ရခိုင်ပြည်မှ ရိုဟင်ဂျာများကို ရှင်းလင်းစစ်ဆင်ရေးများ ဖြစ်ပွားခဲ့သည်မှာ ၇ နှစ်ရှိနေပြီဖြစ်ပြီး ကျူးလွန်သူများကို အပြစ်အရေးယူရန် IIMM က ကြိုးပမ်းနေ

ရန်ကုန်၊ ဩဂုတ် ၂၃

ရခိုင်ပြည်မှ ရိုဟင်ဂျာများကို ရှင်းလင်းစစ်ဆင်ရေးများ ဖြစ်ပွားခဲ့သည်မှာ ၇ နှစ်ရှိနေပြီဖြစ်ပြီး ကျူး လွန်သူ မြန်မာစစ်ခေါင်းဆောင်များကို အပြစ်အရေးယူရန် မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှု ယန္တရား(IIMM) က ကြိူးပမ်းနေကြောင်း IIMM အကြီးအကဲ Nicholas Koumjian က ပြောဆိုလိုက်သည်။

မြန်မာလုံခြုံရေးတပ်ဖွဲ့များ၏ ရက်စက်သည့် အကြမ်းဖက်မှုလှိုင်းများကြောင့် သိန်းနှင့်ချီသော ရိုဟင်ဂျာမိန်းမများ၊ ယောက်ျားများနှင့် ကလေးများသည် မြန်မာနိုင်ငံ ရခိုင်ပြည်နယ်ရှိ ၎င်းတို့၏ နေရပ်မှ စွန့်ခွာထွက်ပြေးခဲ့ရသည်မှာ ယခုသီတင်းပတ်တွင် ၇ နှစ်ပြည့်ပြီဖြစ်ကြောင်း၊ ရိုဟင်ဂျာများအနေဖြင့် ၎င်းတို့ ချစ်ခင်ရသူများနှင့် ပိုင်ဆိုင်မှုများကို ဆုံးရှုံးခဲ့ရပြီး အများအပြားမှာ ကြောက် မက်ဖွယ်ရာ လိင်ပိုင်းဆိုင်ရာ အကြမ်းဖက်မှုများ ခံခဲ့ရကြောင်း၊ အများစုမှာ အိမ်နီးချင်း ဘင်္ဂလားဒေ့ရှ်နိုင်ငံတွင် ဆက်လက်ခိုလှုံနေကြပြီး၊ မြန်မာနိုင်ငံရှိ ၎င်းတို့၏ နေရပ်သို့ လုံခြုံစွာ ပြန်လာနိုင်မည့်နေ့ကို စောင့်မျှော်နေကြဆဲဖြစ်ကြောင်း IIMM က ပြောသည်။

အဆိုပါ ကြောက်မက်ဖွယ် ရာဇ၀တ်မှုများအတွက် မည်သူတစ်ဦးတစ်ယောက်မျှ ပြစ်ဒဏ်ပေးခံရခြင်း မရှိသေးကြောင်း၊ ထို့ကြောင့် မြန်မာ နိုင်ငံရှိ ကျူးလွန်သူများအနေဖြင့် နောက်ဆက်တွဲဆိုးကျိုးကို ကြောက်စရာမလိုဘဲ အကြမ်းဖက်မှုများ ဆက်လက်လုပ်ဆောင်ရန် အတင့်ရဲလာစေကြောင်း၊ ရာဇ၀တ်မှုကျူးလွန်ခြင်းများကို အပြစ်ပေးနိုင်ခြင်းမရှိပါက အကြမ်းဖက်မှုများကို ပိုမိုကျူးလွန်ရန် အားပေးရာ ရောက်ကြောင်း၊ သို့ဖြစ်၍ ကျူးလွန်သူများ ပြစ်ဒဏ်ကင်းလွတ်နေသည့်သံသရာမှာ ကျိုးပျက်ရန် လိုအပ်ကြောင်း IIMM က ထောက်ပြထားသည်။

စစ်အုပ်ချုပ်ရေးအပေါ် ဆန့်ကျင်မှုများ ကြီးထွားလာသည်နှင့်အမျှ ရခိုင်ပြည်နယ်အပါအဝင် မြန်မာနိုင်ငံတစ်ဝှမ်းတွင် ယခုနှစ်အတွင်း လက်နက်ကိုင် ပဋိပက္ခများ မြင့်တက်လာခဲ့ကြောင်း၊ သတ်ဖြတ်မှု၊ ညှဉ်းပန်းနှိပ်စက်မှု၊ မုဒိမ်းမှုနှင့် ရွာများကို မီးရှို့ခြင်း စသည့် ထိတ်လန့်ဖွယ်ရာ သတင်းများနှင့်အတူ ရိုဟင်ဂျာများသည် အထူးထိခိုက်လွယ်သည့် အခြေအနေသို့ ကျရောက်နေကြောင်း၊ ယခုလ အစောပိုင်းတွင် အကြမ်းဖက်မှုမှ ထွက်ပြေးလာသည့် ရိုဟင်ဂျာများကို ဒရုန်းဖြင့် တိုက်ခိုက်မှုကြောင့် အရပ်သားအများအပြား သေဆုံးခဲ့ကြောင်း၊ မြန်မာနိုင်ငံဆိုင်ရာယန္တရားအနေဖြင့် ၎င်းရာဇ၀တ်မှုများအတွက် စုံစမ်းစစ်ဆေးမှုအသစ်များကို စတင်ပြီး၊ မည်သူတစ်ဦးတစ်ယောက်နှင့် ဆက်စပ်သည်ဖြစ်စေ ကျူးလွန်သူအားလုံး၏ အထောက်အထားများကို စုဆောင်းလျက်ရှိကြောင်း၊ သို့သော်လည်း ယခင်ဖြစ်ပွားခဲ့သည့် ရာဇ၀တ်မှုကျူးလွန်သူများကို ပြစ်ဒဏ်ပေးမှုမလုပ်နိုင်မချင်း ရက်စက် ကြမ်းကြုတ်မှု သံသရာသည် ဆက်လက်ရှိနေဦးမည်ဖြစ်ကြောင်း IIMM က ထုတ်ပြန်ပြောဆိုသည်။

နိုင်ငံတကာ တရားစီရင်ရေးသည် နှေးကွေးလေ့ရှိပြီး ခံစားရသည့်ဒုက္ခများ အဆုံးသတ်စေမည့် တရားမျှတမှုရရှိ‌ရေးကို မျှော်လင့်နေသည့် ထိခိုက်နစ်နာသူများအတွက် အဆိုပါ လုပ်ငန်းစဉ်က အလွန်စိတ်ပျက်စရာ ဖြစ်နိုင်ကြောင်း၊ မြန်မာနိုင်ငံဆိုင်ရာယန္တရား(IIMM) အနေဖြင့် အဆိုပါ စိတ်ပျက်အားမရမှုများကို သိရှိနားလည်ပြီး ရလဒ်များရရှိရေးအတွက် အကောင်းဆုံး ကြိုးစားအားထုတ် လုပ်ဆောင်လျက်ရှိကြောင်း သိရှိရသည်။

ဗီဒီယိုများ၊ ဓာတ်ပုံများ၊ ဆိုရှယ်မီဒီယာပို့စ်များနှင့် ဂြိုလ်တုပုံရိပ်များ အပါအဝင် များပြားလှသော အထောက်အထားများကို စုဆောင်းရရှိထားပြီး စိစစ်သုံးသပ်လျက်ရှိကြောင်း၊ ရာနှင့်ချီသော ရှင်သန်ကျန်ရစ်သူများ၊ မျက်မြင်သက်သေများနှင့် ရာဇ၀တ်မှု ကျူးလွန်ရန် အမိန့်ပေးစေခိုင်းမှုများအကြောင်း အတွင်းသတင်းသိသူများကိုလည်း တွေ့ဆုံမေးမြန်းမှုများ ပြုလုပ်လျက်ရှိကြောင်း သိရှိရသည်။

အပြည်ပြည်ဆိုင်ရာ ရာဇ၀တ်မှုတရားရုံး၊ အပြည်ပြည်ဆိုင်ရာတရားရုံးနှင့် အာဂျင်တီးနား နိုင်ငံရှိ ရိုဟင်ဂျာဆိုင်ရာအမှုများကို ဆောင်ရွက်နေသည့် တရားရေးအာဏာပိုင်များထံ အထောက်အထားနှင့် စိစစ်သုံးသပ်မှုများ မျှဝေမှုကို တိုးမြှင့်ဆောင်ရွက်လျက်ရှိပြီး ယနေ့အထိ အထောက် အထား အချက်အလက်နှင့် စိစစ်သုံးသပ်မှုပေါင်း တစ်သန်းကျော်ပါဝင်သည့် ဖိုင်တွဲ ၈၀ ကို မျှဝေပြီးဖြစ်ကြောင်း၊ ၎င်းတို့ထဲတွင် နယ်မြေ ရှင်းလင်းစစ်ဆင်ရေးများအတွင်း စစ်တပ်၏ လှုပ်ရှားဆောင်ရွက်မှုဆိုင်ရာ အစီရင်ခံစာများနှင့် ရိုဟင်ဂျာများမှ အကြမ်းဖက်မှုများ ကျူးလွန်ခံနေရသည့်အချိန်အတွင်း ၎င်းဒေသတွင်ရှိနေသော လက်နက်ကိုင်အဖွဲ့များ အပေါ် စိစစ်သုံးသပ်မှု အမျိုးမျိုးပါဝင်ကြောင်း၊ ထို့အပြင် နယ်မြေရှင်းလင်းစစ်ဆင်ရေး မလုပ်ဆောင်မီ၊ လုပ်ဆောင်နေစဥ်နှင့် လုပ်ဆောင်အပြီးတွင် ရိုဟင်ဂျာများ၏ ပိုင်ဆိုင်မှုများ ဆုံးရှုံးခြင်းနှင့် သိမ်းယူခံရခြင်း ဆိုင်ရာ အထောက်အထားများကို စုဆောင်းစိစစ်သုံးသပ်နေကြောင်း သိရှိရသည်။

ရိုဟင်ဂျာများအပေါ် ကျူးလွန်သည့် ရာဇ၀တ်မှုများအတွက် တာဝန်အရှိဆုံးသူများတွင် ရာဇ၀တ်မှုများကို အမိန့်ပေးစေခိုင်းသူများ၊ ၎င်းတို့ကွပ်ကဲမှုအောက်တွင် ကျူးလွန်သော ရာဇ၀တ်မှုများကို အပြစ်ပေးအရေးယူရန်ပျက်ကွက်သည့် တပ်မှုးများအပါအဝင် ၎င်းရာဇ၀တ်မှုများကို သွေးထိုးလှုံ့ဆော်သည့် အမုန်းစကားပြန့်ပွားရေးလှုပ်ရှားမှုတွင် အားပေးလုပ်ဆောင်သူများကို ဖော်ထုတ်လျက်ရှိကြောင်း၊ အဆိုပါ အထောက် အထားများကို နောင်တစ်ချိန် တရားခွင်တွင် တင်ပြရန်အတွက် ပြင်ဆင်ဆောင်ရွက်နေပြီး ပြစ်မှုကျူးလွန်သူများသည် ၎င်းတို့၏ လုပ်ရပ်များအတွက် ပြစ်ဒဏ်ပေးခံရမည်ဖြစ်ကြောင်း IIMM က သတိပေးသည်။

မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှုယန္တရား (IIMM သို့မဟုတ် ယန္တရား) ကို ၂၀၁၁ ခုနှစ် နောက်ပိုင်း မြန်မာနိုင်ငံတွင်ကျုးလွန်သည့် အကြီးလေးဆုံးသော နိုင်ငံတကာရာဇဝတ်မှုနှင့် တခြားသော နိုင်ငံတကာ ဥပဒေများ ချိုးဖောက်ခြင်းများအတွက် အထောက်အထားများ စုဆောင်းရန်နှင့် စိစစ်သုံးသပ်ရန် ၂၀၁၈ ခုနှစ်တွင် ကုလသမဂ္ဂ လူ့အခွင့်အရေးကောင်စီမှ ဖွဲ့စည်းခဲ့ကြောင်း၊ နိုင်ငံတွင်း၊ ဒေသတွင်းနှင့် နိုင်ငံတကာ တရားရုံးများတွင် လူပုဂ္ဂိုလ်များကို တရားစွဲဆိုရာတွင် အသုံးပြုနိုင်မည့် အထောက်အထားများကို ထိန်းသိမ်းစုစည်းကာ အမှုတွဲများကိုပြင်ဆင်ခြင်းဖြင့်တရားမျှတမှုနှင့် တာဝန်ခံမှုများ ဖြစ်ထွန်းလာရေးကူညီရန် ရည်ရွယ်ကြောင်း IIMM က ထုတ်ပြန် ပြောဆိုထားသည်။

ဓာတ်ပုံ – ရိုဟင်ဂျာ လူမျိုးတုန်းသတ်ဖြတ်မှုအတွက် တာဝန်အရှိဆုံးသော မင်းအောင်လှိုင် အပါ အဝင် မြန်မာ စစ်ခေါင်းဆောင်များ။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar