ရန်ကုန်၊ ဧပြီ ၁၄
စစ်ကိုင်းတိုင်း၊ ဆားလင်းကြီးမြို့နယ်ရှိ ကျေးရွာများကို အကြမ်းဖက် စစ်တပ်က စက်တပ်လေထီးဖြင့် ဆက်တိုက် ဗုံးကျဲတိုက်ခိုက်ခဲ့ကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဧပြီလ ၁၄ ရက်နေ့ ညနေ ၆ နာရီခန့်တွင် မုံရွာမြို့ရှိ အကြမ်းဖက် စစ်တပ်၏ အနောက်မြောက်တိုင်း စစ်ဌာနချုပ် (နမခ) မှ တက်လာသော စက်တပ်လေထီး ၂ စီးသည် ဆားလင်းကြီးမြို့နယ် တောင်ခြမ်းရှိ ကျေးရွာများကို လေကြောင်း တိုက်ခိုက်မှုပြုလုပ်သွားကြောင်း သိရသည်။
အကြမ်းဖက် စစ်တပ်၏ လေကြောင်း တိုက်ခိုက်မှု အတွင်းပြည်သူများ ထိခိုက်မှုရှိ၊မရှိကို အတည်ပြုနိုင်ခြင်းမရှိသေးဘဲ စက်တပ်လေထီးများ ဆက်လက် ပျံဝဲနေဆဲဖြစ်သောကြောင့် ပြည်သူများ တိမ်းရှောင်နေရကြောင်း သိရှိရသည်။
“ဆားလင်းကြီး တောင်ခြမ်းဘက်က ရွာတွေကို ကျဲတာလို့ပဲသိရတယ်။ နေရာကိုတော့ အတည်မပြုနိုင်သေးဘူး။ ဒီနေ့ နမခ က တက်တဲ့ စက်တပ်လေထီးတွေ Gyrocopter တွေက တော်တော်များတယ်။ ဆက်တိုက် ပျံဝဲနေတာဆိုတော့ ပြည်သူတွေလည်း ကြောက်လန့်ပြီး တိမ်းရှောင်နေရတာတွေရှိတယ်” ဟု ဒေသပြည်သူတစ်ဦးက ပြောဆိုသည်။
ထို့ပြင် ကရင်ပြည်နယ်၊ ဖာပွန်ခရိုင်၊ ဘူးသိုမြို့နယ်တွင်လည်း အကြမ်းဖက် စစ်တပ်က လေယာဉ်ဖြင့် ဗုံးကျဲ တိုက်ခိုက်ခြင်းကြောင့် ဆေးပေးခန်း အဆောက်အဦးများ ပျက်စီးခဲ့ကြောင်း Karen Peace Support Network က ထုတ်ပြန်ထားသည်။
ဧပြီလ ၁၁ ရက်နေ့တွင် ဘူးသိုမြို့နယ်၊ အော်မီထာကျေးရွာကို အကြမ်းဖက် စစ်တပ်က တိုက်လေယာဉ် ၁ စီးဖြင့် ဗုံး ၂ လုံး ကျဲချတိုက်ခိုက်ခဲ့သောကြောင့် ဆေးပေးခန်း အဆောက်အဦး ၂ လုံး ပျက်စီးခဲ့ပြီး ပြည်သူများ ထိခိုက်မှုမရှိကြောင်း သိရသည်။
