ရန်ကုန်၊ ဧပြီ ၂၆
အမေရိကန်အထက်လွှတ်တော်အမတ် ၅ ဦး တင်သွင်းသည့် BRAVE Burma Act ဥပဒေ ကြမ်း တွင် အထက်လွှတ်တော်အမတ် Michael Bennet ပါ ပူးပေါင်းပါဝင်လာကြောင်း အထက်လွှတ်တော်အမတ် Michael Bennet က သတင်းထုတ်ပြန်ထားသည်။
အမေရိကန် အထက်လွှတ်တော် ထောက်လှမ်းရေးကော်မတီ အဖွဲ့ဝင်လည်းဖြစ်၊ ကော်လိုရာဒိုပြည်နယ် အထက်လွှတ်တော်အမတ်လည်းဖြစ်သူ Michael Bennet က အခြားသော အထက်လွှတ်တော်အမတ်များဖြစ်ကြသည့် Chris Van Hollen၊ Todd Young၊ Mitch McConnell ၊ Jeff Merkley နှင့် Angela Alsobrooks တို့နှင့် ပူးပေါင်း၍ မြန်မာစစ်ကောင်စီအပေါ် အရေးယူမှုများ အားကောင်းစေမည့် နှစ်ပါတီပူးပေါင်း ဥပဒေကြမ်းတစ်ခုကို တင်သွင်းလိုက်ခြင်းဖြစ်သည်ဟု သိရှိရသည်။
အဆိုပါ ဥပဒေကြမ်းမှာ Bringing Real Accountability Via Enforcement in (BRAVE) Burma Act ဟု အမည်ပေးထားသည့် ဥပဒေကြမ်းဖြစ်ပြီး ၂၀၂၂ ခုနှစ်က အတည်ပြုခဲ့သော BURMA Act ကို ပိုမိုအားကောင်းအောင် အခြေခံတည်ဆောက်ထားခြင်း ဖြစ်သည်။
ယင်းဥပဒေ၏ အဓိက ရည်ရွယ်ချက်မှာ ၂၀၂၁ ခုနှစ် အာဏာသိမ်းမှုနောက်ပိုင်း ဒီမိုကရေစီနှင့် စီးပွားရေးကို ဖျက်ဆီးနေသည့်အပြင် လူ့အခွင့်အရေး ချိုးဖောက်မှုများ ကျူးလွန်နေသော စစ်ကောင်စီထံသို့ စီးဆင်းနေသည့် ရန်ပုံငွေလမ်းကြောင်းများကို ပိတ်ဆို့ရန်နှင့် ဒေသတွင်း၌ တရုတ်နှင့် ရုရှားတို့၏ လွှမ်းမိုးမှု မြင့်တက်လာခြင်းကို တုံ့ပြန်ရန် ဖြစ်သည်ဟု သိရှိရသည်။
ယင်းဥပဒေကြမ်းတွင် ပါဝင်သည့် အဓိကအချက်များမှာ မြန်မာစစ်တပ်၏ မြန်မာ့စီးပွား ရေးဘဏ် (MEB) ကဲ့သို့သော စစ်ကောင်စီ၏ ငွေကြေးယန္တရားများနှင့် လေယာဉ်ဆီ ကဏ္ဍတွင် ပါဝင်နေသော အဖွဲ့အစည်းများအပေါ် ပြင်းထန်သော ဒဏ်ခတ်ပိတ်ဆို့မှုများ ချမှတ်ရန် သမ္မတအား လုပ်ပိုင်ခွင့်ပေးခြင်း၊ အပြည်ပြည်ဆိုင်ရာ ငွေကြေးရန်ပုံငွေအဖွဲ့ (IMF) ထံမှ စစ်ကောင်စီက ငွေကြေးချေးယူနိုင်စွမ်းကို အမေရိကန်၏ သြဇာအာဏာဖြင့် ကန့် သတ်ခြင်း တို့ပါဝင်သည်။
ယင်းအပြင် မြန်မာနိုင်ငံဆိုင်ရာ မူဝါဒများကို ပေါင်းစပ်ညှိနှိုင်းရန် သံအမတ်အဆင့်ရှိသော “မြန်မာနိုင်ငံဆိုင်ရာ အထူးကိုယ်စားလှယ်” တစ်ဦးကို နိုင်ငံခြားရေးဝန်ကြီးဌာနတွင် သီး သန့်ခန့်အပ်ရန် သတ်မှတ်ခြင်းလည်း ပါဝင်ကြောင်း သိရှိရသည်။
အထက်လွှတ်တော်အမတ် Michael Bennet က “အမေရိကန်ပြည်ထောင်စုအနေနဲ့ မြန်မာပြည်သူတွေအပေါ် ကျူးလွန်နေတဲ့ စစ်ကောင်စီရဲ့ အကြမ်းဖက်မှုတွေကို ရပ်တန့်ဖို့ ဒီထက်မက ပိုပြီးလုပ်ဆောင်ရပါမယ်။ ဒီဥပဒေကြမ်းဟာ စစ်ကောင်စီက သူတို့ရဲ့ ရက်စက်ကြမ်း ကြုတ်မှုတွေအတွက် သုံးစွဲနေတဲ့ အဓိကဝင်ငွေလမ်းကြောင်းတွေကို ဖြတ်တောက်ပေးမှာ ဖြစ်ပါတယ်” ဟု ပြောကြားသည်။
ထို့အတူ အမတ် Mitch McConnell ကလည်း စစ်တပ်၏ အတုအယောင် ရွေးကောက်ပွဲမှာ တရုတ်နိုင်ငံ၏ လွှမ်းမိုးမှုကို ပိုမိုနက်ရှိုင်းစေနိုင်ကြောင်း သတိပေးခဲ့ပြီး၊ အမတ် Todd Young ကလည်း မြန်မာလူမျိုး အများအပြားနေထိုင်သည့် အင်ဒီးယားနားပြည်နယ် ကိုယ်စားလှယ်တစ်ဦးအနေဖြင့် မြန်မာပြည်သူများနှင့်အတူ ရပ်တည်ကြောင်း ပြောဆိုသည်။
အဆိုပါဥပဒေကြမ်းကို Burma Research Institute နှင့် Campaign for a New Myanmar တို့က ထောက်ခံထားကြပြီး၊ အောက်လွှတ်တော်တွင်လည်း ပြီးခဲ့သည့် အစောပိုင်းကာလက တညီတညွတ်တည်း အတည်ပြုခဲ့ပြီး ဖြစ်သည်။
အထက်လွှတ်တော် အမတ် Bennet က ပြီးခဲ့သည့် ကာလများကလည်း မြန်မာနိုင်ငံအတွက် လူသားချင်းစာနာထောက်ထားမှုဆိုင်ရာ အကူအညီများ ရရှိရေးနှင့် မြန်မာနိုင်ငံသားများအတွက် ယာယီအကာအကွယ်ပေးထားမှု အဆင့်အတန်း (TPS) ဆိုင်ရာ ကိစ္စရပ်များကို အစဉ်တစိုက် ကြိုးပမ်းဆောင်ရွက်ခဲ့သူ ဖြစ်ကြောင်း သိရှိရသည်။
