ရန်ကုန်၊ မတ် ၁၈
မြန်မာစစ်တပ်ကို စွန့်ခွာလာသော ပြည်သူ့ဘက်တော်သား CDMစစ်သားများကို သြစတြေးလျ အစိုးရက ခိုလှုံခွင့် ဗီဇာများ ထုတ်ပေးပြီဖြစ်ကြောင်း The Sydney Morning Herald က သတင်းဖော်ပြသည်။
Sydney Morning Herald နှင့် The Age တို့က ဩစတေးလျအစိုးရထံမှ ဇန်နဝါရီလကတည်းက ခိုလှုံခွင့်ရရှိထားသည့် မြန်မာစစ်တပ်မှ စွန့်ခွာလာသူ စစ်သည်နှစ်ဦးကို စကားပြောဆိုခွင့်ရရှိခဲ့ကြောင်း သိရှိရသည်။
မြန်မာ-ထိုင်းနယ်စပ်သို့ မရောက်ရှိမီ တော်လှန်ရေးအဖွဲ့တွင် ပါဝင်ခဲ့ကာ ဩစတြေးလျနိုင်ငံတွင် ရောက်ရှိနေပြီဖြစ်သော စစ်အရာရှိက “အာဏာသိမ်းတာကို လက်မခံဘူး။ အရပ်သားတွေကို မသတ်ချင်ဘူး၊ အရပ်သားတွေကို ဆန့်ကျင်တာ မခံချင်ဘူး။ ဒီမှာ (နယ်စပ်အနီး) မှာ ပုန်း အောင်းနေတဲ့ စစ်သည်ဟောင်းတွေ အများကြီးရှိတယ်။ မြန်မာနိုင်ငံမှာ မလုံခြုံဘူး။ နယ်စပ်မှာ နည်းနည်းပိုလုံခြုံပေမယ့် ငါတို့ပိတ်မိနေပြီး ဘဝသစ်ကိုစချင်တယ်”ဟု ပြောဆိုသည်။
လက်ရှိတွင် အဆိုပါ အရာရှိသည် မိသားစုနှင့်အတူ ဩစတြေးလျနိုင်ငံတွင် အ ခြေ ချနေပြီဖြစ်ပြီး ထိုင်းနိုင်ငံသို့ ထွက်ပြေးခဲ့သည့်တိုင် ၎င်း၏အသက်အန္တ ရာယ်ကို ခြိမ်းခြောက်မှုများ ရှိနေကြောင်း ပြောဆိုသည်။
“စစ်အာဏာရှင်တွေက အရမ်းရက်စက်တယ်။ ကျွန်တော်အဲဒီမှာနေလို့မရဘူး။ အာဏာမသိမ်းခင်က ငါတို့တိုင်းပြည် ငြိမ်းချမ်းနိုင်မယ်လို့ ယုံကြည်ခဲ့ပေမယ့် ကံမကောင်းစွာနဲ့ပဲ စစ်အစိုးရက အာဏာသိမ်းခဲ့တယ်”ဟု အဆိုပါအရာရှိက ဆိုသည်။
သြစတြေးလျပြည်ထဲရေးဌာနက “အခြေအနေများ သို့မဟုတ် လူတစ်ဦးချင်း သို့မဟုတ် သီးခြားအုပ်စုများ၏ လူသားချင်းစာနာထောက်ထားမှုဆိုင်ရာ ပြန်လည်နေရာချထားရေးအလားအလာများ” ကို မှတ်ချက်ပေးမည်မဟုတ်ကြောင်း ၊သတ်မှတ်ချက်များ၊ ပြည့်စုံသော အချက်အလက်များကို အသုံးပြု၍ ဗီဇာလျှောက်လွှာတစ်ခုစီကို ထည့်သွင်းစဉ်းစားကြောင်း ၊ဗီဇာလျှောက်ထားသူတိုင်းသည် အများသူငှာ အကျိုးစီးပွားဆိုင်ရာ သတ်မှတ်ချက်များနှင့် ပြည့်မီရန် လိုအပ်ကြောင်း” ထုတ်ပြန်ထားသည်။
အမျိုးသား စည်းလုံးညီညွတ်ရေး အစိုးရ၏ သြစတြေးလျ ကိုယ်စားလှယ် ဒေါက်တာ ထွန်းအောင်ရွှေ က ဩစတေးလျအစိုးရက မကြာသေးမီက လက်ခံခဲ့သော စစ်ဘက်ပြောင်းလာသူများကို သတိပြုမိကြောင်းနှင့် အနောက်နိုင်ငံ အစိုးရများ၏ ဆောင်ရွက်မှုများကြောင့် စစ်တပ်ကို အားနည်းစေမည်ဖြစ် ကြောင်း ပြောဆိုသည်။
“ သြစတြေးလျ၊ နယူးဇီလန်နဲ့ အမေရိကန် အစိုးရတွေကို တပ်မတော်ကို စွန့်ခွာလာသူတွေကို အကာအကွယ်ပေးရေး စဉ်းစားပေးဖို့ တောင်းဆိုထားပါတယ်” ဟု ဒေါက်တာထွန်းအောင်ရွှေကဆိုသည်။
“နိုင်ငံတကာ အသိုက်အဝန်းနဲ့ အစိုးရတွေက တပ်မတော်မှ စွန့်ခွာလာသူတွေကို အကာအကွယ်ပေးနိုင်မှသာလျှင် မြန်မာစစ်တပ် အားနည်းစေဖို့ အရှိန်မြှင့်နိုင်မှာပါ။ ထိုင်းကနေတဆင့် သြစတြေးလျကို ရောက်လာပြီး သြစတြေးလျကို မရောက်လာခင် တော်လှန်ရေး အဖွဲ့ရဲ့ လှုပ်ရှားမှုတွေမှာ ပါဝင်ခဲ့တဲ့ တပ်မ တော်သား နှစ်ယောက်ကို ကျွန်တော် သိပါတယ်”ဟု ၎င်းက ဆက်လက်ပြောဆိုသည်။
အာဏာဖီဆန်ရေးလှုပ်ရှားမှုတွင် ပါဝင်ခဲ့ပြီး NUG နှင့် ချိတ်ဆက်၍ စစ်သားဟောင်းများစုပေါင်းထားသော ပြည်သူ့ ရင်ခွင်အဖွဲ့ သည် စွန့်ခွာလာသော စစ်သည်များ၏ နောက်ခံသမိုင်းကြောင်းကို စစ်ဆေးရာတွင် အဓိက အရေးကြီးကြောင်း ၎င်းက ပြောဆိုသည်။
(မူရင်းသတင်းကို https://www.smh.com.au/world/asia/australia-issues-protection-visas-to-myanmar-military-defectors-20220316-p5a53v.html တွင် ဖတ်ရှုနိုင်ပါသည်)
