ရန်ကုန်တိုင်း၊ မြို့နယ်တိုင်းတွင် လုံခြုံရေးနှင့် အကြမ်းဖက်မှု နှိမ်နင်းရေးအဖွဲ့ (လုံ/ကြမ်း)များ ဖွဲ့စည်းရန် ညွှန်ကြား၊ လစာအဖြစ် တစ်ဦးလျှင် တစ်လ ငွေကျပ် နှစ်သိန်းနှင့်ရိက္ခာအပြည့် ပေးမည်

ရန်ကုန်၊ ဧပြီ ၂

ရန်ကုန်တိုင်း၊ မြို့နယ်တိုင်းတွင် လုံခြုံရေးနှင့် အကြမ်းဖက်မှု နှိမ်နင်းရေးအဖွဲ့ (လုံ/ကြမ်း)များ ဖွဲ့စည်းရန် ညွှန်ကြားထားပြီး လစာအဖြစ် တစ်ဦးလျှင် တစ်လ ငွေကျပ် နှစ်သိန်း ပေးမည်ဖြစ်ကြောင်း ရန်ကုန်တိုင်းစစ်ကောင်စီက မြို့နယ်အထွေထွေအုပ်ချုပ်ရေးဦးစီးဌာနများထံသို့ ညွှန်ကြားချက် ထုတ်ပြန်သည်။

စစ်ကောင်စီက ပြည်သူ့စစ်နှင့် ပြည်သူ့လုံခြုံရေးအဖွဲ့များ ဖွဲ့စည်းထားရှိပြီးဖြစ်သော်လည်း လုံ/ကြမ်းအဖွဲ့များကို ထပ်မံ ဖွဲ့စည်းရန် ညွှန်ကြားလာခြင်းဖြစ်ပြီး ယင်းအဖွဲ့များသည် အဓိကအားဖြင့် မြို့နယ်များ၏ လုံခြုံရေးကို စစ်တပ်၊ ရဲတို့နှင့်အတူပူးတွဲ တာဝန်ထမ်းဆောင်ရမည်ဖြစ်ကြောင်း၊ တစ်မြို့နယ်လျှင် လုံ/ကြမ်းအဖွဲ့ဝင် ၅၀ ဦး ဖြင့် ဖွဲ့စည်းမည်ဖြစ်ကြောင်း သိရှိရသည်။

“မြို့နယ်တိုင်းမှာ လုံ/ကြမ်းအဖွဲ့တွေ ဖွဲ့စည်းရမှာဖြစ်ပြီးတော့ တစ်မြို့နယ်မှာ အဖွဲ့ဝင် ၅၀ ဦးနဲ့ ဖွဲ့စည်းမယ်။ ပါဝင်မယ့် အမည်စာရင်း၊ တစ်ဦးချင်းစီရဲ့ ကိုယ်ရေးအချက်အပြည့်အစုံ၊ ကိုယ်လုံးပေါ် ပုံ ၊ ရှေ့၊ ဝဲ၊ ယာ ၃ ဖက်မြင်ဓာတ် ပုံတွေတောင်းပါတယ်။ အသက်ကတော့ ၁၈ နှစ်ကနေ အသက် ၆၅ နှစ်အထိ မည်သူမဆို ပါဝင်လို့ရပါတယ်။ လစာကတော့ တစ်လကို တစ်ဦး ၂ သိန်းနှုန်းနဲ့ ရိက္ခာအပြည့် ထောက်ပံ့မယ်လို့သိရတယ်”ဟု မြို့နယ်အထွေထွေအုပ်ချုပ်ရေးနှင့် တိုက်ရိုက်ဆက်စပ်နေရသော သတင်းရင်းမြစ်က ပြောဆိုသည်။

လုံ/ကြမ်းအဖွဲ့ဝင်များသည် မြို့ပြလုံခြုံရေးကို အထူးဦးစားပေး၍ ဆောင်ရွက်ရမည်ဖြစ်သဖြင့် အသက် ၁၈ နှစ်မှ အသက် ၃၅ နှစ်အတွင်း လူငယ်များအနေဖြင့် လုံ/ကြမ်းအဖွဲ့တွင် တာဝန်ထမ်းဆောင်ပါက စစ်မှုထမ်းတာဝန်များမှလည်း ရွှေ့ဆိုင်းခွင့်ရရှိမည်ဖြစ်ကြောင်း သိရှိရသည်။

ဓာတ်ပုံ – စစ်ကောင်စီက ဖွဲ့စည်းထားသော ပြည်သူ့လုံခြုံရေးအဖွဲ့ဝင်တချို့။ (ပုံအဟောင်းဖြစ်ပါသည်။)

#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar