ရန်ကုန်၊ ဇန်နဝါရီ ၁၇
အရှေ့တောင်အာရှနိုင်ငံများအနေဖြင့် အွန်လိုင်းလောင်းကစားနှင့် ကျားဖြန့် တယ်လီကွန်းငွေလိမ်လည်မှုများ နှိမ်နင်းရန် ပြတ်သားပြင်းထန်သော စီမံချက်များဖြင့် ဆောင်ရွက်ကြရန် တရုတ်နိုင်ငံခြားရေးဝန်ကြီး Wang Yi က ဇန်နဝါရီ ၁၆ ရက်က တောင်းဆိုခဲ့ကြောင်း၊ ထိုင်း-မြန်မာနယ်စပ်တလျှောက် အွန်လိုင်းလောင်းကစားနှင့် ကျားဖြန့်ငွေလိမ်လည်မှုများက တရုတ်နိုင်ငံသားများနှင့် အခြား နိုင်ငံသားများကို ခြိမ်းခြောက်နေသည့်အပြင် အန္တရာယ်ရှိနေကြောင်း တရုတ်နိုင်ငံခြားရေးဝန်ကြီးဌာန၏ ထုတ်ပြန်ချက်တွင် ဖော်ပြထားသည်။
အပြည်ပြည်ဆိုင်ရာ ခရီးသွားများအားလုံး ဘေးကင်းလုံခြုံစွာ ခရီးသွားလာနိုင်သော ပတ်ဝန်းကျင် ဖြစ်ပေါ်လာစေရေးအတွက် တရုတ်နိုင်ငံက အာဆီယံနိုင်ငံများနှင့် ပူးပေါင်းဆောင်ရွက်မှု တိုးမြှင့်ရန် ဆန္ဒရှိကြောင်း ဒေသတွင်း သံတမန်များနှင့် တွေ့ဆုံစဉ် တရုတ်နိုင်ငံခြားရေးဝန်ကြီး Wang Yi က ပြောကြားခဲ့သည်။
အာဆီယံနိုင်ငံများနှင့် လုံခြုံရေး ပူးပေါင်းဆောင်ရွက်မှုကို တိုးမြှင့်ရန် တရုတ်နိုင်ငံ၏ ကမ်းလှမ်းချက်သည် အရှေ့တောင်အာရှတွင် ကျားဖြန့် ငွေလိမ်လည်မှုနှင့် လူမှောင်ခိုကူးမှုတို့ကြောင့် ကြီးထွားလာနေသော ခြိမ်းခြောက်မှုအပေါ် ဘေဂျင်း၏ စိုးရိမ်မှုကို အလေးပေးဖော်ပြသည်။
နယ်စပ်ဖြတ်ကျော်မှုခင်းများကို ကိုင်တွယ်ဖြေရှင်းရန် မြန်မာနှင့် ထိုင်းနိုင်ငံတို့ ပါဝင်သော အာဆီယံအဖွဲ့နှင့် ပေါင်းစပ်ညှိနှိုင်းရေး အားကောင်းလာစေရန်အတွက် တရုတ်က အရေးပေါ်အခြေအနေသစ်တစ်ရပ်ကိုလည်း အကြံပြုထားသည်။
တရုတ် ခရီးသွားများသည် အိမ်နီးချင်း အရှေ့တောင်အာရှ နိုင်ငံများအတွက် အမေရိကန်ဒေါ်လာဘီလီယံချီ နှစ်စဉ် ဝင်ငွေ ရရှိသော အရင်းအမြစ် တစ်ခုလည်း ဖြစ်သည်။
သို့သော်လည်း ထိုင်း-မြန်မာနယ်စပ်မှ လူကုန်ကူးမှုနှင့် လူကုန်ကူးခံရသော အခြေအနေများက တရုတ်လူမှုကွန်ရက်မီဒီယာတွင် ပျံ့နှံ့နေပြီး တရုတ်ခရီးသွားများကို စိုးရိမ်ပူပန်စေကာ တရုတ်ခရီးသွားများ လူကုန်ကူးခံရမှုများက အရှေ့တောင်အာရှသို့ ခရီးသွားများ လည်ပတ်မှုကို အတားအဆီးဖြစ်လာစေသည်။
ထိုင်း-မြန်မာနယ်စပ်အနီးတွင် ယခုလအစောပိုင်းက ပျောက်ဆုံးသွားသည့် တရုတ်သရုပ်ဆောင်တစ်ဦး၏ ဖြစ်စဉ်က လူကုန်ကူးမှု၏ သားကောင်ဖြစ်ခဲ့ရကြောင်း ထိုင်းအာဏာပိုင်များက ထုတ်ဖော်ပြောဆိုထားသည်။
ပြည်ပ အလိမ်အညာဂိုဏ်းအစုအဖွဲ့များက တရုတ်နိုင်ငံသားများကို လစာများသော အလုပ်အကိုင်၊ အစား အသောက်၊ နေရာထိုင်ခင်းနှင့် လေယာဉ်လက်မှတ်များ ပေးမည်ဟု ဆိုခဲ့သော်လည်း ထိုင်း-မြန်မာ နယ်စပ်၊မြ၀တီမြို့တွင် တယ်လီကွန်းငွေလိမ်လည်ဂိုဏ်များ၏ လျှို့ဝှက်နေရာများတွင် ပိတ်ခံထားရကြောင်း တရုတ်အစိုးရက သတိပေးထားသည်။
ထိုင်းနိုင်ငံအနေဖြင့် နိုင်ငံတကာ ခရီးသွားများအတွက် ဘေးကင်းလုံခြုံသော ခရီးသွားနိုင်ငံအဖြစ် ပုံရိပ်ထိခိုက်စေသော အွန်လိုင်းငွေလိမ်လည်မှုနှင့် လူကုန်ကူးမှု ပြဿနာများကို အရှိန်မြှင့်တင် ကိုင်တွယ်ဖြေရှင်းရန် သဘောတူညီထားကြောင်း တရုတ်ဆင်ဟွာက သတင်းဖော်ပြသည်။
ထိုင်းနိုင်ငံသည် ပြီးခဲ့သည့်နှစ်က မြဝတီမြို့ရှိ အွန်လိုင်း ကျားဖြန့်ငွေလိမ်လည်မှုစင်တာများတွင် ပိတ်မိနေသည့် တရုတ်နိုင်ငံသား ၉၀၀ ခန့်ကို ကူညီကယ်ထုတ် လွှဲပြောင်းပေးခဲ့ကြောင်း သိရှိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
