မြန်မာနိုင်ငံတွင် ဧပြီလ အတွင်း နောက်ဆက်တွဲ ငလျင်ငယ်များ ဆက်တိုက် လှုပ်ခတ်နိုင်ဟု USGS က အသိပေး ထုတ်ပြန်၊ မတ်လ ၂၈ ရက်နေ့မှ ယနေ့ အထိ နောက်ဆက်တွဲ ငလျင်ငယ် ၈၅ ကြိမ် လှုပ်ခတ်ခဲ့
ရန်ကုန်၊ ဧပြီ ၅
မြန်မာနိုင်ငံတွင် ဧပြီလ အတွင်း နောက်ဆက်တွဲ ငလျင်ငယ်များ ဆက်တိုက် လှုပ်ခတ်နိုင်ကြောင်း အမေရိကန် ဘူမိဆိုင်ရာ သုတေသနအဖွဲ့ (USGS) က အသိပေးထုတ်ပြန်လိုက်သည်။
ဧပြီလ ၄ ရက်နေ့ အမေရိကန် ဘူမိဆိုင်ရာ သုတေသနအဖွဲ့ (USGS) ၏ ခန့်မှန်းချက်များအရ လာမည့် ဧပြီ ၁၁ ရက်နေ့အထိ နောက်ဆက်တွဲ ငလျင်ငယ် ဆက်တိုက်ဖြစ်ပေါ်နိုင်ကြောင်း သိရသည်။
အင်အား ၃ နှင့် အထက်ရှိသည့် နောက်ဆက်တွဲ ငလျင်ငယ် ဖြစ်ပေါ်နိုင်ခြေ ၉၉ ရာခိုင်နှုန်း ရှိပြီး ၂ ကြိမ်မှ ၂၂ ကြိမ်ထိ ဖြစ်နိုင်ကြောင်း၊ အင်အား ၅ နှင့် အထက်ရှိသည့် နောက်ဆက်တွဲ ငလျင်ငယ် ဖြစ်ပေါ်နိုင်ခြေ ၅၄ ရာခိုင်နှုန်းရှိပြီး ၀ ကြိမ် မှ ၄ ကြိမ် အထိ ဖြစ်နိုင်ကြောင်း၊ အင်အား ၆ နှင့် အထက်ရှိသည့် နောက်ဆက်တွဲငလျင်ငယ် ဖြစ်ပေါ်နိုင်ခြေ ၈ ရာခိုင်နှုန်းရှိပြီး ၀ ကြိမ် မှ ၁ ကြိမ်အထိ ဖြစ်ပေါ်နိုင်ကြောင်း၊ အင်အား ၇ နှင့် အထက်ရှိသည့် နောက်ဆက်တွဲ ငလျင်ငယ် ဖြစ်ပေါ်နိုင်ခြေ ၀.၇ ရာခိုင်နှုန်းနှင့် ၁ ရခိုင်နှုန်းသာ အလားအလာရှိကြောင်း သိရှိရသည်။
ထိုသို့ နောက်ဆက်တွဲငလျင် ဖြစ်နိုင်ခြေရှိသော်လည်း ငလျင်ကြီးများ ဖြစ်နိုင်ခြေသည် အလားအလာ အလွန်နည်းပါးကြောင်း သိရသည်။
မတ်လ ၂၈ ရက်နေ့ မွန်းလွဲ ၁၂ နာရီ ၅၀ မိနစ်ခန့်တွင် မန္တလေးမြို့အနီး၌ ရစ်ချ်တာစကေး ၇ ဒဿမ ၇ အင်အားရှိသော မြေငလျင်ကြီးတစ်ခု လှုပ်ခတ်ခဲ့ပြီး ငလျင်ဗဟိုချက်သည် မြေမျက်နှာပြင်အောက် ၁၀ ကီလိုမီတာခန့်တွင် လှုပ်ခတ်ခဲ့ခြင်းကြောင့် ထိခိုက်မှုကြီးမားပြီး လူသေဆုံးမှုနှင့် ဒဏ်ရာရရှိမှုများလည်း များပြားခဲ့ခြင်းဖြစ်ကြောင်း သိရှိရသည်။
စစ်ကိုင်းပြတ်ရွေ့အနီးတွင် ဖြစ်ပေါ်သည့် အဆိုပါ ငလျင်ကြီးကြောင့် စစ်ကိုင်းပြတ်ရွေ့ပေါ်တွင် မြေလွှာ ရွေ့လျားမှုသည် အလျား ၄၆၀ ကီလိုမီတာနှင့် အကျယ် ၁၅ ကီလိုမီတာ ခန့်ရှိခဲ့ကြောင်း ခန့်မှန်းထားသည်ဟု အမေရိကန် ဘူမိဆိုင်ရာ သုတေသနအဖွဲ့ (USGS) က ထုတ်ပြန်ထားသည်။
မတ်လ ၂၈ ရက်နေ့ ပြင်းအား ၇ ဒသမ ၇ အဆင့်ရှိ ငလျင်ကြီး လှုပ်ခတ်ခဲ့ပြီးနောက် နောက်ဆက်တွဲ ငလျင်ငယ် ၈၅ ကြိမ် လှုပ်ခတ်ခဲ့ပြီး ယနေ့ တစ်ရက်တည်းတွင် ငလျင်ငယ် ၉ ကြိမ် လှုပ်ခတ်ခဲ့ကြောင်း စစ်ကောင်စီ၏ မိုးလေ ဝသနှင့် ဇလဗေဒညွှန်ကြားမှုဦးစီးဌာနက ထုတ်ပြန်ထားသည်။
ဓာတ်ပုံ- ငလျင်ကြောင့် လူနေအိမ်များ မြေကြီးထဲသို့ ကျွံ့ဝင်သွားသည့် ပုလိပ်မြို့နယ်၊ စိတ္တရကျေးရွာ။
