ဖြူးမြို့နယ်ရှိ အုတ်ဖြတ်တံတား စစ်ဆေးရေးဂိတ်ကို စနိုက်ပါဖြင့် ပစ်ခတ်မှု စစ်သား ၁ ဦးသေဆုံး၊ သထုံမြို့နယ်ရှိ ခမရ ၁ တပ်စခန်းကို ဝင်ရောက် တိုက်ခိုက်
ရန်ကုန်၊ သြဂုတ် ၂၂
ပဲခူးတိုင်း၊ ဖြူးမြို့နယ်ရှိ အုတ်ဖြတ်တံတား စစ်ဆေးရေးဂိတ်ကို စနိုက်ပါဖြင့် ပစ်ခတ်ရာ စစ်သား ၁ ဦးသေဆုံးသေဆုံးခဲ့ကြောင်း NUG ကာကွယ်ရေးဝန်ကြီးဌာနက ထုတ်ပြန်ထားသည်။
ဩဂုတ်လ ၂၀ ရက်နေ့ နံနက် ၇ နာရီ ၃၀ မိနစ်ခန့်တွင် ဖြူးမြို့နယ်၊ အုတ်ဖြတ်တံတားတွင် ပြည်သူများထံမှ ဆက်ကြေးကောက်ခံနေသည့် အကြမ်းဖက် စစ်တပ်ကို ပြည်သူ့ကာကွယ်ရေး တပ်မတော် ရိုးမ စစ်ကြောင်း ၂ နှင့် KNLA ပူးပေါင်းအဖွဲ့များက Sniper ဖြင့် ပစ်ခတ်တိုက်ခိုက်ခဲ့ရာ စစ်သား ၁ ဦး သေဆုံးခဲ့ကြောင်း သိရသည်။
ထို့ပြင် မွန်ပြည်နယ်၊ သထုံမြို့နယ်ရှိ အကြမ်းဖက် စစ်တပ်၏ ခမရ ၁ တပ်စခန်းကို ဝင်ရောက် တိုက်ခိုက်ခဲ့ကြောင်း NUG ကာကွယ်ရေးဝန်ကြီးဌာန ထံမှ သိရသည်။
ဩဂုတ်လ ၂၁ ရက်နေ့ နံနက် ၄ နာရီ ၃၀ မိနစ်ခန့်တွင် သထုံမြို့နယ်ရှိ အကြမ်းဖက် စစ်တပ်၏ ခမရ ၁ တပ်စခန်းကို သထုံ ပြည်သူ့ကာကွယ်ရေးအဖွဲ့ ပကဖ က အနီးကပ်သွားရောက် ပစ်ခတ်တိုက်ခိုက်ရာ အပြန်အလှန် ပစ်ခတ်မှုဖြစ်ပွားခဲ့ပြီး အဆောက်အဦ ၁ လုံး ထိခိုက်ပျက်စီးကာ စစ်သား ၁ ဦး ဒဏ်ရာရရှိခဲ့ကြောင်း သိရှိရသည်။
