲ့ပြီး ပွိုင့် ၅ စက်လက်ဖြင့် အဆက်မပြတ် ပစ်ခတ်ခဲ့သော်လည်း တော်လှန်ရေး ရဲဘော်များ ဘေးကင်းစွာဆုတ်ခွာနိုင်ခဲ့ကြောင်း သိရှိရသည်။
အဆိုပါ ရေဦးမြို့ တိုင်းရင်းဆေးရုံအတွင်း တပ်စွဲနေထိုင်လျက်ရှိသော အကြမ်းဖက် စစ်ကောင်စီ တပ်သား ၆၀ ခန့်သည် ရေဦးမြို့ ဘေးပတ်ပတ်လည်ရှိ ကျေးရွာများကို လွန်ခဲ့သောသုံးလေးရက်မှစ၍ ယနေ့ ညပိုင်းအထိ လက်နက်ကြီး ၁၂၀ မမ၊ ၈၁ မမ တို့ဖြင့် ရမ်းသမ်း ပစ်ခတ်နေသော အကြမ်းဖက် စစ်တပ် အထိုင်တိုင်းရင်းဆေးရုံဖြစ်ကြောင်း Wolf Guerrilla LDF(YE-U) အဖွဲ့မှ တာဝန်ရှိသူ တစ်ဦးက ရှင်းပြသည်။
ထို့သို့ တိုက်ခိုက်မှု ဖြစ်ပွားပြီးနောက် ဩဂုတ်လ ၁၀ ရက်နေ့တွင် နံနက် ၈ နာရီ ၃၀ မိနစ်ခန့်တွင် မုံရွာ နမခမှ MI-35 ၁စီး ၊ ရွှေဘိုလေ့ကျင့်ရေး ၈ မှ MI-17 ၁ စီး၊ ရေဦးမြို့ တိုင်းရင်းဆေးရုံတောင်ဘက်ကို ဆင်းသက်ခဲ့ပြီး MI-35 သည် ရေဦးမြို့တောင်ဘက်ကို လုံခြုံရေးပေးကာ ပျံသန်းခဲ့ကြောင်း သိရသည်။
