ရန်ကုန်၊ ဧပြီ ၂၃
ကချင်ပြည်နယ်၊ ရွှေကူမြို့နယ်၊ မင်းကျောင်းကုန်းကျေးရွာသို့ စစ်ကြောင်းထိုးလာသော အကြမ်းဖက်စစ်ကောင်စီတပ်ဖွဲ့ကို ကချင်ဒေသပြည်သူ့ကာကွယ်ရေးတပ် (မြို့လှ) က ယမန်နေ့ ဧပြီလ ၂၂ ရက် ည ၇ နာရီခွဲခန့်တွင် စောင့်ကြိုတိုက်ခိုက်ခဲ့ပြီး စစ်သားထိခိုက်သေဆုံးမှု များနိုင်ကြောင်း မြို့လှ KPDF က သတင်းထုတ်ပြန်သည်။
အဆိုပါ စစ်ကောင်စီတပ်ဖွဲ့သည် အင်အား ၄၀ ခန့် ရှိပြီး ဗန်းမော်မြို့နယ်၊ ချောင်းဝကျေးရွာဘက်မှ ထွက်ခွာလာခြင်းဖြစ်ကြောင်း၊ လမ်းခုလတ်၌ ဗိုလ်မိုးကြိုး ဦးဆောင်သော မြို့လှ KPDF တပ်ခွဲ-၁ က RPG များ၊ ၇၉ မမ ဗုံးပစ်လောင်ချာများဖြင့် ပစ်ခတ်ရာ စစ်ကောင်စီစစ်ကြောင်းအနီး ကျရောက်ပေါက်ကွဲကြောင်း၊ ၁၅ မိနစ်ခန့် တိုက်ပွဲဖြစ်ပွားကြောင်း သိရှိရသည်။
မြို့လှ KPDF တပ်ဖွဲ့ဝင်များ အထိအခိုက်မရှိ ဆုတ်ခွာနိုင်ခဲ့ကြောင်း ထုတ်ပြန်ထားသည်။
အလားတူ စစ်ကိုင်းတိုင်း၊ ညောင်ပင်ရှည်ရွာတွင် အများပြည်သူပိုင် ပစ္စည်းများ ခိုးယူကာ နေအိမ်များကို မီးရှို့ဖျက်ဆီးနေသော စစ်ကောင်စီတပ်ဖွဲ့ကို ယမန်နေ့ ဧပြီလ ၂၂ ရက် နံနက် ၁၀ နာရီခွဲဝန်းကျင်တွင် ဒေသကာကွယ်ရေးတပ်ဖွဲ့များက ဝင်ရောက်တိုက်ခိုက်ရာ ညနေ ၃ နာရီအထိ တိုက်ပွဲဖြစ်ပွားကြောင်း၊ စစ်သားနှင့် ပျူစောထီးပူးပေါင်းအဖွဲ့မှ ၃၀ ဦးခန့် သေဆုံးပြီး ၇ ဦးခန့် ဒဏ်ရာရရှိကြောင်း Zero ပြောက်ကျားတပ်ဖွဲ့ (မြင်းခြံ) က သတင်းထုတ်ပြန်သည်။
အကြမ်းဖက်စစ်တပ်နှင့် ပျူစောထီးများ အထိနာပြီး ၈ ဦးခန့်သာ ကျန်ရှိချိန်တွင် သံချပ်ကာ ကားများအပါအဝင် တပ်ကူများရောက်လာ၍ ကာကွယ်ရေးတပ်ဖွဲ့များ ပြန်လည်ဆုတ်ခွာခဲ့ကြောင်း သိရှိရသည်။
ညောင်လှကျေးရွာကို မီးရှို့ဖျက်ဆီးနေသော စစ်ကောင်စီတပ်ဖွဲ့ကို Zero ပျောက်ကြားတပ်ဖွဲ့ (မြင်းခြံ)၊ စစ်ကိုင်းတိုင်းတပ်ပေါင်းစု၊ မြင်းမူတပ်ပေါင်းစု၊ အရာတော်တပ်ပေါင်းစုများမှ ပူးပေါင်းတိုက်ခိုက်ခဲ့ခြင်းဖြစ်ပြီး Zero ပြောက်ကျားရဲဘော် ၁ ဦး ကျဆုံးကာ ၅ ဦး မစိုးရိမ်ဒဏ်ရာရခဲ့ကြောင်း သတင်းရရှိသည်။
