ရန်ကုန်၊ မေ ၁၉
အာဆီယံထိပ်သီးအစည်းအဝေးသို့ သမ္မတရာထူးဖြင့် တက်ရောက်ရန် အလွန် စိတ်ဆန္ဒပြင်းပြနေသော အကြမ်း ဖက်မင်းအောင် လှိုင်က အာဆီယံနိုင်ငံ ခြားရေးဝန်ကြီးတချို့ကို မြန်မာနိုင်ငံ လာရောက်ရန် လျှို့ဝှက် ဖိတ်ကြားထားကြောင်း နေပြည်တော်စစ်ဘက်သတင်းရင်းမြစ်က ပြောဆိုသည်။
ဖိလစ်ပိုင်နိုင်ငံ၊ စီဘူးမြို့တွင် ယခု မေလအတွင်း ကျင်းပခဲ့သော ၄၈ ကြိမ်မြောက် အာဆီယံထိပ်သီးအစည်းအဝေးသို့ အကြမ်း ဖက် မင်းအောင်လှိုင်နှင့် နိုင်ငံခြားရေးဝန်ကြီး တင်မောင်ဆွေတို့ကို တက်ခွင့်ဆက်လက် ပိတ်ပင်ခဲ့ကြောင်း၊ ယင်းသို့ပိတ်ပင်ခံရပြီးနောက် စစ်တပ်က လာမည့် နိုဝင်ဘာလအတွင်း ဖိလစ်ပိုင်နိုင်ငံ ၊ မနီလာမြို့တွင် ထပ်မံပြုလုပ်မည့် အာဆီယံထိပ်သီးအစည်း အဝေးသို့ တက်ရောက်ခွင့်ရရှိရေးအတွက် အာဆီယံနိုင်ငံခြားရေး ၀န်ကြီးတချို့ကို နေပြည်တော်သို့ လာရောက် ညှိနှိုင်းမှုများ ဆောင်ရွက်နိုင်ရေး ဖိတ်ခေါ်လျက်ရှိကြောင်း သိရှိရသည်။
“အာဆီယံနိုင်ငံခြားရေးဝန်ကြီးတွေကို နေပြည်တော်လာဖို့ လိုက်ဖိတ်နေတာရှိတယ်။ မလေးရှားနိုင်ငံခြားရေးဝန်ကြီးလည်း နေပြည်တော်လာမယ်။ ဒီဘက်က လျှို့ဝှက် ဖိတ်နေတာ” ဟု နေပြည်တော်စစ်ဘက်သတင်းရင်းမြစ်က ပြောဆိုသည်။
အာဆီယံဘက်က မြန်မာ့အရေး ဖြေရှင်းရန် ဘုံသဘောတူညီချက် ၅ ချက် ကို အကောင်အထည်ဖော်ရန်၊ နိုင်ငံ တော်၏ အတိုင် ပင်ခံပုဂ္ဂိုလ် ဒေါ်အောင်ဆန်းစုကြည်ကို တွေ့ခွင့်ပြုရေး တောင်းဆိုထားသည်။
အကြမ်းဖက် မင်းအောင်လှိုင်နှင့် စစ်ခေါင်းဆောင်များ အာဆီယံထိပ်သီးအစည်းအဝေး တက်ခွင့်မရသောကြောင့် အာဆီယံနိုင်ငံတချို့က မြန်မာနိုင်ငံ၏ ပြည်တွင်းရေးကို ဝင်ရောက် စွက်ဖက်နေဟု အကြမ်းဖက် စစ်တပ်က မေလ ၁၀ ရက်နေ့တွင် ကြေညာ ချက်ထုတ်ပြန်ခဲ့သည်။
အကြမ်းဖက်စစ်တပ်၏ ကြေညာချက်တွင် ၎င်းတို့သည် ပြည်သူများရွေးချယ်သည့် အစိုးရတစ်ရပ် ဖြစ်ကြောင်း၊ ၂၀၂၀ ပြည့်နှစ် ရွေးကောက်ပွဲတွင် အာဏာရအစိုးရက မဲမသမာမှု ၁၁ သန်းကျော် ပြုလုပ်ခဲ့သဖြင့် ဥပဒေနှင့်အညီ အရေးယူခဲ့ရခြင်းဖြစ်ပြီး၊ အဂတိကျူးလွန်သူများကိုလည်း တရားရုံးက ပြစ်ဒဏ်စီရင်ခဲ့ပြီးဖြစ်ကြောင်း၊ ထို့ ကြောင့်သာ ရွေးကောက်ပွဲအသစ်ကို ပြန်လည်ကျင်းပခဲ့ရခြင်းဖြစ် ကြောင်း၊ မြန်မာနိုင်ငံ၏ နိုင်ငံရေးတိုးတက်မှုများကို အာဆီယံနိုင်ငံအများစုက နားလည်သော်လည်း နိုင်ငံအနည်းငယ်ကမူ မြန်မာနိုင်ငံအပေါ် ခွဲခြားဆက်ဆံခြင်းနှင့် တန်းတူကိုယ်စားပြုခွင့်ကို ချန်လှပ်ထားခြင်းများ ဆက်လက်လုပ်ဆောင်နေကြောင်း ၊ ယင်းသို့ပြုလုပ်ခြင်း အာဆီယံပဋိညာဉ်ပါ အခြေခံမူများကို ဖောက်ဖျက်ကာ အဖွဲ့ဝင်နိုင်ငံတစ်ခု၏ ပြည်တွင်းရေးကို ဝင်ရောက်စွက်ဖက်ခြင်းနှင့် ဖိအားပေးခြင်းများဖြစ်သည်ဟု ဒေါသတကြီး တုံ့ပြန်ခဲ့သည်။
