ရန်ကုန်၊ ဧပြီ ၂
စစ်ကိုင်းတိုင်း၊ အင်းတော်မြို့ မြို့မဘုန်းကြီးကျောင်းကို စစ်တပ်က တိုက်ပွဲဖြစ်ပွားခြင်းမရှိဘဲ လေယာဉ်ဖြင့် ဗုံးကျဲ တိုက်ခိုက်ခြင်းကြောင့် ပြည်သူ ၂ ဦးသေဆုံးခဲ့ကြောင်း Indaw Revolution-IR အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဧပြီလ ၁ ရက်နေ့ မွန်းလွဲ ၁၂ နာရီ ၃၀ မိနစ်ခန့်တွင် အင်းတော်မြို့ မြို့မဘုန်းကြီးကျောင်းကို အကြမ်းဖက် စစ်တပ်က တိုက်ပွဲဖြစ်ပွားခြင်းမရှိဘဲ လေယာဉ်ဖြင့် ဗုံးကျဲ တိုက်ခိုက်ခဲ့ခြင်းဖြစ်ကြောင်း သိရသည်။
အကြမ်းဖက် စစ်တပ်၏ လေကြောင်းတိုက်မှုအတွင်း အရပ်သား ပြည်သူ ၂ ဦး သေဆုံးကာ ၈ ဦးဒဏ်ရာရရှိခဲ့ပြီး ရပ်တော်မူဘုရားလည်း လေယာဉ် ဗုံးထိမှန်ပြီး ပျက်စီးမှုရှိကြောင်း သိရှိရသည်။
“ထိခိုက်ဒဏ်ရာရရှိသူ ၈ ဦးရဲ့ အခြေအနေကတော့ မသိရသေးဘူး။ ၂ ဦးကတော့ သေဆုံးတယ်။ ရပ်တော်မူဘုရားလည်း လေယာဉ် ဗုံးထိလို့ ပျက်စီးမှုရှိတယ်လို့ သိရတယ်။ ထိခိုက်ဒဏ်ရာရတဲ့ သူတွေက သူတို့ စစ်တပ်ကုန်းပေါ်မှာဆိုတော့ ဒဏ်ရာအခြေအနေကို အတည်ပြုနိုင်သေးတာ အခုဗုံးကျဲတိုက်ခိုက်ခံရတဲ့ စစ်တပ်ကုန်းက ရဲတွေ ပျူစောထီးတွေ နဲ့ Non CDM တွေ အများစုကျန်နေတာပေါ့။ ပြည်သူတွေကတော့ ကျန်ခဲ့ရင်တောင် နည်းနည်းပဲထင်တယ်။ အဲမှာ ပြည်သူတော်တော်များများက ထွက်ခဲ့ပြီးပေါ့ မရှိတော့ဘူး” ဟု Indaw Revolution-IR အဖွဲ့မှ တာဝန်ရှိသူ တစ်ဦးက ပြောဆိုသည်။
အလားတူ ကရင်ပြည်နယ်၊ ကျုံဒိုးမြို့နယ်ရှိ ကျေးရွာများကို စစ်တပ်က တိုက်ပွဲဖြစ်ပွားခြင်းမရှိဘဲ လက်နက်ကြီးများဖြင့် ပစ်ခတ် တိုက်ခိုက်ခြင်းကြောင့် ပြည်သူ ၁ ဦး သေဆုံးခဲ့ကြောင်း KNU ဗဟိုက ပြောဆိုသည်။
ဧပြီလ ၁ ရက်နေ့ ညနေ ၅ နာရီ ၃၀ မိနစ်ခန့်တွင် ကျုံဒိုးမြို့နယ်၊ ဝိဇ္ဇာကုန်း ကျေးရွာအတွင်းကို တိုက်ပွဲဖြစ်ပွားခြင်းမရှိဘဲ အကြမ်းဖက် စစ်တပ်၏ စကခ ၁၂ လက်အောက်ခံ တပ်သစ်အမြှောက်ကုန်းမှ အကြမ်းဖက် စစ်ကောင်စီ တပ်သားများက ၁၂၀ မမ လက်နက်ကြီး ၅ လုံးဖြင့် ပစ်ခတ် တိုက်ခိုက်ခဲ့ကြောင်း သိရသည်။
အကြမ်းဖက် စစ်ကောင်စီ တပ်သားများ ပစ်ခတ်သော လက်နက်ကြီးကျည် ပေါက်ကွဲသံကြောင့် ဝိဇ္ဇာကုန်း ကျေးရွာတွင် နေထိုင်သော အသက် ၅၇ နှစ် အရွယ် အမျိုးသမီး ၁ ဦး နှလုံးဖောက်ကာ နောက်ပြန်လဲပြီး အုပ်ခုံနှင့် နှောက်စေ့ ထိမိကာ သေဆုံးခဲ့ကြောင်း သိရှိရသည်။
အကြမ်းဖက် စစ်ကောင်စီတပ်သည် တစ်နိုင်ငံလုံးတွင်ရှိသော ပြည်သူလူထုများမှ စစ်ဘေးစစ်ဒဏ်များကြောင့် သော်လည်းကောင်း၊ သဘာဝ ဘေးဒဏ်များကြောင့် သော်လည်းကောင်း အသက်အိုးအိမ် ပစ္စည်းများ ဆုံးရှုံးခဲ့ရပြီး ဒုက္ခရောက်နေချိန်တွင် သူသားခြင်း စာနာထောက်ထားမှု မရှိပဲ စစ်ရေးပစ်မှတ်မဟုတ်သည့် ဘာသာရေးအဆောက်အဦးများ၊ ပြည်သူ့ဆေးရုံဆေးခန်းများ၊ စာသင်ကျောင်းများ နှင့် အပြစ်မဲ့ အရပ်သားပြည်သူနေထိုင်သည့်နေရာများအားပစ်မှတ်ထားကာ ရည်ရွယ်ချက်ရှိရှိဖြင့် ပစ်ခတ်တိုက်ခိုက်လျှက် ရှိကြောင်း KNU ဗဟိုက ပြောဆိုထားသည်။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
