ရန်ကုန်၊ ဧပြီ ၂၂
ပဲခူးတိုင်း၊ ထန်းတပင်မြို့နယ်၊ တပြေးကျေးရွာရှိ အကြမ်းဖက်စစ်ကောင်စီ စစ်သားများ တပ်စွဲရာ ဂိတ်စခန်းကို ဧပြီလ ၂၂ ရက် ယနေ့နံနက ၂ နာရီခွဲခန့်တွင် ကရင်အမျိုးသားလွတ်မြောက်ရေးတပ်မတော်နှင့် PDF ပူးပေါင်းအဖွဲ့က ဝင်ရောက်ပစ်ခတ်တိုက်ခိုက်ခဲ့ပြီး စစ်သား ၂ ဦး သေဆုံးသွားကြောင်း ဒေသခံများထံမှ သိရှိရသည်။
“တောင်ငူ-ဇရပ်ကြီး ကားလမ်းပေါ်မှာရှိတဲ့ တပြေးဂိတ်ပေါ့၊ စစ်ဆေးရေးဂိတ်လို့လည်း ပြောလို့ရတယ်၊ စစ်သားတွေလည်း အရင်ကတည်းက နေတယ်၊ ည ၂ နာရီခွဲမှာ KNLA ပူးပေါင်းအဖွဲ့ဝင်ပစ်တာ စစ်သား ၂ ယောက် သေတယ်” ဟု PDF သတင်းရင်းမြစ်က ပြောဆိုသည်။
တိုက်ခိုက်မှုတွင် KNLA ပူးပေါင်းအဖွဲ့ဘက်မှ ထိခိုက်မှုမရှိခဲ့ဘဲ နံနက် ၅ နာရီခန့်တွင် အကြမ်းဖက်စစ်ကောင်စီတပ်က KNLA တပ်ဖွဲ့များရှိနိုင်သည့် နေရာများသို့ လက်နက်ကြီးဖြင့် ရမ်းသန်းပစ်ခတ်ခဲ့ကြောင်း သတင်းရရှိသည်။
အလားတူ မတူပီ၊ ထယ်ဘွေးစခန်းသို့ အင်အားဖြည့်တင်းလာသော အကြမ်းဖက်စစ်ကောင်စီတပ်ဖွဲ့နှင့် CDF မတူပီကြား ဧပြီလ ၂၂ ရက် ယနေ့ နံနက် ၈ နာရီ ၂၀ မိနစ်ခန့်တွင် မတူပီ-ပလက်ဝလမ်းမ မိုင်တိုင် ၁၆ ၌ တိုက်ပွဲဖြစ်ပွားရာ စစ်သား ၆ ဦးသေဆုံးပြီး ၇ ဦး ဒဏ်ရာရကြောင်း CDF မတူပီက သတင်းထုတ်ပြန်သည်။
တိုက်ပွဲတွင် CDF မတူပီဘက်မှ ထိခိုက်မှုမရှိကြောင်းနှင့် CDF မတူပီ နယ်မြေများအတွင်း တိုက်ပွဲများ ပိုမိုပြင်းထန်လာနိုင်ကြောင်း သိရှိရသည်။
