ရန်ကုန်၊ ဒီဇင်ဘာ ၁၀
မြန်မာအကြမ်းဖက်စစ်တပ်မှ ဒုတိယဗိုလ်မှူးကြီး အဆင့်မှ ဒုရဲမှူးအဆင့်အထိ အပါအဝင် စစ်ကောင်စီတပ်ဖွဲ့ဝင် ၄၇၅ ဦး ယခုနှစ် ၁၁ လအတွင်း အလင်းဝင်လာကြောင်း NUG အမျိုးသားညီညွတ်ရေးအစိုးရ၊ ဝန်ကြီးချုပ်ရုံးပြောရေးဆိုခွင့်ရှိသူ ဦးနေဘုန်းလတ်က ပြောဆိုသည်။
NUG ၏ ပြည်သူလူထုနှင့်နိုင်ငံတကာသို့ သတင်းစကားပြောကြားခြင်း (Press Briefing) အစီအစဉ် ၄/၂၀၂၄ တွင် ၎င်းက အထက်ပါအတိုင်း ပြောဆိုခြင်းဖြစ်သည်။
အမျိုးသားညီညွတ်ရေးအစိုးရအနေဖြင့် သွေးထွက်သံယိုမှုနည်းနိုင်သမျှနည်းနည်းဖြင့် တော်လှန်ရေးအောင်မြင် နိုင်ရေး ရှေးရှုပြီး ပြည်သူ့ရင်ခွင်ခိုလှုံရေးအစီအစဉ်အကောင်အထည်ဖော်မှုကော်မတီ ကို ဖွဲ့စည်းဆောင်ရွက်ခဲ့ကြောင်း၊ အဆိုပါ ကော်မတီက အကြမ်းဖက်စစ်ခေါင်းဆောင်များနှင့် လမ်းခွဲပြီး ပြည်သူ့ရင်ခွင်ခိုလှုံလာမည့် စစ်သားနှင့် ရဲတပ်ဖွဲ့ဝင်များကို စိစစ်လက်ခံကူညီပေးလျက်ရှိကြောင်း၊ ယခုနှစ် ဇန်နဝါရီလမှ နိုဝင်ဘာလအထိ ၁၁ လအတွင်း ပြည်သူ့ရင်ခွင်သို့ ဆက်သွယ်ခိုလှုံဝင်လာသော ခြေလျင်တပ်သား ၃၀၂ ဦး ၊ ရေတပ်သား ၁၁ ဦး၊ လေတပ်သား ၁၁ ဦး၊ ရဲတပ်ဖွဲ့ဝင် ၁၃၃ ဦး၊ အကျဉ်းဦးစီးဝန်ထမ်း ၅ ဦး စုစုပေါင်း (၄၇၅) ဦးရှိခဲ့ကြောင်း၊ ရာထူးအားဖြင့် စစ်တပ်ဘက်မှ ဒုတိယဗိုလ်မှူးကြီးအဆင့်အထိ ပါဝင်ခဲ့ပြီး ရဲတပ်ဖွဲ့ဘက်မှ ဒုရဲမှူးအဆင့်အထိ ပါဝင်ခဲ့ကြောင်း၊ အဆိုပါ ၄၇၅ ဦးတွင် ၁၉၁ ဦးမှာ လက်နက်နှင့်အတူ ဝင်ရောက်လာသူများဖြစ်ကြောင်း သိရှိရသည်။
ထို့ပြင် ၁၁ လအတွင်း ပြည်သူ့ရင်ခွင်ခိုလှုံခဲ့သူများတွင် စစ်မှုထမ်းဆင့်ခေါ်ခံရသော တပ်သားသစ် စုစုပေါင်း ၃၃ ဦးပါဝင်ကြောင်း၊ ၃ နှစ်ကျော်ကာလအတွင်း စစ်သား ၃,၇၀၀ ဦးကျော်နှင့် ရဲတပ်ဖွဲ့ဝင် ၁၁,၀၀၀ ဦးကျော် စုစုပေါင်း ၁၅,၀၀၀ ဦးခန့် ပြည်သူ့ရင်ခွင်ခိုလှုံလာခဲ့ကြောင်း၊ ပြည်သူ့ရင်ခွင်ခိုလှုံခဲ့သူများနှင့် ၎င်းတို့၏ မိသားစုဝင်များကို လုပ်ထုံးလုပ်နည်းများနှင့်အညီ ကူညီပံ့ပိုးပေး လျက်ရှိကြောင်း သိရှိရသည်။
ပြည်သူ့ရင်ခွင်ခိုလှုံရေးအစီအစဉ်အကောင်အထည်ဖော်မှုကော်မတီဖြင့် ချိတ်ဆက်လာခြင်းမရှိဘဲ နည်းလမ်း ပေါင်းစုံဖြင့် အကြမ်းဖက်စစ်ခေါင်းဆောင်များနှင့် လမ်းခွဲခဲ့ကြသူများ၊ တနည်းနည်းဖြင့် တပ်တွင်းအာဏာဖီဆန်မှု ပြုလုပ်နေကြသူများ၊ တပ်အတွင်းမှ တော်လှန်ရေးကို တနည်းတဖုံဖြင့် ကူညီပံ့ပိုးပေးနေကြသူများလည်းရှိကြောင်း ဦးနေဘုန်းလတ်၏ အဆိုအရ သိရှိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
