နမ့်ခမ်း၊ နောင်ချိုနှင့် မူဆယ်တို့တွင် တိုက်ပွဲများ ဖြစ်ပွားပြီး စစ်တပ်က လေကြောင်းဖြင့် ဗုံးကျဲ တိုက်ခိုက်ကာ လက်နက်ကြီးဖြင့် ပစ်ခတ်
ရန်ကုန်၊ နိုဝင်ဘာ ၃၀
ရှမ်းပြည်နယ်မြောက်ပိုင်း၊ နမ့်ခမ်း၊ နောင်ချိုနှင့် မူဆယ်မြို့နယ်တို့တွင် တိုက်ပွဲများ ဖြစ်ပွားပြီး အကြမ်းဖက် စစ်တပ်က လေကြောင်းဖြင့် ဗုံးကျဲ တိုက်ခိုက်ကာ လက်နက်ကြီးဖြင့် ပစ်ခတ်ခဲ့ကြောင်း PSLF/TNLA သတင်းနှင့် ပြန်ကြားရေးဌာနက ထုတ်ပြန်ထားသည်။
နိုဝင်ဘာလ ၃၀ ရက်နေ့တွင် နမ့်ခမ်းမြို့နယ်ရှိ အကြမ်းဖက် စစ်တပ်၏ စခန်းသစ် တပ်စခန်းကုန်းကို တအာင်းတပ်မတော် PSLF/TNLA က ၃ ကြိမ် တိုက်ခိုက်ခဲ့ကြောင်း၊ ထို့ပြင် နောင်ချိုမြို့နယ် သံဘိုကျေးရွာအနီးတဝိုက်တွင် ယနေ့ နံနက် ၆ နာရီ ၂၀ မိနစ် အချိန်အထိ အကြမ်းဖက် စစ်တပ်နှင့် တအာင်းတပ်မတော် PSLF/TNLA တို့ တိုက်ပွဲဖြစ်ပွားခဲ့ကြောင်း သိရသည်။
နောင်ချိုမြို့နယ်ရှိ သင်ကုန်ကျေးရွာ နှင့် ရေဝင်ကျေးရွာ အကြားတွင် ယနေ့ နံနက် ၁၀ နာရီ ၁၈ မိနစ်ခန့်တွင် အကြမ်းဖက် စစ်တပ်နှင့် တအာင်းတပ်မတော် PSLF/TNLA၊ MDY ၊ PDF ပူးပေါင်းတပ်ဖွဲ့များတို့ တိုက်ပွဲဖြစ်ပွားခဲ့ကြောင်း၊ မူဆယ်မြို့နယ်ရှိ အကြမ်းဖက် စစ်တပ်၏ ၁၀၅ မိုင် တပ်စခန်းကိုလည်း မွန်းလွဲ ၁၂ နာရီခန့်တွင် ညီနောင်မဟာမိတ် ၃ ဖွဲ့ဖြစ်သည့် MNDAA၊ AA ၊ TNLA တို့က တိုက်ခိုက်ခဲ့ကြောင်း သိရှိရသည်။
အကြမ်းဖက် စစ်တပ်က မူဆယ်မြို့နယ်ရှိ ၁၀၅ မိုင် တပ်စခန်းဘက်ကို Mi35 ၊ Jet Fighter တို့ဖြင့် ၃ ကြိမ် တိုက်ပွဲဖြစ်ပွားရာနေရာကို ပစ်ကူပေး တိုက်ခိုက်ခဲ့ကြောင်း၊ နမ့်ခမ်းမြို့နယ်ရှိ စစ်တပ် စခန်းသစ်ကုန်းဘက်ကိုလည်း Jet Fighter ဖြင့် ၇ ကြိမ် လာရောက် ပစ်ခတ်တိုက်ခိုက်ခဲ့ကြောင်း သိရသည်။
အလားတူ နမ့်ခမ်းမြို့နယ်၊ ရွှေလီ-မန်ဝိန်း တံတားကြီးဘက်ကို ယနေ့ မွန်းလွဲ ၁ နာရီ ခန့်တွင် အကြမ်းဖက် စစ်တပ်က Jet Fighter ဖြင့် ၁ ကြိမ် လာရောက်ပစ်ခတ်တိုက်ခိုက်ခဲ့ကြောင်း၊ မူဆယ်မြို့နယ်၊ ကျင်စန်းကျော့ဂိတ်အနီးတဝိုက်ကိုလည်း ယနေ့ မွန်းလွဲ ၁ နာရီ ၃၅ မိနစ်ခန့်တွင် အကြမ်းဖက် စစ်တပ်က Jet Fighter ဖြင့် ၁ ကြိမ် လာရောက် ပစ်ခတ်တိုက်ခိုက်ခဲ့ကြောင်း သိရှိရသည်။
ထို့ပြင် ကျောက်မဲမြို့နယ်ရှိ ကျင်တီတံတားဘက်၊ အေရှာဝေါတိုးဂိတ်အနီးတဝိုက်၊ ငြိမ်းချမ်းရေးကုန်း၊ ကြူရှောကျေးရွာဘက်နှင့် နောင်ပြစ်ကျေးရွာအနီးတဝိုက်၊ ကွတ်ခိုင်မြို့နယ်ရှိ နမ့်ခမ်း စခန်းသစ်ကုန်းဘက်၊ လားရှိုးမြို့နယ်ရှိ ပန်ဟုံကျေးရွာ၊ ပန်းထိုလင်၊ ပိန်ခန်းကျေးရွာဘက်နှင့် မန်ကျန်ကျေးရွာအနီးတဝိုက်တို့ကို အကြမ်းဖက် စစ်တပ်က လက်နက်ကြီးဖြင့် ၄၄ ကြိမ် ပစ်ခတ် ခဲ့ကြောင်းသိရသည်။
