ညီနောင်မဟာမိတ် ၃ ဖွဲ့က တစ်ဖက်သတ် အပစ်ရပ်ထားသော်လည်း စစ်တပ်က နောင်ချိုကို ထိုးစစ်ဆင်လာ၍ တိုက်ပွဲဖြစ်ပွား
ညီနောင်မဟာမိတ် ၃ ဖွဲ့က ငလျင်ဒဏ်သင့် ပြည်သူများကို ထိရောက်သော ကယ်ဆယ်ရေး လုပ်ဆောင်နိုင်ရန် တစ်ဖက်သတ် အပစ်ရပ်ထားသော်လည်း စစ်တပ်က နောင်ချိုကို ထိုးစစ်ဆင်လာ၍ တိုက်ပွဲဖြစ်ပွားခဲ့ကြောင်း TNLA က ပြောဆိုသည်။
ဧပြီလ ၃ ရက်နေ့ မွန်းလွဲ ၁၂ နာရီ၀န်းကျင်ခန့်တွင် အကြမ်းဖက် စစ်ယာဉ်တန်း ၇ စီးဖြင့် လူအင်အားဖြည့်တင်းပြီး အင်တောမှ ကျောက်ဂူ၊ တောင်ချေ၊ အမတ (၉၀၂) သို့ စစ်ကူများ အင်အားဖြည့်တင်းနေခဲ့ကြောင်း သိရသည်။
ထိုသို့ အင်အား ဖြည့်တင်းပြီး ယနေ့ ဧပြီလ ၄ ရက်နေ့ နံနက် ၉ နာရီ ၅၅ မိနစ်ခန့်တွင် ထိုးစစ်ဆင်လာသော အကြမ်းဖက် စစ်တပ်နှင့် တအာင်းတပ်မတော် PSLF/TNLA တို့ အမတ ၉၀၂ အနီးတဝိုက်တွင် တိုက်ပွဲဖြစ်ပွားခဲ့ကြောင်း သိရှိရသည်။
ထို့ပြင် အကြမ်းဖက် စစ်တပ်သည် သပိတ်ကျင်းမြို့နယ် ၇ မိုင် ကိုလည်း ဂျက်ဖိုက်တာဖြင့် ၂ ကြိမ် လာရောက် ဗုံးကျဲချ တိုက်ခိုက်ခဲ့ကြောင်း သိရသည်။
အကြမ်းဖက် စစ်ကောင်စီသည် ဧပြီလ ၂ ရက်နေ့မှ ၂၂ ရက်နေ့ထိ အပစ်ရပ်သည်ဟု ကြေညာခဲ့ပြီး နိုင်ငံတော်အဆင့် ဝမ်းနည်းခြင်းအထိမ်းအမှတ်နေ့ရက်ဟု ထုတ်ပြန်ကြေညာသော်လည်း ထိုးစစ်ဆင်ခြင်းနှင့် လေကြောင်း တိုက်ခိုက်မှုများ နေ့စဉ် ပြုလုပ်လျက်ရှိကြောင်း TNLA က ပြောဆိုထားသည်။
ပြီးခဲ့သည့် မတ်လ ၂၈ ရက်နေ့က ဖျက်အားပြင်း လှုပ်ခတ်သွားခဲ့သော ငလျင်ဒဏ်ကြောင့် ဧပြီလ ၃ ရက်နေ့အထိ မြန်မာနိုင်ငံတဝန်းတွင် သေဆုံးသူ ၃၀၈၅ ဦး၊ ဒဏ်ရာရသူ ၄၇၁၅ ဦးနှင့် ပျောက်ဆုံးသူ ၃၄၁ ဦးအထိ ရှိခဲ့ပြီ ဖြစ်ကြောင်း သိရသည်။
