မြန်မာ့ငလျင်အခြေအနေ နိုင်ငံတကာမှသတင်းလာယူခွင့် စစ်ကောင်စီ ခွင့်မပြု
လူပေါင်းထောင်ချီသေဆုံး ပျောက်ဆုံး ပိတ်မိနေဆဲဖြစ်သော မြေငလျင်နှင့်ပတ်သက်ပြီး နိုင်ငံတကာမှ သတင်းထောက်များက သတင်းရယူနိုင်ရန်အတွက် တောင်းဆိုနေမှုကို စစ်ကောင်စီက မတ်လ ၃၀ ရက်နေ့က ငြင်းဆိုလိုက်သည်။
အင်အား ၇.၇ ဖြင့် အင်အားပြင်းထန်စွာ လှုပ်ခတ်ခဲ့မှုကြောင့် ပျက်စီးဆုံးရှုံးမှုကြီးမားသော ငလျင်အခြေအနေကို နိုင်ငံတကာသတင်းဌာနများက မြန်မာနိုင်ငံတွင်းသို့ လာရောက်ကာ သတင်းရယူခွင့် တောင်းဆိုနေကြခြင်းဖြစ်ပြီး စစ်ကောင်စီဘက်က ပယ်ချလိုက်ခြင်းဖြစ်သည်။
လက်ရှိအခြေအနေအရ ရေ၊ လျှပ်စစ်မီးနှင့် ဟိုတယ်များမရှိသောကြောင့်ဟု ဆိုကာ နိုင်ငံတကာမှသတင်းထောက်များ၏ တောင်းဆိုမှုကို စစ်ကောင်စီဘက်က ပယ်ချလိုက်ခြင်းဖြစ်သည်။
”လာတာ၊ နေတာ၊ တည်းတာ၊ ခိုတာ၊ ထိုင်တာ၊ သွားတာ၊ လာတာ အဆင်မပြေနိုင်ပါဘူး။ ဒါလေးကိုတော့ အားလုံးသိရှိထားစေလိုပါတယ်” ဟု မတ်လ ၃၀ ရက်ညပိုင်းက သတင်းဌာနအချို့ကို ပေးပို့သည့် အသံဖိုင်တွင် စစ်ကောင်စီပြောခွင့်ရ ဇော်မင်းထွန်းက ဆိုသည်။
စစ်ကောင်စီဘက်က ထိုကဲ့သို့အကြောင်းပြန်ကြားချက်အပေါ်နိုင်ငံတကာမှသတင်းထောက်တစ်ဦးက “ စစ်ပွဲတွေ၊ ဘေးအန္တရာယ်တွေကြားမှာ သတင်းရယူပြီး သတင်းတင်ဆက်နေကြတဲ့ သတင်းသမားတွေကို စစ်ကောင်စီဘက်က အကြောင်းပြချက်ပေးတဲ့အချက်တွေအပေါ်ကို နားမလည်နိုင်အောင်ဖြစ်မိတယ်။ ကျွန်တော်တို့သတင်းသမားတွေက အဲ့လိုကိစ္စတွေကို ဂရုမစိုက်ပါဘူး။ ဖြစ်ပျက်နေတဲ့အမှန်တရားတွေကိုပဲ ကမ္ဘာကို တင်ပြနိုင်ဖို့ပဲ အရေးကြီးပါတယ်”ဟု မှတ်ချက်ပေးသည်။
မြန်မာနိုင်ငံတွင် ငလျင်ကြီးလှုပ်ခတ်အပြီး ၂ ရက်(၄၈နာရီ)အကြာ မတ်လ ၃၀ ရက်နေ့တွင် သေဆုံးသူဦးရေ ဆက်လက်မြင့်တက်လျက်ရှိပြီး မန္တလေး၊ နေပြည်တော်နှင့် ပဲခူးတို့တွင် နောက်ဆက်တွဲငလျင်ငယ်များ လှုပ်ခတ်နေဆဲဖြစ်သည်။
ပုံ- ပေါ်ပြူလာမြန်မာ
