စဉ့်ကူးနှင့် ဖယ်ခုံတွင် ရက် ၂၀ ကြာ အပစ်ရပ်ထားသော စစ်တပ်က လေယာဉ်၊ အသေခံ ဒရုန်းများဖြင့် တိုက်ခိုက်မှု ပြည်သူ ၃ ဦး ပြင်းထန် ဒဏ်ရာရ
မန္တလေးတိုင်း၊ စဉ့်ကူးမြို့အနီး ရက် ၂၀ ကြာ အပစ်ရပ်ထားသော အကြမ်းဖက် စစ်တပ်က လေယာဉ်ဖြင့် ဗုံးကျဲ တိုက်ခိုက်ခြင်းကြောင့် ပြည်သူ ၂ ဦး ပြင်းထန် ဒဏ်ရာရရှိခဲ့ကြောင်း ခရိုင် ပကဖ မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ယနေ့ ဧပြီလ ၄ ရက်နေ့ ညနေ ၄ နာရီ ၄၉ မိနစ်ခန့်တွင် စဉ့်ကူးမြို့ အရှေ့မြောက်ဘက်ကို ရက် ၂၀ ကြာ အပစ်ရပ်ထားသော အကြမ်းဖက် စစ်တပ်က တံတားဦး လေတပ်မှ တက်လာသော Yak-130 Fighter Jet ဖြင့် ဗုံးကျဲ တိုက်ခိုက်ခဲ့ခြင်းဖြစ်ကြောင်း သိရသည်။
အကြမ်းဖက် စစ်တပ်၏ လေကြောင်း တိုက်ခိုက်မှု အတွင်း ပြည်သူ ၂ ဦး ပြင်းထန် ဒဏ်ရာရရှိခဲံပြီး နေအိမ်များပျက်စီးမှုရှိကြောင်း သိရသည်။
“ဒီနေ့ ညနေပိုင်းမှာ စဉ့်ကူးမြို့ အရှေ့မြောက်ဘက်ကို တံတားဦးက တက်လာတဲ့ Yak-130 Fighter Jet နဲ့ ဗုံသီး ၁ လုံးကျဲချ တိုက်ခိုက်ခဲံတယ်။ ပြည်သူ ၂ ဦး ပြင်းထန် ဒဏ်ရာရတယ်” ဟု ခရိုင် ပကဖ မှ တာဝန်ရှိသူ တစ်ဦးက ပြောဆိုသည်။
ရှမ်းပြည်နယ်တောင်ပိုင်း ၊ ဖယ်ခုံမြို့နယ်၊ ခေါင်းအိရွာသစ်ကို အကြမ်းဖက် စစ်တပ်က အသေခံဒရုန်း ၂ စီး၊ လက်နက်ကြီးများဖြင့် တိုက်ခိုက်ခဲ့ရာ ပြည်သူ ၁ ဦး ထိခိုက် ဒဏ်ရာရရှိခဲ့ပြီး စစ်တပ် အသေခံ ဒရုန်း ၁ စီးကို ပစ်ချနိုင်ခဲ့ကြောင်း ဖယ်ခုံ PDF တပ်ဖွဲ့မှ တာဝန်ရှိသူတစ်ဦးက ရန်ကုန် ခေတ်သစ် သတင်းဌာနထံသို့ ပြောကြားသည်။
ယမန်နေ့ ဧပြီလ ၃ ရက်နေ့ ည ၇ နာရီခန့်တွင် ဖယ်ခုံမြို့နယ်၊ ခေါင်းအိရွာသစ်ဘက်သို့ စကခ ၇ တပ်ရင်းက အသေခံဒရုန်း ၂ စီးဖြင့် ပစ်ခတ် တိုက်ခိုက်ခဲ့ရာ ဖယ်ခုံ PDF 1002 တပ်ရင်းက ဒရုန်း ၁ စီးကို ပစ်ချနိုင်ခဲ့ကြောင်း၊ ယနေ့ ဧပြီလ ၄ ရက် နံနက်ပိုင်းကလည်း ယင်းစကခ ၇ တပ်ရင်းက လက်နက်ကြီးဖြင့် ၅ ကြိမ် ပစ်ခတ်တိုက်ခိုက်ခဲ့ရာ တောင်ယာလုပ်ကိုင်နေသော ပြည်သူ ၁ ဦးထိခိုက်ဒဏ်ရာရရှိခဲ့ကြောင်း သိရသည်။
“စကခ ၇ နေပြီး ပြည်သူလူထုနေထိုင်တဲ့ရွာတွေကို ဦးတည်ပြီး တိုက်ခိုက်တာပါ၊ ဒီနေ့မနက်လည်း မနေ့က ပစ်ချခဲ့တဲ့ ဒရုန်းကောက်ပြီးချိန်မှာ စကခ ၇ ကနေ လက်နက်ကြီးနဲ့ ၅ ကြိမ်ပစ်ခတ်ခဲ့လို့ တောင်ယာလုပ်နေတဲ့ ပြည်သူ ၁ ဦး ထိခိုက်ဒဏ်ရာရရှိခဲ့ပါတယ်” ဟု ဖယ်ခုံ PDF တပ်ဖွဲ့မှ တာဝန်ရှိသူတစ်ဦးက ရန်ကုန် ခေတ်သစ် သတင်းဌာနထံသို့ ပြောကြားသည်။
ငလျင်ဒဏ်ကြောင့် စစ်ကောင်စီက အပစ်ရပ် ထုတ်ပြန်သော်လည်း မြေပြင်တွင် လေကြောင်း တိုက်ခိုက်မှုများ အသေခံဒရုန်းများဖြင့် နေ့စဉ် တိုက်ခိုက်လျက်ရှိသောကြောင့် တော်လှန်ရေး ရဲဘော်ရဲဘက်များ အနေဖြင့် သတိထား နေထိုင်ကြရန် ဖယ်ခုံ PDF တပ်ဖွဲ့က သတိပေးပြောဆိုထားသည်။
