ပုလောနှင့် တနင်္သာရီမြို့နယ်တို့တွင် စစ်တပ်နှင့်တော်လှန်ရေးတပ်များ တိုက်ပွဲဖြစ်ပွားနေပြီး စစ်ကောင်စီတပ်စခန်းများကို ဦးတည်တိုက်ခိုက်နေ

ရန်ကုန်၊ ဩဂုတ် ၂၈

တနင်္သာရီတိုင်း၊ ပုလောမြို့နယ်နှင့် တနင်္သာရီမြို့နယ်တို့တွင် စစ်တပ်နှင့်တော် လှန်ရေးတပ်များ တိုက်ပွဲဖြစ်ပွားနေပြီး စစ်ကောင်စီတပ်စခန်းများကို တော် လှန်ရေးတပ်များက ဦးတည်တိုက်ခိုက်နေကြောင်း တော်လှန်ရေးသတင်းရင်းမြစ်နှင့် ဒေသပြည်သူများထံမှ သိရှိရသည်။

ဩဂုတ်လ ၂၆ ရက်နေ့မှစတင်ပြီး ယနေ့အချိန် တနင်္သာရီတိုင်း၊ တနင်္သာရီမြို့နယ်၊ ၆ မိုင်ကျေးရွာတွင် စစ်ကောင်စီတပ်များနှင့် တော်လှန်ရေးတပ်များအကြား တိုက်ပွဲဖြစ်ပွားလျက်ရှိကြောင်း၊ ကားလမ်းများပိတ်ထားပြီး ခရီးသည်တင်ကားများအပါအဝင် အိမ်စီးကားများ ပိတ်မိနေကြောင်း သိရှိရသည်။

“မြိတ်ခရိုင်၊ပြည်သူ့ကာကွယ်ရေး ပူးပေါင်းစစ်ကြောင်း ၁ နဲ့ စစ်ခွေးတွေ တိုက်နေတာပါ။ ဩဂုတ်လ ၂၆ ရက်နေ့ကတည်းက ။ ပြည်သူတွေကတော့ အကုန်ရှောင်နေရတယ်။ ကားတွေလည်း ပိတ်မိနေတာရှိတယ်”ဟု ဒေသစစ်ရေးသတင်းရင်းမြစ်က ပြောဆိုသည်။

ထို့အတူ ယနေ့ နံနက် ၇ နာရီအချိန် ပုလေမြို့နယ် ရှပ်ပုံစံပြကျေးရွာတွင်လည်း စစ်ကောင်စီတပ်များနှင့် တော်လှန်ရေးတပ်များ တိုက်ပွဲများဖြစ်ပွားနေကြောင်း၊ ပုလော PDF ဦးဆောင်သော ပူးပေါင်းမဟာမိတ်တပ်များနှင့် စစ်တပ်အကြား တိုက်ပွဲဖြစ်ပွားနေခြင်းဖြစ်ကြောင်း တော်လှန်ရေး သတင်းရင်းမြစ်က ပြောဆိုသည်။

ထို့ပြင် သြဂုတ်လ ၁၇ ရက်နေ့နှင့် ဩဂုတ်လ ၂၇ ရက်နေ့တို့တွင် ပုလောမြို့နယ်ပြည်သူ့ကာကွယ်ရေးအဖွဲ့ ( ပုလော ပ.က.ဖ) Drone တပ်စိတ် (Shadow Squad) က ပုလောမြို့နယ်၊ မကျည်းကုန်းကျေးရွာ၊ အော်သာယာတောင်ပေါ်ရှိ အကြမ်းဖက်စစ်ကောင်စီ ဆက်သွယ်ရေးတာဝါတိုင်စခန်းကို ပြည်သူ့ကာကွယ်ရေးတပ်မတော်(PDF) မြိတ်ခရိုင် အမှတ် ၁ တပ်ရင်းနှင့် ပူးပေါင်း၍ ဒရုန်းဖြင့် ဗုံး ၁၀ ကြိမ်ထက်မနည်း ဗုံးကျဲ တိုက်ခိုက်ခဲ့ကြောင်း ပုလောမြို့နယ်ပြည်သူ့ကာကွယ်ရေးအဖွဲ့—ပုလော ပကဖမှ တာဝန်ရှိသူက ရန်ကုန်ခေတ်သစ်သတင်းဌာနထံသို့ ပြောဆိုသည်။

စစ်ကောင်စီတပ်၏ ဆက်သွယ်ရေးတာဝါတိုင်တောင်ကုန်းပေါ်သို့ ဗုံး များကျရောက်ပေါက်ကွဲခဲ့ပြီး စစ်သား ၂ ဦး ထိခိုက်ဒဏ်ရာရှိခဲ့ကြောင်း၊ စစ်ကောင်စီ၏ တာဝါတိုင်စခန်းကုန်းမှ မှော်ကြောင်းကျေးရွာ၊ ခမောင်းတောကျေးရွာ နှင့် အော်သာယာ ဘက်သို့ လက်နက်ကြီးများ ပြန်လည်ပစ်ခတ်ခဲ့ပြီး ခလရ ၂၈၅ အတွင်းမှလည်းအော်သာယာ နှင့်ခမောင်းတောကျေးရွာဘက်သို့လည်း လက်နက်ကြီးများ ရမ်းသမ်းပစ်ခတ်ခဲ့ကြောင်း သိရှိရသည်။

တော်လှန်ရေးတပ်များက တိုက်ခိုက်ခဲ့သော အော်သာယာတောင်ပေါ်ရှိတာဝါတိုင်စခန်းကုန်းသည် မှော်ကြောင်းကျေးရွာ၊လက္ကူးကျေးရွာ၊မြဒေါင်ကျေးရွာ၊မင်းထိန်ကျေးရွာ၊ ခမောင်းတောကျေးရွာနှင့် အော်သာယာ ဘက် သို့ လက်နက်ကြီးများ မကြာခဏ ပစ်ခတ်လေ့ရှိသော စခန်းကုန်းဖြစ်ကြောင်း သိရှိရသည်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar