ရန်ကုန်၊ မတ် ၂၀
ရန်ကုန်တိုင်း၊ အင်းစိန်မြို့နယ် အောင်မင်္ဂလာဒုံလမ်းမကြီးဘေးရှိ အမှတ် ၂ မှုခင်းရဲတပ်ဖွဲ့ခွဲ မှုခင်းရဲတပ်ဖွဲ့ (Criminal Investigation department) CID ရုံးကို အဝေးထိန်းမိုင်းအကြီးစားနှင့် ဖောက်ခွဲတိုက်ခိုက်ခဲ့ရာ ကင်းသမား အချို့ ထိခိုက်ဒဏ်ရာရရှိခဲ့ကြောင်း Rangoon Urban Column အဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယမန်နေ့ မတ်လ ၁၉ ရက်နေ့ ည ၈ နာရီအချိန် CID ရုံးကို အဝေးထိန်းမိုင်းဖြင့် ဖောက်ခွဲတိုက်ခိုက်ခဲ့ခြင်းဖြစ်ပြီး တိုက်ခိုက်မှုကြောင့် ပြင်းထန်ဒဏ်ရာ ရရှိသူကို ဆေးရုံသို့ ခေါ်ဆောင်သွားခဲ့ကြောင်း သိရှိရသည်။
အင်းစိန်မြို့နယ်မှ ဒေသပြည်သူတစ်ဦးကမူ ယမန်နေ့ည ၈ နာရီ ၃၀ မိနစ်ဝန်းကျင် အောက်မင်္ဂလာဒုံလမ်းမကြီးတွင် ရဲနှင့်စစ်တပ်များက ပိတ်ဆို့စစ်ဆေးမှုများ လုပ်ဆောင်ခဲ့သည်ကို မြင်တွေ့ရကြောင်း ရန်ကုန်ခေတ်သစ်သတင်းဌာနထံသို့ ပြောဆိုသည်။
“ပေါက်ကွဲမှု ဖြစ်တာလား ဘာလားတော့ သေချာမသိဘူး။ မနေ့ည ၈ နာရီခွဲလောက်မှာ CID ရုံးရှေ့နဲ့ ရုံးနီ တစ် ဖက်ခြမ်းမှာ စစ်ကား၊ ရဲကားတွေနဲ့ အိမ်စီးကားတွေ တက္ကစီတွေကို အကုန်စစ်နေတာ။ ည ၉ နာရီလောက်အထိ စစ်ဆေးသွားတယ်” ဟု ဒေသပြည်သူက ရန်ကုန်ခေတ်သစ်သတင်းဌာနထံသို့ ရှင်းလင်းပြောဆိုသည်။
ရန်ကုန်တွင် နေထိုင်သူ ပြည်သူများအနေနှင့် မြေပြင်သတင်းပေးအင်အားကောင်းစေရန်အတွက် Rangoon Urban Column ၏ တယ်လီဂရမ်ဖြစ်သည့် @RUC_info ကို ဆက်သွယ်၍ မြေပြင် သတင်းအချက်များ ပေးပို့ကြရန်လည်း Rangoon Urban Column အဖွဲ့က မေတ္တာရပ်ခံထားသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
