ရန်ကုန်၊ ဧပြီ ၂
ပဲခူး၊ နေပြည်တော် မန္တလေးနှင့်စစ်ကိုင်းတွင် ငလျင်ကြီး လှုပ်မည်ဆိုသော ကောလဟလများ ပျံ့နှံ့နေ၍ ပြည်သူများ ရုတ်ရုတ် သဲသဲဖြစ်နေကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယနေ့ မွန်းလွဲ ၂ နာရီ ၂၀ မိနစ်မှစတင်၍ နာရီပိုင်းအတွင်း ငလျင်ကြီးလှုပ်ခတ်မည်ဆိုသော သတင်းများမှာ ပဲခူးမြို့၊ မန္တလေးမြို့နှင့် စစ်ကိုင်းမြို့ရှိ ပြည်သူများအကြား ပျံ့နှံ့လာရာမှ ပြည်သူများ ရုတ်ရုတ်သဲသဲဖြစ်နေခြင်းဖြစ်ကြောင်း သိရှိရသည်။
“ပဲခူးမှာတော့ ငလျင်လှုပ်မယ်ဆိုပြီး သတင်းတွေ တအားပြန့်နေလို့ အခု လူတွေတော့ အထုပ်တွေ ထုပ်ပြီး ရုတ်ရုတ်သဲသဲဖြစ်နေတယ်” ဟု ပဲခူးမြို့ခံတစ်ဦးက ဆိုသည်။
မန္တလေးမြို့တွင် ကယ်ဆယ်ရေးလုပ်နေသော ကူညီရေးသမားတစ်ဦးကလည်း “2:20pmမှစ၍ ပညာရှင်များ၏
လေ့လာမှုအ နာရီဝက်အတွင်း ငလျှင်သတိတဲ့နော် ကျနော်တို့အဖွဲ့တွေခေတ္တနားခိုင်းထားပါသည်” ဟု လူမှုကွန်ရက်တွင် ရေးသားထားသည်။
စစ်ကိုင်းမြို့မှ ပြည်သူတချို့ကလည်း ငလျင်ကြီး ထပ်မံ လှုပ်မည်ဆိုသော သတင်းများကြောင့် ပြည်သူများ စိုးရိမ်တကြီးဖြစ်နေရသည်ဟု ဆိုသည်။
ငလျင်လှုပ်ခတ်မှုကို ကြိုတင် အတိအကျ ခန့်မှန်းရန်ခက်ခဲကြောင်း ဘူမိဗေဒ ပညာရှင်များက ထုတ်ဖော်ပြောဆိုထားပြီး ငလျင်ကြီးလှုပ်ခတ်ပြီးချိန်တွင်မူ နောက်ဆက်တွဲ ငလျင်ငယ်များ လှုပ်ခတ်လေ့ရှိကြောင်း ပြောဆိုထားသည်။
မြန်မာနိုင်ငံတွင် မတ် ၂၈ ရက်နေ့ မွန်းလွဲပိုင်း ပြင်အား ၇ ဒသမ ၇ အဆင့်ရှိ ငလျင်ကြီး လှုပ်ခတ်ပြီးနောက် ငလျင်လှုပ်ခတ်မှု ၅၇ ကြိမ် ရှိပြီဖြစ်ကြောင်း စစ်ကောင်စီ မိုးလေဝသနှင့်ဇလဗေဒညွှန်ကြားမှုဦးစီးဌာနက သတင်းထုတ်ပြန်ထားသည်။
ဓာတ်ပုံ – ယနေ့ နံနက် ၁၀ နာရီ ၃၀ မိနစ်ဝန်းကျင်အချိန် မန္တလေးတွင် ငလျင်ငယ်တစ်ခု လှုပ်ခတ်၍ လမ်းပေါ်ထွက်လာကြသည့် ပြည်သူတချို့။
#မြန်မာ့နွေဦးတော်လှန်ရေး #ykt #yktnews #khitthitmedia #myanmar #media #burmese #foryou #foryoupage #NUG #springrevolution #KhitThitMedia #springrevolutionmyanmar2021 #PDF #againstmyanmarmilitarycoup #rejectmilitarycoupmyanmar
