ရန်ကုန်၊ မေ ၂၉
အကြမ်းဖက် မင်းအောင်လှိုင်၏ အိန္ဒိယခရီးစဉ်တွင် မိသားစုနှင့်အတူ ဗုဒ္ဓဂါယာ ဘုရားဖူးထွက်ကြဦးမည်ဖြစ်ကြောင်း ခရီးစဉ်နှင့်ပတ်သက်၍ သိရှိထားသော သတင်းရင်းမြစ်တစ်ခုက ရန်ကုန်ခေတ်သစ်သတင်းဌာနထံသို့ ပြောဆိုသည်။
အကြမ်းဖက် မင်းအောင်လှိုင်၏ အိန္ဒိယ ခရီးစဉ်မှာ မေလ ၃၀ ရက်နေ့မှ စတင်မည်ဖြစ်ပြီး ယင်းခရီးစဉ်အတွင်း ဗုဒ္ဓဂါယာသို့ သွားရောက်ဘုရားဖူးခြင်း၊ ဗုဒ္ဓဂါယာတစ်လျှောက် လှည့်လည် လှူဒါန်းခြင်း ၊ မဟာဗောဓိစေတီတော် (Mahabodhi Mahavihara) သို့ သွားရောက် ဖူးမြှော်ခြင်း၊ ဗုဒ္ဓဂါယာရှိ မြန်မာဘုန်းတော်ကြီးကျောင်း (Burmese Vihara Buddhist monastery) သို့လည်း သွားရောက်ကြမည်ဖြစ်ကြောင်း သိရှိရသည်။
“ဗုဒ္ဓဂါယာကို လုံခြုံရေးအတွက် စရဖနဲ့ အိမ်တော်လုံခြုံရေးအဖွဲ့တွေ ကြိုသွားကြပြီ။ အရင်ဆုံးဘုရားဖူးမယ်။ မိသားစုလိုက်သွားကြတာ။ ၂ ရက် ၁ ညအိပ် ဘုရားဖူးမှာ” ဟု ခရီးစဉ်အကြောင်း သိရှိထားသူက ရှင်းပြသည်။
အကြမ်းဖက် မင်းအောင်လှိုင်သည် မေလ ၃၀ ရက်နေ့မှ ဇွန်လ ၃ ရက်နေ့အထိ အိန္ဒိယနိုင်ငံသို့ ၅ ရက် ကြာ လာရောက်ခြင်းဖြစ်ကြောင်း သိရှိရသည်။
