မိုင်းဆတ်မြို့၊ ထပခ ၈၂၃ တပ်ခွဲတွင် ရုံးအုပ် ဒုအရာခံဗိုလ် မျိုးဇော်ဆတ်က စစ်မှုထမ်း တပ်သားသစ်များကို အကြောင်းမဲ့ ရိုက်နှက်သဖြင့် တပ်သားတချို့ မသန်စွမ်းဖြစ်
ရှမ်းပြည်နယ်၊ မိုင်းဆတ်မြို့၊ ထပခ ၈၂၃ တပ်ခွဲတွင် ရုံးအုပ် ဒုအရာခံဗိုလ် မျိုးဇော်ဆတ်က စစ်မှုထမ်း တပ်သားသစ်များကို အကြောင်းမဲ့ ရိုက်နှက်မှုကြောင့် မသန်စွမ်း ဖြစ်သွားသူများရှိကြောင်း တပ်တွင်း သတင်းရင်းမြစ်က ရန်ကုန်ခေတ်သစ် သတင်းဌာနထံသို့ ပြောဆိုသည်။
အမှတ် ၈၂၃ ထောက်ပံ့နှင့် ပို့ဆောင်ရေးတပ်ခွဲတွင် ရုံးအုပ် ဒုအရာခံဗိုလ် မျိုးဇော်ဆတ်သည် တပ်တွင်းကြီးနိုင်ငယ်ညှဉ်း နှိပ် စက်မှုများကို ကျူးလွန်နေသူများဖြစ်ပြီး တပ်ထဲသို့ အသစ်ရောက်ရှိလာသည့် စစ်မှုထမ်း တပ်သားသစ် လူငယ်များကို ပစ်မှတ်ထား၍ ရိုက်နှက်မှုများ ပိုမိုလုပ်ဆောင်ကြောင်း သိရသည်။
ရုံးအုပ် ဒုအရာခံဗိုလ် မျိုးဇော်ဆတ်သည် တပ်အတွင်း ၎င်းဖွင့်လှစ်ထားသော ဈေးဆိုင်၌ တပ်သားသစ်များ ဈေးမဝယ်ဘဲ တခြားဆိုင်များတွင် သွားရောက်ဝယ်ယူပါက ဆဲဆို ကြိမ်းမောင်းပြီး ရန်ငြိုးထား၍ ရိုက်နှက်မှုများရှိကြောင်း၊ တပ်သားသစ်များက ၎င်းဆိုင်တွင် ဈေးမဝယ်ယူခြင်းသည် လစာငွေထဲမှ စိတ်ကြိုက်ငွေဖြတ်ယူပြီး ကျန်ငွေကိုသာ ပေးသောကြောင့် ဈေးမဝယ်ယူခြင်းဖြစ်ကြောင်း သိရှိရသည်။
ထိုသို့ ၎င်းဈေးဆိုင်တွင် ဈေးလာရောက် ဝယ်ယူခြင်းမရှိသော တပ်သားသစ်များကိုလည်း ရန်ငြိုးထား၍ အပြစ်မရှိ အပြစ်ရှာကာ အကြောင်းမဲ့ ရိုက်နှက်ခြင်းကြောင့် မသန်းစွမ်းဖြစ်သွားသည့် တပ်သားသစ်များရှိကြောင်း၊ ၎င်းနှိပ်စက်မှုများကြောင့် ထွက်ပြေးသည့် တပ်သားသစ်များရှိပြီး ပြန်လည် ဖမ်းဆီးမိပါကလည်း ထပ်မံရိုက်နှက်မှုများလုပ်ဆောင်ကြောင်း၊ လွတ် မြောက်သွားသူများ၏ စာရင်းကိုလည်း အထက်ကို သတင်းမပို့ဘဲ လစာများကို ထုတ်ယူမှုများ ရှိကြောင်း သိရသည်။
ရုံးအုပ် ဒုအရာခံဗိုလ် မျိုးဇော်ဆတ် နှိပ်စက်မှုကြောင့် တပ်တွင်းမှ ထွက်ပြေးသွားသည့် တပ်သားသစ် ကိုအေးသူရနှင့် ကိုသက်နိုင်ဦးမှာလည်း လက်ရှိချိန်ထိ အဆက်အသွယ်မရဘဲ ပျောက်ဆုံးနေသော်လည်း ၎င်းတို့၏ လစာများကို မျိုးဇော်ဆတ်က ဆက် လက် ထုတ်ယူနေဆဲဖြစ်ကြောင်း သိရှိရသည်။
“မိုင်းဆတ်မြို့ ထပခ ၈၂၃ တပ်မှာ ဒုအရာခံဗိုလ် မျိုးဇော်ဆတ်က တပ်ထဲမှာ ကြီးနိုင်ငယ်ညှဉ်း နှိပ်စက်တာတွေများလို့ မနေချင်တဲ့ စစ်မှုထမ်း တပ်သားသစ်တွေ အများကြီးရှိပါတယ်။ အဆိုးဆုံးကတော့ ရုံးအုပ်က သူဖွင့်ထားတဲ့ဆိုင်မှာ ဈေးမဝယ်ရင် ပိုပြီး နှိပ်စက်တယ်လို့ပြောပါတယ်။ တခြားဆိုင်မှာ ဈေးဝယ်ရင် မင်းတို့ငါ့ အကြောင်း သိမယ်လို့လည်း ခြိမ်းခြောက်ပါတယ်။ ဈေးဝယ်ရင်လည်း ဘယ်လောက်ကျလည်းဆိုတာ မသိရဘဲ လကုန်ရင် လစာထဲက သူ့စိတ်ကြိုက် အကုန်ဖြတ်ပါတယ်။ ဈေးမဝယ်တဲ့ သူတွေကို ရန်ငြိုးထား ရိုက်နှက်တာ သူနှိပ်စက်လို့ ဒုက္ခိတ ဖြစ်နေတဲ့ သူတွေလည်းရှိပါတယ်။ ထွက်ပြေးတဲ့ တပ်သားသစ်လေးတွေကိုလည်း ဖမ်းမိရင် ရိုက်နှက်ကြပါတယ်။ လွတ်သွားတဲ့ သူတွေရဲ့ စာရင်းကိုလည်း အထက်ကို မတင်ပြဘဲ လစာကို သူတို့ပဲ ထုတ်ယူပါတယ်။ တပ်သားသစ် အေးသူရနဲ့ သက်နိုင်ဦးတို့ ၂ ဦးလည်း ထွက်ပြေးရင်းနဲ့ ပျောက်ဆုံးနေတာ ကြာပါပြီ သေလားရှင်လား မသိရလို့ စိတ်ပူနေရပါတယ်” ဟု တပ်တွင်း သတင်းရင်းမြစ်က ပြောဆိုသည်။
ဓာတ်ပုံ- ရှမ်းပြည်နယ်မှ ပြည်သူ့စစ်နှင့် စစ်မှုထမ်း တပ်သားသစ်တချို့။
