ပေါက်ခေါင်းနှင့်မုံရွာမြို့နယ်တို့တွင် စစ်တပ်စစ်ကြောင်းနှင့်ညောင်ဖြူပင်ရဲစခန်း ကို တော်လှန်ရေးတပ်များက တိုက်ခိုက်မှု စစ်တပ်ဘက်မှ သေဆုံးထိခိုက်မှုများရှိ
ရန်ကုန်၊ ဩဂုတ် ၁၇
ပဲခူးတိုင်း၊ ပေါက်ခေါင်းမြို့နယ်နှင့် စစ်ကိုင်းတိုင်း၊ မုံရွာမြို့နယ်တို့တွင် စစ်တပ်စစ်ကြောင်းများကို တော်လှန်ရေးတပ်များက တိုက်ခိုက်ရာ စစ်တပ်ဘက်မှ သေဆုံးထိခိုက်မှုများရှိနိုင်ကြောင်း တော်လှန်ရေးတပ်များမှ တာဝန်ရှိသူများက ရန်ကုန်ခေတ်သစ်သတင်းဌာနထံသို့ ပြောဆိုကြသည်။
ဩဂုတ်လ ၁၅ ရက်နေ့ နံနက် ၇ နာရီ ၄၀ မိနစ်အချိန် ပဲခူးတိုင်း၊ ပေါက်ခေါင်းမြို့နယ်၊ ဂွေးတောက်ရွာအနီးတွင် ပဲခူးရိုးမတောင်ခြေရင်းကျေးရွာများကို စစ်ကြောင်းထိုး မီးရှို့ဖျက်ဆီးပြီး ဆုတ်ခွာလာသော အင်အား ၅၀ ပါ စစ်တပ်စစ်ကြောင်းကို
တော်လှန်ရေးတပ်များက မိုင်းဆွဲတိုက်ခိုက်ခဲ့ကြောင်း၊ စစ်တပ်စစ်ကြောင်းကို အသင့်ထောင်ထားသောပဒေသာမိုင်းများဖြင့် ၃ ကြိမ်ဆွဲ၍ တိုက်ခိုက်ရာ အကြမ်းဖက်စစ်ကောင်စီများဘက်မှ စစ်သား ၃ ဦးဒဏ်ရာ အပြင်းအထန်ရရှိကြောင်း၊ ဒဏ်ရာရသူ ၃ ဦးကို ပုခက်များဖြင့် သယ်ဆောင်ပြီး လက်ကြီးကျေးရွာဘက်သို့ စစ်ကြောင်း ထွက်ခွာသွားကြောင်းး ပြည်ခရိုင် ပြည်သူ့ကာကွယ်ရေးတပ်မ တော်၊ ၃၆၀၁ PPDF တပ်ရင်း၏ သတင်းနှင့် ပြန်ကြားတာဝန်ခံက ရန်ကုန်ခေတ်သစ်သတင်းဌာနထံသို့ ပြောဆိုသည်။
အထိနာသွားသော စစ်တပ်က လက်နက်ကြီး၊ လက်နက်ငယ်များဖြင့်ပြန်လည်ပစ်ခတ်တိုက်ခိုက်သော်လည်းပြည်သူကာကွယ် ရေးတပ်ဖွဲ့ဝင်များ အထိအခိုက်မရှိကြောင်း သိရှိရသည်။
အလားတူ ဩဂုတ်လ ၁၃ ရက် နံနက် ၁၁ နာရီဝန်းကျင်အချိန် မုံရွာမြို့နယ် တောင်ဘက်ရှိ ညောင်ဖြူပင်ရဲစခန်းကို တော်လှန်ရေးပူးပေါင်းတပ်ဖွဲ့များက ဒရုန်းဖြင့် ဗုံးကျဲတိုက်ခိုက်ခြင်း၊ ၄၀ မမ၊ ၆၀ မမ၊ ၈၀ မမ လက်နက်ကြီး၊ လက်နက်ငယ်များဖြင့် ပစ်ခတ်တိုက်ခိုက်ခဲ့ကြောင်း မုံရွာခရိုင် တပ်ရင်းအမှတ်၂၃ တပ်ခွဲ ၄ မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
အဆိုပါ ညောင်ဖြူပင်ရဲစခန်းတိုက်ပွဲအတွင်း စစ်အုပ်စုဘက်က လက်နက်ကြီး၊ လက်နက်ငယ်၊ စက်လက်ကလေးများဖြင့် ပြန်လည်ပစ်ခတ်ရာမှာ တော်လှန်ရေးရဲဘော်တစ်ဦး လက်မောင်း ကျည်ရှပ်ထိဒဏ်ရာရရှိခဲ့ကြောင်း စစ်တပ်ဘက်မှ ထိခိုက်သေဆုံးမှုများရှိနိုင်ကြောင်း သိရှိရသည်။
ညောင်ဖြူပင်ရဲစခန်း တိုက်ပွဲကို ယင်းမာပင်ခရိုင် တပ်ရင်း ၃၅ တပ်ခွဲ-၃၊ တပ်စိပ် ၁ ၊ တောင်ပံနီ အထူး ပြောက်ကျား တပ်ဖွဲ့ (Salingyi)၊ 5/Fighter Group(Monywa) ၊ Chindwin Dynamite (Salingyi)၊ Fighter Nine Forces (Salingyi)၊ AK ပြောက် ကျားတပ်ဖွဲ့၊ SBTF(Salingyi) ၊ Red Phoenix Force ၊ ယင်းမာပင်ခရိုင်တပ်ရင်း ၃ တပ်ခွဲ-၃၊ မဲမှောင်ပြည်သူ့ကာကွယ်ရေးတပ်ဖွဲ့၊ Black Vote Fighter ၊ မုံရွာခရိုင်တပ်ရင်း၅၊၈၊၉၊၁၀(ဗျူဟာတပ်ရင်း)၊ မုံရွာခရိုင်တပ်ရင်း-၂၈ ၊ မုံရွာခရိုင်တပ်ရင်း-၂၃ တပ်ခွဲ(၄)တပ်ခွဲ၂၊တပ်ခွဲ၃၊တပ်ခွဲ၁၊တပ်ခွဲ၅၊ မုံရွာခရိုင်တပ်ရင်း-၂၅၊ မုံရွာခရိုင်တပ်ရင်း-၁၁ ၊ မုံရွာ ခရိုင် တပ်ရင်း၂၇ တပ်ခွဲ-၄၊ကမျဥ်းနီလက်နက်ကြီးတပ်ဖွဲ့ တို့က ပူးပေါင်းတိုက် ခိုက်ခဲ့ကြောင်း သိရှိရသည်။
