အကြမ်းဖက် စစ်တပ်၏ ဝါဒဖြန့် “ခေတ်သမိုင်းကို ဒုန်းစိုင်းမည့်သူများ” အလိမ်အညာ ဇာတ်လမ်းအပေါ် ဝေဖန်သည့်ပို့စ်ကို Love React ပေးခဲ့သည့် ဒါရိုက်တာ အောင်ချမ်းလူကို စစ် တပ်က ဖမ်းဆီးလိုက်သဖြင့် ဖမ်းဆီးခံရသော အနုပညာရှင် ၄ ဦးအထိရှိလာကြောင်း ရန်ကုန်ခေတ်သစ်၏ သတင်းရင်းမြစ်က ပြောဆိုသည်။
ယမန်နေ့ အောက်တိုဘာ ၂၉ ရက်နေ့ညပိုင်း ဒါရိုက်တာ အောင်ချမ်းလူကို စစ်တပ်က ဖမ်းဆီးသွားခဲ့ခြင်းဖြစ်ပြီး ဒါရိုက်တာ အောင်ချမ်းလူက “ခေတ်သမိုင်းကို ဒုန်းစိုင်းမည့်သူများ” နှင့်ပတ်သက်၍ ပြည်ပရောက် တော်လှန်ရေး အဆိုတော် အဆိုတော်ရန်ရန်ချမ်း ရေးသားထားသည့် လူမှုကွန်ရက်ပို့စ်ကို Love React ပေးခဲ့သည့်အတွက် ဖမ်းဆီးခံခဲ့ရကြောင်း သိရှိရသည်။
အောက်တိုဘာလ ၂၇ ရက်နေ့ကလည်း စစ်တပ်၏ ဝါဒဖြန့် “ခေတ်သမိုင်းကို ဒုန်းစိုင်းမည့်သူများ” ရွေးကောက်ပွဲဆိုင်ရာ အလိမ် အညာဝါဒဖြန့် ဇာတ်လမ်းကို လူမှုကွန်ရက်မှတစ်ဆင့် ဝေဖန်သည်ဟုဆိုကာ ဒါရိုက်တာ မိုက်တီး(ခ)သန်းထွန်းဇော်၊ ဇာတ်ပို့သရုပ်ဆောင် ကျော်ဝင်းထွဋ်(ခ)ကျော်မင်းထွဋ်နှင့် ဟာသ သရုပ်ဆောင် အုန်းဒိုင်း(ခ)ဇော်မြင့် တို့ကို စစ်တပ်က ဖမ်းဆီးခဲ့သဖြင့် စုစုပေါင်း ဖမ်းဆီးခံရသူ အနုပညာရှင် ၄ ဦးအထိရှိလာပြီဖြစ်သည်။
“ခေတ်သမိုင်းကို ဒုန်းစိုင်းမည့်သူများ” ဝါဒဖြန့် အလိမ်အညာ တင်အောင်စိုး (ပန်းမြို့တော်)က ရိုက်ကူးပြီး ဇာတ်ညွှန်း မှာ လင်္ကာညို (ခ) တေဇာကျော် (ခ) ဒက်ကလောက် (ချစ်ဦးညိုရဲ့သား) ဖြစ်ကြောင်း သိရှိရသည်။
စစ်တပ်၏ ဝါဒဖြန့် “ခေတ်သမိုင်းကို ဒုန်းစိုင်းမည့်သူများ” အလိမ်အညာ ဇာတ်လမ်းဂယက်နှင့်ပတ်သက်၍ ယနေ့ ရန်ကုန်ရှိ မြန်မာနိုင်ငံရုပ်ရှင်အစည်းအရုံးတွင် ရုပ်ရှင်လောကသားများကို အကြမ်းဖက် စစ်တပ် က အစည်းအဝေး ခေါ်ယူခဲ့ကြောင်း သိရှိရသည်။
အခြားတစ်ဖက်တွင်လည်း စမ်းချောင်းပင်မသပိတ်စစ်ကြောင်းက အကြမ်းဖက်စစ်အုပ်စု၏ အတုအယောင်ရွေးကောက်ပွဲကို ထောက်ခံအားပေးပြီး လူထုကို ဝါဒမှိုင်းတိုက်ခြင်း ၊ လူထုအရေးတော်ပုံကို ပုံဖျက်ခြင်း တို့ကို ကျူးလွန်သော အညံ့စား ဝါဒဖြန့် အနုပညာရှင်အမည်ခံများ ဖြစ်ကြသော နေတိုး ၊ မြင့်မြတ် ၊ နေဝင်း ၊ အေးချမ်းမောင် ၊ ခြူးလေး ၊ မေမြင့်မိုရ် ၊ အောင်ခိုင် ၊ ငှက်ပျောကြော် ၊ အောင်တိုး ၊ နိုင်လင်း ၊ သွက်လတ် ၊ စူပါလင်း ၊ မင်းညို ၊ ဥက္ကာပျံရီ ၊ ရဲရင့် ၊ ရောပျော် ၊ အောင်ဇင်ဖြိုး တို့ကို Boycott & Social punishment ပြင်းပြင်းထန်ထန် လူမှုရေးပြစ်ဒဏ် ခတ်ကြရန် တိုက်တွန်းနှိုးဆော်ထားသည်။
