မြ၀တီမြို့သို့ ချီတက် ထိုးစစ်ဆင်နေသော အောင်ဇေယျ စစ်ကြောင်းမှ စစ်အရာရှိများက ရဲဘော်များကို အငတ် ထားပြီး အသေခံ စစ်တိုက်ခိုင်းဟု ခလရ ၉၄ မှ အလင်းဝင် တပ်သား နိုင်လင်းထွန်း ပြောဆို
ရန်ကုန်၊ မတ် ၂
ကရင်ပြည်နယ်၊ မြ၀တီမြို့နယ်သို့ ထိုးစစ်ဆင်နေသာ စစ်ကောင်စီ၏ အောင်ဇေယျ စစ်ကြောင်းတွင် စစ်အရာရှိများက အောက် ခြေရဲဘော်များကို ထမင်းချက်ပြုတ်စားသောက်ခွင့်မပေးဘဲ အငတ်ထားပြီး အသေခံ စစ်တိုက်ခိုင်းနေကြောင်း ခလရ ၉၄ မှ အလင်းဝင်လာသည့် တပ်သား နိုင်လင်းထွန်းက ပြောဆိုသည်။
ယမန်နေ့ မတ်လ ၁ ရက်နေ့ ကရင်အမျိုးသား လွတ်မြောက်ရေးတပ်မတော် (KNLA) က ထုတ်ပြန်သည့် ရုပ်သံ အင်တာဗျူးတွင် အောင်ဇေယျစစ်ကြောင်းမှ အလင်းဝင်လာသည့် တပ်မ ၅၅ လက်အောက်ခံ ခလရ ၉၄ တပ်ရင်းမှ တပ်သား နိုင်လင်းထွန်းက အထက်ပါအတိုင်း ပြောဆိုခဲ့ခြင်းဖြစ်ကြောင်း သိရသည်။
“အလင်းဝင်လာတာက ကျွန်တော်တို့ကလည်း ငတ်ပြတ်နေပြီ ကျွန်တော်တို့ စိတ်ဆန္ဒမပါဘဲနဲ့ ဒါတွေ ခိုင်းတယ်။ ပြီးတော့ အစားအသောက်ပေါ့ သူတို့ကတော့ စားနေသောက်နေပြီးတော့ ကျနော်တို့က ငတ်ပြတ်ပြီးတော့ ရှေ့ကနေတိုက် သူတို့ကတော့ စားသောက်ပြီး မင်းတို့ သေချင်သေပါစေ ပုံစံမျိုးနဲ့။ ရဲဘော်တွေကို ချပြီး ကျွေးတာမျိုး မရှိဘူး။ အဲဒါကြောင့်မို့ မကြိုက်လို့ အလင်းလာဝင်တာ ရဲဘော်က ရဲဘော် တစ်ကဏ္ဍထားပြီးတော့ တပ် ကြပ်ကြီး၊ တပ်ကြပ်၊ ဒုတပ်ကြပ်က အစ ရဲဘော်ဆိုရင် မင်းက ရဲဘော် မင်းက ငါတို့နဲ့ မတူဘူး။ နေရာတကာ မတိုင်းနဲ့ဆိုပြီးတော့ အလုပ်လုပ်တာ စားတာသောက်တာက အစ ဒုတပ်ကြပ်လောက်ဆိုရင် ရဲဘော်ကို တခြားဟင်းနဲ့ကျွေး တယ်။ သူတို့က ဟင်းကောင်းနဲ့စားတယ်။ ရဲဘော်တွေ ငတ်နေတဲ့ အချိန်ကျရင် သူတို့က သူတို့ဘာသာ ထမင်း ချက် စားတယ်။ ရဲဘော်တွေ ချက်စားရင် ပြောတာဆိုတာ ထိုးတာကျိတ်တာတွေ အဲတာမျိုးတွေရှိတယ်” ဟု ခလရ ၉၄ မှ အလင်း ဝင်လာသည် တပ်သား နိုင်လင်းထွန်းက ပြောဆိုသည်။
အောင်ဇေယျ စစ်ကြောင်းတွင် ကျန်ရှိနေသော လူအများစုသည် စိတ်ဓာတ်ပျက်နေပြီး စစ်တိုက်ချင်စိတ် မရှိတော့ ဘဲ လက်နက်ချပြီး အလင်းဝင်ရန် စိတ်ပြင်းပြနေကြောင်း၊ သို့သော် အထက်အရာရှိများက အလင်းရန် ပြုလုပ်ခြင်းနှင့် ထွက်ပြေးခြင်များ ပြုလုပ်ပါက ပတ်ခတ်မည်ဟု ခြိမ်းခြောက်ထားကြောင်း၊ တိုက်ပွဲအတွင်းတွင်လည်း အောက်ခြေရဲဘော်များကို နောက်ပြန်မလှည့်ခိုင်းဘဲ အသေခံ တိုက်ခိုက်ခိုင်းကြောင်း၊ အောက်ခြေရဲဘော်များကိုလည်း လက်နက်ချ အလင်းဝင်ပါက တော်လှန်ရေး တပ်ဖွဲ့များက သတ်ဖြတ်မည်ဟု ဝါဒဖြန့်ထားမှုများ လုပ်ဆောင်နေကြောင်း သိရသည်။
အလင်းဝင်လာသော တပ်သား နိုင်လင်းထွန်းသည် အကြမ်းဖက် စစ်ကောင်စီကို ပြန်လည် တိုက်ခိုက်သွားမည်ဖြစ် ပြီး အကြမ်းဖက် စစ်တပ်၏ ရှေ့တန်းတွင် အသေခံ တိုက်ခိုင်းသော စစ်မှုထမ်း တပ်သားသစ် အဖြစ် စု ဆောင်း ခြင်းမခံဘဲ တော်လှန်ရေး တပ်ဖွဲ့များထံ အမြန်ဆုံး ပူးပေါင်းကြရန် တိုက်တွန်းပြောဆိုထားသည်။
“ကျနော်စစ်ကောင်စီကို ပြန်ပြီး တော်လှန်မယ်ဆိုတာ ကျွန်တော် တော်တော်ကြီး စိတ်နာခဲ့လို့ပါ။ တချို့ ကျွန်တော့် ညီအစ်ကိုတွေ သူတို့ဘာသာ နေကြတယ် မရဘူး သူတို့ခိုင်းတဲ့အတိုင်း မလုပ်ရင် ထိုးကျိတ်တယ်။ ဘာမှမဆိုင်တဲ့ ပြည်သူလူထုကိုလည်း ညဘက်ထွက်ရင် ပေါ်တာဆွဲ သင်တန်းလေး ၄ ၊ ၅ လလောက်နဲ့ ရှေ့တန်းကို အတင်းပို့ ဘာ မှ အတွေ့အကြုံမရှိတဲ့ကလေးတွေ ရှေ့တန်းပို့ သူတို့က နောက်မှာ အထိုင်က နေတယ်။ အဲဒါတွေ မကြိုက်လို့။ ဖြစ်နိုင်ရင်တော့ စစ်မှုထမ်း မဝင်စေချင်ဘူး။ ဒီထဲဝင်မယ့် စစ်ကောင်စီကို တော်လှန်မယ့် ကိုယ့်ညီအစ်ကို အဖွဲ့အစည်းတွေထဲ ပြန်ပြီးဝင်စေချင်တယ်။ ဒီကို ဝင်လာလည်း ငတ်ငတ်ပြတ်ပြတ်ထားမယ်။ ပြီး ရှေ့တန်းပို့မယ် သေရင် သေပါစေ ပုံစံမျိုးနဲ့ သူတို့ကတော့ နောက်ကနေ ခုံပေါ်မှာထိုင်ပြီး ခိုင်းနေမှာ အဲဒါကြောင့် ဝင်လာမယ်ဆိုရင်တောင် မဝင်ကြပါနဲ့လို့ တိုက်တွန်းချင်တယ်” ဟု အလင်းဝင်လာသည် တပ်သား နိုင်လင်းထွန်းက ဆက်လက် ပြောဆိုသည်။
