ဆီဆိုင်မြို့နယ်၊ တွေပူးကျေးရွာ သူကြီးကို စစ်ကောင်စီလက်အောက်ခံ PNO ပြည်သူ့စစ်အဖွဲ့က ဖမ်းဆီး
ရှမ်းပြည်နယ်တောင်ပိုင်း၊ ဆီဆိုင်မြို့နယ်၊ တွေပူးကျေးရွာ ရွာသူကြီး ဖြားဒုံးကျော်ကို အကြမ်းဖက် စစ်ကောင်စီ လက်အောက်ခံ PNO ပြည် သူ့စစ်အဖွဲ့က ဖမ်းဆီးသွားကြောင်း PNLA သတင်းနှင့်ပြန် ကြားရေး တာဝန်ရှိသူ ခွန်ရိန်းယံက ရန်ကုန်ခေတ်သစ်သတင်းဌာနသို့ ပြောကြားသည်။
ယမန်နေ့ ဒီဇင်ဘာ ၇ ရက် ည ၁၁ နာရီအချိန်က ဆီဆိုင်မြို့နယ် တွေပူးကျေးရွာ ရွာသူကြီး ဖြားဒုံး ကျော်ကို အကြမ်းဖက် စစ်ကောင်စီလက် အောက်ခံ PNOပြည်သူ့စစ်အဖွဲ့ နေအိမ်အတွင်း ဝင်ရောက် ဖမ်းဆီးသွားခြင်းဖြစ်ပြီး မည်သည့်နေရာတွင် ဖမ်းဆီးထားသည်ကို သိရှိရခြင်းမရှိသေး သလို အဆက် အသွယ်လည်း ရရှိခြင်းမရှိကြောင်း သိရသည်။
“စစ်ကောင်စီလက်အောက်ခံ ပြည်သူ့စစ်က ရွာသူကြီးကို ဖမ်းသွားတာ၊ တွေပူးရွာရဲ့ ရွာသူကြီးကို ဖမ်းသွားတာဖြစ်ပါတယ်။ အခုထိအဆက် အသွယ်လည်းမရဘူး။ ပြန်လည်မလွတ်လာသေးဘူးလို့ သတင်းရပါတယ်။ ရွာသူကြီးဆိုတာ ရွာသူ၊ ရွာသားတွေက စုပေါင်းမဲပေးပြီးတော့ ရွေးချယ်ထားတဲ့ ရွာသူကြီးဖြစ်ပါတယ်။ ပအိုဝ်းဒေသမှာ ဒီမိုကရေစီနည်းကျကျ ရွေးချယ်ထားတဲ့ ရပ်ရွာခေါင်း ဆောင်ဖြစ်ပါတယ်။ ဒါမျိုးအလုပ် လုပ်တာက ဒီမိုကရေစီကို သတ်ဖြတ်နေတာနဲ့အတူတူပါပဲ။ ပြီး တော့ရွာသူကြီးရဲ့ အသက်အန္တရာယ်ကိုလည်း စိုးရိမ်နေရပါတယ်” ဟု PNLA သတင်းနှင့်ပြန် ကြားရေး တာဝန်ရှိသူ ခွန်ရိန်းယံက ရန်ကုန်ခေတ်သစ်သတင်းဌာနသို့ ပြောကြားသည်။
ကျေးရွာသူကြီး ဖြားဒုံးကျော်ဖမ်းဆီးခံရမှုနှင့်ပတ်သက်၍မည်သည့်နေရာတွင် ထိန်းသိမ်းထားသည်ကို သိရှိနိုင်ရန် ကျေးရွာနေ ပြည်သူများက လိုက်လံ စုံစမ်းနေဆဲဖြစ်ကြောင်း သိရသည်။
ဧပြီလ ၈ ရက်နေ့တွင်လည်း အကြမ်းဖက်စစ်ကောင်စီနှင့်လက်အောက်ခံ PNO ပြည်သူ့ စစ်အဖွဲ့က လက်နက်ကြီးဖြင့် တွေပူးကျေးရွာအတွင်းကို ပစ်ခတ်ခဲ့ရာ ကျောင်းသူတစ်ဦးသေဆုံးပြီး နှစ်ဦးထိခိုက်ဒဏ်ရာရရှိခဲ့ကြောင်း သိရသည်။
ဓာတ်ပုံ- PNO ခေါင်းဆောင်နှင့် အကြမ်းဖက် စစ်ခေါင်းဆောင်တို့ တွေ့ဆုံနေစဉ်။ (ပုံအဟောင်းဖြစ်ပါသည်။)
