ကမ္ဘာ့ကပ်ရောဂါ အသွင်ဖြစ်လာနိုင်သော ဟန်တာဗိုင်းရပ်စ် ကူးစက်ခံနိုင်ရသည့် သံသယဖြင့် စင်ကာပူနိုင်ငံတွင် လူ ၂ ဦးကို သီးသန့်စောင့်ကြည့်နေ၊ ဟန်တာဗိုင်းရပ်စ်က မြန်မာနိုင်ငံ အပါအဝင် အာဆီယံနိုင်ငံများထံသို့ ခြေဦးလှည့် ခြိမ်း ခြောက်လာ

ကုသဆေး နှင့်ကာကွယ်ဆေး မရှိသော ဟန်တာဗိုင်းရပ်စ် ကူးစက်ရန် သံသယရှိခံရသူများမှာ နိုင်ငံ ၁၂ နိုင်ငံသို့ အသီးသီးပြန့်နှံ့သွားသဖြင့် ကမ္ဘာ့နိုင်ငံအများအပြားတွင် အရေးပေါ် ပြင်ဆင်မှုများ လုပ်ဆောင်နေ

ရန်ကုန်၊ ​မေ ၈

ကြွက်မှတစ်ဆင့် ကူးစက်ပြီး လူအချင်းချင်း ကူးစက်နေသည့် ကုသဆေးမပေါ်သေးသော ဟန်တာဗိုင်းရပ်စ် သံသယ ဖြင့် စင်ကာပူနိုင်ငံသား ၂ ဦးကို သီးသန့်စောင့်ကြည့်နေကြောင်း စင်ကာပူမှ လာသော သတင်းများအရ သိရှိရသည်။

ဟန်တာဗိုင်းရပ်စ် ကူးစက်မှုမှာ အာဂျင်တီးနားနိုင်ငံမှ ထွက်ခွာလာသော MV Hondius အပျော်စီးသင်္ဘောပေါ်တွင် ရှားပါးပြီး အသက်သေဆုံးနိုင်ခြေရှိသော Andes hantavirus ကူးစက်မှု ဖြစ်ပွားခဲ့ရာ လက်ရှိအချိန်အထိ လူ ၃ ဦး သေဆုံးခဲ့ပြီးဖြစ်ကြောင်းနှင့် ကမ္ဘာအနှံ့သို့ ပျံ့နှံ့သွားသည့် ခရီးသည်များကို ကျန်းမာရေးတာဝန်ရှိသူများက အပူတပြင်း လိုက်လံရှာဖွေနေရကြောင်း သိရှိရပါသည်။

ကမ္ဘာ့ကျန်းမာရေးအဖွဲ့ (WHO) က ကြာသပတေးနေ့တွင် သတင်းထုတ်ပြန်ရာ၌ အဆိုပါဗိုင်းရပ်စ်သည် ပုံမှန်အားဖြင့် ကြွက်များမှတစ်ဆင့် ကူးစက်သော်လည်း ယခုမျိုးစိတ် (Andes strain) မှာ လူအချင်းချင်း ကူးစက်နိုင်စွမ်းရှိကြောင်း အတည်ပြုသည်။

ဟန်တာ ဗိုင်းရပ်စ်၏ ပျိုးပင်သက်တမ်းမှာ ၆ ပတ် (၄၅ ရက်) အထိ ကြာမြင့်နိုင်သောကြောင့် နောက်ထပ် ကူးစက်ခံရသူများ ထပ်မံထွက်ပေါ်လာနိုင်သော်လည်း လုံလောက်သော ကြိုတင်ကာကွယ်မှုများ ပြုလုပ်ပါက ကမ္ဘာလုံးဆိုင်ရာ ကပ်ရောဂါအသွင် (Pandemic) ဖြစ်လာနိုင်ခြေမရှိကြောင်း WHO က သတိပေးသည်။

MV Hondius အပျော်စီးသင်္ဘောပေါ်တွင်ဗိုင်းရပ်စ်ကူးစက်ခဲ့သော ဒတ်ခ်ျလူမျိုး ဇနီးမောင်နှံ ၂ ဦးနှင့် ဂျာမန်လူမျိုး ခရီးသည် ၁ ဦး အပါအဝင် စုစုပေါင်း ၃ ဦး သေဆုံးခဲ့သည်။ ဒတ်ခ်ျအမျိုးသားမှာ သင်္ဘောပေါ်တွင် သေဆုံးခဲ့ခြင်းဖြစ်ပြီး ၎င်း၏ဇနီးမှာ ခင်ပွန်းဖြစ်သူ၏ ရုပ်အလောင်းနှင့်အတူ စိန့်ဟယ်လီနာကျွန်းမှတစ်ဆင့် တောင်အာဖရိကသို့ လေယာဉ်ဖြင့် လိုက်ပါသွားစဉ် ရောဂါလက္ခဏာပြပြီး သေဆုံးခဲ့ခြင်းဖြစ်သည်။

လက်ရှိတွင် ဗိုင်းရပ်စ်ကူးစက်ခံရသူ အတည်ပြုလူနာ ၅ ဦးနှင့် သံသယလူနာ ၃ ဦး ရှိနေပြီး ဗြိတိန်၊ ဂျာမနီ၊ နယ်သာလန်၊ ဆွစ်ဇာလန်နှင့် တောင်အာဖရိကနိုင်ငံတို့တွင် ဆေးကုသမှု ခံယူနေကြသည်။

အဆိုပါသင်္ဘောပေါ်တွင် လိုက်ပါခဲ့သည့် စင်ကာပူနိုင်ငံသားတစ်ဦးနှင့် အမြဲတမ်းနေထိုင်ခွင့်ရသူ (PR) တစ်ဦးတို့မှာ စင်ကာပူသို့ ပြန်လည်ရောက်ရှိလာခဲ့ပြီး လက်ရှိတွင် အမျိုးသားကူးစက်ရောဂါဗေဒဌာန (NCID) ၌ သီးသန့်ခွဲခြား စောင့်ကြည့်ခြင်း ခံထားရသည်။ ယင်းအခြေအနေမှာ မြန်မာနိုင်ငံအပါအဝင် အာဆီယံနိုင်ငံများသို့ ဟန်တာ ဗိုင်းရပ်စ်က ခြေဦးလှည့် ခြိမ်းခြောက်လာသည့်အခြေအနေရှိကြောင်း သတင်းများက ဆိုသည်။

စင်ကာပူနိုင်ငံတွင် စောင့်ကြည့်ခံနေရသူ ၂ ဦးမှာ ဟန်တာဗိုင်းရပ်စ်ကူးစက်မှုကြောင့် သေဆုံးသွားသော ဒတ်ခ်ျအမျိုးသမီးနှင့်အတူ တစ်လေယာဉ်တည်း လိုက်ပါလာခဲ့ကြသူများဖြစ်ပြီး တစ်ဦးမှာ နှာစေးသည့် လက္ခဏာရှိကာ ကျန်တစ်ဦးမှာ ရောဂါလက္ခဏာမရှိသေးကြောင်း သိရသည်။ ၎င်းတို့နှစ်ဦးအား စစ်ဆေးမှုများပြုလုပ်နေပြီး ရောဂါမရှိဟု အဖြေထွက်ပါကလည်း ၃၀ ရက်ကြာ ကွာရန်တင်း (Quarantine) ထားရှိဦးမည်ဖြစ်သည်။

အပျော်စီးသင်္ဘောပေါ်မှ ခရီးသည် ၄၀ ခန့်မှာ မည်သည့်ကျန်းမာရေးစစ်ဆေးမှု (Contact Tracing) မျှ မပြုလုပ်ရသေးဘဲ စိန့်ဟယ်လီနာကျွန်းတွင် ဆင်းခွာသွားခဲ့ကာ ၎င်းတို့၏ နေရပ်နိုင်ငံအသီးသီးသို့ ပြန်သွားခဲ့ကြသဖြင့် တာဝန်ရှိသူများက အချိန်နှင့်အမျှ အပြိုင် လိုက်လံရှာဖွေနေရခြင်း ဖြစ်သည်။ ၎င်းတို့အနက် ၁၂ နိုင်ငံမှ နိုင်ငံသားများ ပါဝင်ကြောင်း သိရသည်။

ဟန်တာဗိုင်းရပ်စ်-Hantavirus သည် ကြွက်များ၏ ဆီး၊ မစင်နှင့် တံတွေးတို့မှတစ်ဆင့် ကူးစက်တတ်သော အသက်ရှူလမ်းကြောင်းဆိုင်ရာ ရောဂါဖြစ်သည်။ ရောဂါလက္ခဏာများမှာ ဖျားခြင်း၊ ကိုယ်လက်ကိုက်ခဲခြင်း၊ အစာအိမ်ပြဿနာနှင့် အသက်ရှူရခက်ခဲခြင်းတို့ ဖြစ်ပြီး ပြင်းထန်ပါက အသက်သေဆုံးနိုင်သည်။ လက်ရှိအချိန်အထိ အဆိုပါရောဂါအတွက် ကာ ကွယ်ဆေးနှင့် ကုသဆေး မရှိသေးဘဲ ဝေဒနာသက်သာအောင်သာ ပြုစုကုသပေးနိုင်ကြောင်း သိရှိရသည်။