ဘန်ကောက်ရှိ စစ်ကောင်စီသံရုံးရှေ့တွင် မင်းအောင်လှိုင်ကို ထိုင်းအရပ်ဘက်အဖွဲ့များက ဆန္ဒပြကြပြီး မင်းအောင်လှိုင်ကို ဖိတ်ကြားခဲ့သော ထိုင်းအစိုးရကိုလည်း ကန့်ကွက်ရှုတ်ချ
ပြည်သူကို သတ်ဖြတ်နေသော စစ်ကောင်စီနှင့် ဆက်ဆံရေးများ ဖြတ်တောက်ရန် ထိုင်းအစိုးရကို တိုက်တွန်း
ရန်ကုန်၊ ဧပြီ ၅
ထိုင်းနိုင်ငံ၊ ဘန်ကောက်ရှိ စစ်ကောင်စီသံရုံးရှေ့တွင် စစ်ခေါင်းဆောင် မင်းအောင်လှိုင်ကို ထိုင်းအရပ်ဘက်အဖွဲ့များက ဆန္ဒပြကြပြီး မင်းအောင်လှိုင်ကို BIMSTEC အစည်းအဝေးတက်ရောက်ရန် ဖိတ်ကြားခဲ့သော ထိုင်းအစိုးရကိုလည်း ကန့်ကွက်ရှုတ်ချခဲ့ကြသည်။
ယနေ့ မွန်းလွဲပိုင်းတွင် ထိုင်းအရပ်ဘက်အဖွဲ့ဝင်များက စစ်ကောင်စီလက်အောက်ခံ ထိုင်းနိုင်ငံဆိုင်ရာ မြန်မာသံရုံးရှေ့တွင် လာရောက် ဆန္ဒပြကြပြီး အရပ်ဘက်အဖွဲ့များ၏ ကြေညာချက်ကိုလည်း ဖတ်ကြားခဲ့ကြကြောင်း သိရှိရသည်။
အဆိုပါကြေညာချက်တွင် ထိုင်းအရပ်ဘက်အဖွဲ့အစည်းများက လူသတ်ကောင် မင်းအောင်လှိုင်ကို ထိုင်းနိုင်ငံသို့ ဖိတ်ကြားမှုအတွက် ထိုင်းအစိုးရကို ကန့်ကွက်ရှုတ်ချပြီး စစ်ကောင်စီနှင့် ဆက်ဆံရေးများ ဖြတ်တောက်ရန် ထိုင်းအစိုးရကို တောင်းဆိုခဲ့ကြသည်။
ထို့ပြင် ယနေ့ နံနက်ပိုင်းကလည်း ထိုင်းနိုင်ငံ၊ ဘန်ကောက်မြို့ UN ရုံးရှေ့တွင် မင်းအောင်လှိုင်ကို ဆန္ဒပြရန်ကြိုးစားသည့် ထိုင်းအရပ်ဘက်အဖွဲ့ကို ထိုင်းအမျိုးသားရေးအဖွဲ့များက တိုက်ခိုက်ရန် ကြိုးစားခဲ့သဖြင့် ရုန်းရင်း ဆန်ခတ်ဖြစ် ပွားခဲ့ကာ ထိုင်းရဲတပ်ဖွဲ့က ကြားဝင် တားဆီးမှုများ လုပ်ဆောင်ခဲ့ရကြောင်း သိရှိရသည်။
“ထိုင်းမျိုးချစ်အဖွဲ့တွေက ရန်ရှာတာ ၊ ထိုးနှက်တိုက်ခိုက်တာ မဖြစ်အောင် မင်းအောင်လှိုင်ကို ဆန္ဒပြမယ့်သူတွေကို ထိုင်းရဲတွေကခေါ်ဆောင် ကာကွယ်ပေးခဲ့တယ်။ ဖမ်းဆီးတာမျိုး မဟုတ်ဘူး ” ဟု ထိုင်းရောက် မြန်မာအလုပ်သမားအရေး ဆောင်ရွက်သူ အေအေစီ ကိုရဲမင်းက ပြောကြားသည်။
ထိုင်းအစွန်းရောက်မျိုးချစ်အဖွဲ့က မင်းအောင်လှိုင်ကို ဆန္ဒပြလိုပါက မြန်မာ နိုင်ငံတွင်သာ သွားရောက် ဆန္ဒပြရန် ထိုင်းနိုင်ငံတွင် လာပြစရာမလိုဟု အော် ဟစ်ပြောဆိုခြင်းများလည်း လုပ်ဆောင်ခဲ့ကြောင်း သိရှိရသည်။
ဓာတ်ပုံ- The Reporters ။
