ရန်ကုန်၊ ဖေဖော်ဝါရီ ၂၆
မန္တလေးတိုင်း၊ မိတ္တီလာမြို့နယ်၊ တွင် အုပ်ချုပ်ရေးမှူးအသစ် ဇော်မင်းဦး ပစ်သတ်ခံရပြီးနောက် ပြည်သူ ၅၀ ကျော်ကို စစ်တပ်က ဖမ်းဆီးထားကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဖေဖော်ဝါရီလ ၂၃ ရက်နေ့ နံနက်ပိုင်း မိတ္ထီလာမြို့တွင် အကြမ်းဖက် စစ်တပ် အတွက် အလုပ်လုပ်ပေးနေသော စည်းခုံကြီးရပ်ကွက် အုပ်ချုပ်ရေးမှူး ဇော်မင်းဦး ပစ်ခတ်ခံရပြီး သေဆုံးသွားခဲ့ကြောင်း ၊ ပခုက္ကူတိုက်တန်း ရမ်းကြီး လက်ဖက်ရည်ဆိုင်တွင် ထိုင်နေစဉ် ပစ်ခတ်ခံရခြင်းဖြစ်ကြောင်း ၊ သေဆုံးသွားသော အုပ်ချုပ်ရေးမှူး ဇော်မင်းဦးသည် အကြမ်းဖက် စစ်တပ် သတင်းပေးဖြစ်ပြီး လူငယ်များကို ပေါ်တာဆွဲ ဖမ်းဆီး၍ စစ်မှုထမ်းရန် အတင်း အဓမ္မ ခိုင်းစေနေသူဖြစ်ကြောင်း၊ စစ်တပ် အလိုကျ စေခိုင်းမှုများတွင် ပါ၀င်နေသောကြောင့် ရာအိမ်မှူး အဆင့်မှ အုပ်ချုပ်ရေးမှူးသို့ အဆင့်သို့ တိုးမြှင့် တာ၀န်ထမ်းဆောင်နေသည်မှာ ၂ ရက်ခန့်သာရှိသေးကြောင်း သိရှိရသည်။
“သေသွားတဲ့အုပ်ကြီးက ငွေလည်းချမ်းသာတယ်။ စစ်ဘောကို ကြိုက်လို့ မတဲ့သူပေါ့။ အဲဒါက အခု သူသေဆုံးမှုနဲ့ပတ်သက်ပြီး ပြည်သူတွေနဲ့ လူငယ်တွေကို လျှောက်ဖမ်းနေတာ။ အဖမ်းခံရာ ၅၀ ကျော်လောက်လောက်ရှိတယ်။ အကုန်ဆက်ဖမ်းနေတာ” ဟု ဒေသပြည်သူတစ်ဦးက ဆိုသည်။
ဒေသတော်လှန်ရေးသတင်းရင်းမြစ်တချို့ကမူ အုပ်ချုပ်ရေးမှူး ဇော်မင်းဦးကို ပစ်ခတ်တိုက်ခိုက်ခဲ့သော ရဲဘော်များမှာ လွတ် ကင်းကြောင်း၊ စစ်တပ်က ပြည်သူများကို အကြောင်းမရှိ အကြောင်းရှာ ဖမ်းဆီးနေခြင်းဖြစ်ကြောင်း သိရှိရသည်။
သေဆုံးသူ အုပ်ချုပ်ရေးမှူး ဇော်မင်းဦးသည် စက်သုံးဆီရောင်းဝယ်ရေးလုပ် ကိုင် သူဖြစ်ပြီး စစ်တပ်၊ ရဲများနှင့် တပူးပူး တတွဲတွဲ ပူးပေါင်းသွားလာနေသူဖြစ် ကြောင်း၊ သေဆုံးချိန်တွင် ဇော်မင်းဦးမှာ အသက် ၅၂ နှစ်ရှိနေပြီဖြစ် ကြောင်း သိရှိရသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
