လက်ပံတန်းတွင် စစ်မှုထမ်းရမည့် လူငယ်များ စာရင်းကို ထွေ/အုပ်ရုံးသို့ သွားပို့သည့် မှော်အင်းကျေးရွာအုပ်စု အုပ်ချုပ်ရေးမှူး သန်းဦး ပစ်ခတ်ခံရ၍ သေဆုံးပြီး လက်ပစ်ဗုံး ၂ လုံး သိမ်းဆည်းရရှိ

ရန်ကုန်၊ ဖေဖော်ဝါရီ ၂၄

ပဲခူးတိုင်း၊ လက်ပံတန်းမြို့နယ်တွင် စစ်မှုထမ်းရမည့် လူငယ်များ၏ စာရင်းကို ထွေ/အုပ်ရုံးသို့ သွားရောက်ပို့ဆောင်သည့် မှော်အင်းကျေးရွာအုပ်စု အုပ်ချုပ်ရေးမှူး သန်းဦးကို ပစ်ခတ် တိုက်ခိုက်ရာ သေဆုံးခဲ့ကြောင်း သာယာဝတီခရိုင် PDF မှ တာဝန်ရှိသူ တစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။

ဖေဖော်ဝါရီလ ၂၄ ရက်နေ့ နံနက် ၈ နာရီ ၁၀ မိနစ်ခန့်တွင် လက်ပံတန်းမြို့နယ်၊ မှော်အင်းကျေးရွာအုပ်စု အုပ်ချုပ်ရေးမှူး ပျူခေါင်းဆောင် သန်းဦးသည် ၄င်း၏ အပေါင်းအပါ ပျူစောထီး ၁ ဦး ၊ ရာအိမ်မှူး ၁ ဦးနှင့်အတူ လက်ပံတန်းမြို့နယ် ထွေ/အုပ်ရုံးသို့ စစ်မှုထမ်းရမည့် လူငယ်များ၏ စာရင်းကို ဆိုင်ကယ်ဖြင့်သွားရောက်ပို့ဆောင်စဉ် လွှစင်ကုန်းတာဆုံ၌ သာယာဝတီခရိုင် တပ်ရင်း ၃၈၀၂ တပ်ခွဲ ၂ နှင့် တပ်ခွဲ ၃ ရဲဘော်များက ပစ်ခတ် တိုက်ခိုက်ခဲ့ရာ သေနတ်ကျည် ၁၂ ချက် ထိမှန်ပြီး အုပ်ချုပ်ရေးမှူး သန်းဦး ပွဲချင်းပြီး သေဆုံးခဲ့ကြောင်း သိရသည်။

အုပ်ချုပ်ရေးမှူး သန်းဦး ပစ်ခတ်ခံရပြီးနောက် ၎င်းနှင့် လိုက်ပါလာသော ပျူစောထီး ၁ ဦးနှင့် ရာအိမ်မှူး ၁ ဦးမှာ ထွက်ပြေး လွတ်မြောက်သွားကြောင်း၊ သန်းဦးထံမှ လက်ပစ်ဗုံး ၂ လုံး ၊ ငွေသားကျပ် ၁ သိန်း ၊ ဆိုင်ကယ် ၁ စီး ၊ စည်းတံဆိပ်တုံး ၂ ခု ၊ မှတ်ပုံတင် ၂ ခု ၊ စစ်မှုထမ်း ရမည့် အမည်စာရင်းပါ စာရွက်စာတမ်းများ နှင့် အခြား စာရွက်စာတမ်းများ သိမ်းဆည်းရရှိခဲ့ကြောင်း သိရှိရသည်။

သေဆုံးသွားသော အုပ်ချုပ်ရေးမှူး သန်းဦး သည် အကြမ်းဖက် စစ်တပ် လက်အောက်ခံ ပျူစောထီး အဖွဲ့ ခေါင်းဆောင်ဖြစ်ပြီး လူငယ်များကို စစ်မှုထမ်းရန် ဖိအားပေး လူစုခြင်း၊ စစ်မှုထမ်းကြေးဟုဆိုကာ ပြည်သူများထံမှ ငွေကြေးများ အတင်းအကြပ် ကောက်ခံပြီး ငွေမပေးနိုင်သူများကို စစ်တပ်ခေါ်၍ ဖမ်းဆီးခိုင်းခြင်း၊ အကြမ်းဖက် စစ်တပ်က ထုတ်ပေးထားသော လက်ပစ်ဗုံး နှင့် သေနတ်ပြကာ ပြည်သူများကို ခြိမ်းခြောက်ပြီး အကြောင်းအမျိုးမျိုးပြ၍ ငွေကြေးကောက်ခံခြင်းများ ပြုလုပ်နေကြောင့် တိုက်ခိုက်ရခြင်းဖြစ်ကြောင်း သာယာဝတီခရိုင် PDF မှ တာဝန်ရှိသူ တစ်ဦးက ရှင်းပြသည်။

“ဒီမနက် အုပ်ကြီးသန်းဝင်း က စစ်မှုထမ်းရမည့် လူငယ်တွေရဲ့ စာရင်းကို ထွေ/အုပ်ရုံး သွားပို့မယ် သတင်းရလို့ လွှစင်ကုန်းတာဆုံမှာ စောင့်နေတုန်း အုပ်ကြီးက ဆိုင်ကယ် ၁ စီး ပျူစောထီးနဲ့ ရာအိမ်မှူးက ဆိုင်ကယ် ၁ စီးကို အတူစီးလာကြပါတယ်။ အဲ့မှာအုပ်ကြီးကို သေနတ်နဲ့ ၁၂ ချက် ပစ်တာ ရင်ဘတ်နဲ့ ခေါင်းတွေရော တခြားနေရာတွေရော မှန်ပြီးသေပါတယ်။ အုပ်ကြီးသေတာမြင်ရော ပျူနဲ့ ရာအိမ်မှူးက ဆိုင်ကယ်နဲ့ ထွက်ပြေးကြပါတယ်။ ဒီအုပ်ကြီးက စစ်ခွေးတွေပေးထားတဲ့ သေနတ်နဲ့လက်ပစ်ဗုံးကိုင်ပြီး ပြည်သူကိုခြိမ်းခြောက်နေတာ လူငယ်တွေကို စစ်ခွေးတပ်ထဲ အတင်းအကြပ်ထည့်နေတာကြာပြေ အခြေအနေပေးလို့ ခုမှရှင်းနိုင်တာ” ဟု သာယာဝတီခရိုင် PDF မှ တာဝန်ရှိသူ တစ်ဦးက ပြောဆိုသည်။

ပြည်သူများနှင့် တော်လှန်ရေးတပ်ဖွဲ့များကို ဒုက္ခပေးနေကြသည့် အကြမ်းဖက် စစ်ကောင်စီ နှင့် စစ်ကောင်စီ ထောက်တိုင်များကို အရှိန်မြှင့် တိုက်ခိုက်သွားမည် ဖြစ်သောကြောင့် ပြည်သူများအနေဖြင့် ၄င်းတို့အနီး သွားလာနေထိုင် ခြင်းများ လုံးဝ (လုံးဝ) မပြုလုပ်ကြရန် မေတ္တာရပ်ခံကြောင်း သာယာဝတီခရိုင် PDF မှ တာဝန်ရှိသူ တစ်ဦးက ဆက်လက် ပြောဆိုသည်။

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar